Esai 9

1Tɔn be ba raa sĩimɔ yam wɔ̃kuru sɔɔ, ba koo yam bururam bakam wa. Be gɔɔn bɛrum mu wukiri nge yam wɔ̃kuru, yam bururam mu koo bu kurema. 2Yinni Gusunɔ, kaa bu nuku doo bakabu wɛ̃, kpa ba n nuku doo bi mɔ̀ wunɛn wuswaaɔ nge mɛ ba ra nuku dobu ko gɛ̃ɛbun saa sɔɔ, ǹ kun mɛ sanam mɛ ba arumani gurama ba bɔnu mɔ̀ ka kuuki. 3Nge mɛ a wunɛn tɔmbu wɔra saa Madianin tabu kowobun nɔman di, nge mɛya kaa bu yara yorun di kpa a dɛka ye ba ra ka bu so biruɔ ka sere sɛna ye ba ra ka bu dam dɔre bɔɔku. 4Ba ǹ maa tabu kowobun bara naasun damu nɔɔmɔ. Ben tabu yãnu nu ra n yɛm yiba. Ba ǹ maa nu dokemɔ. Ba koo yãa ni ka bara ni dɔ̃ɔ karewa. 5Domi ba koo sun bii tɔn durɔ marua. Wiya u koo ko bɛsɛn wirugii. Win tɔmara, Bwisi kɛ̃ɔ bɛɛrɛgii, ka Gusunɔ Dam kpurogii, ka Baaba wi u ra n wãa, ka Bɔri yɛndun nuuru. 6U sãawa Dafidin sikadobu. Yen sɔ̃, u koo win bandu di kpa u tu dam sire kpa ta n bɔri yɛndu mɔ sere ka baadommaɔ. U koo win tɔmbu siri gem sɔɔ, saa tɛ̃n di sere ka baadommaɔ. Yeniwa Gusunɔ, wɔllu ka tem Yinni, u yɔ̃rari u ko. 7Yinni Gusunɔ u Isireli be ba sãa Yakɔbun bweseru siri. Ma siri bi, bu bu di. 8Tɔmbu kpuro, Efaraimuba ka Samarigibu, ba koo ye gia, be, be ba gerumɔ ka tii suabu ba mɔ̀, 9wee dian birikiba ba wɔrukumɔ, adama sa ko maa yi seeya ka kpee ni ba dãka. Wee sikamɔren dãa gbereba ba bɔɔkira. Sa ko bu kɔsi ka dãa gea ye ba mɔ̀ sɛdurun gbereba. 10Yinni Gusunɔ u koo Resini Asirin sina bokon wɛrɔbu tabu yãnu wɛ̃, kpa bu Isireliba wɔri. 11U koo de Sirigibu ba n wãa sɔ̃ɔ yari yeru gia, kpa Filisitiba ba n maa wãa sɔ̃ɔ duu yeru gia, kpa bu nɔɔ wukia bu Isireliba mwɛ. Ka mɛ kpuro, win mɔru kun suremɔ. U koo maa bu nɔma doke u sɛɛyasia. 12Adama ba ǹ wuramamɔ win mi, wi, wi u bu sɛɛyasiamɔ, wi, wi u sãa wɔllu ka tem Yinni. Ba ǹ maa nùn kasumɔ. 13Yen sɔ̃na u koo Isireliban wiru ka ben siru bura sɔ̃ɔ teerun sɔ̃ɔ. 14Ben bukuro bera, ba sãa ben wiru, ma sɔmɔ weesugibu ba sãa ben siru. 15Be ba sãa tɔn ben kparobu, ba dera ba kɔ̃ɔra. Be, be ba maa kpare, ba swaa kɔ̃sa mwa. 16Yen sɔ̃na Yinni Gusunɔ u ǹ nuku dobu mɔ, ben aluwaasiban sɔ̃. U ǹ maa ben gobekuba ka gɔminibu wɔnwɔndu kuammɛ. Domi be kpuro ba sãawa nuku kɔ̃surugibu. Ba ǹ Gusunɔn bɛɛrɛ yɛ̃. Sekuru sari gariya yi ra yari saa ben nɔsun di. Yen sɔ̃, Yinni Gusunɔn mɔru kun suremɔ. U koo bu nɔmu dokewa u sɛɛyasia. 17Domi nuku kɔ̃suru ta ra mɛniwa nge dɔ̃ɔ wi u ra yakasu ka sãki mwɛ. Dɔ̃ɔ wi, u ra du u dãa sɔ̃ɔ bɔkɔ mwa, kpa wiisu su se ge sɔɔn di. 18Gusunɔ, wɔllu ka tem Yinnin mɔrun sɔ̃, tem mɛ, mu dɔ̃ɔ mwaara, ma mɛn tɔmba dɔ̃ɔ diira. Goo kun win winsim laakari mɔ̀ u sere nùn somi. 19Ba dĩanu guramɔ nɔm geuɔ ka nɔm dwarɔ. Adama ka mɛ, goo kun deba. Ma ben baawure u win winsim wasin yaa temmɔ. 20Manaseba ka Efaraimuba ba tabu wɔrinamɔ. Yen biru be kpuro ba mɛnna ba Yudaba wɔri. Ka mɛ, Yinni Gusunɔn mɔru kun sure. U maa bu nɔmu doke, u sɛɛyasiamɔ.

will be added

X\