Esai 66

1Yinni Gusunɔ u nɛɛ, wɔlla sãawa nɛn sina gɔna, ma tem mu sãa nɛn naa sɔnditia. Ǹ n mɛn na, dii teren bwesera i ko kpĩ i man bania. Nge wãa yee terà i ko man wɛ̃ na n da n wɛ̃re mi. 2Ye kpuro nɛgia. Nɛna na ye taka kua ka nɛn nɔma. Wi u tii kawe, u nuki sankire win durum sɔ̃, ma u nɛn gari nasie, wiya na ka nɔnu geu mɛɛra. 3Adama nɛn tɔmbun sãaru ta ǹ arufaani gaa mɔ. Nɛn nɔni sɔɔ, wi u ka kɛtɛ yãkuru kua ka wi u koo raa ka tɔnu yãkuru ko, ba sãawa tia. Wi u maa ka yãaru yãkuru mɔ̀ ka wi u koo raa ka bɔ̃ɔ yãkuru ko, ba sãawa tia. Wi u ka kɛ̃ru naamɔ te ta sãa som, ka wi u koo raa ka kurusɔn yɛm na, ba sãawa tia. Wi u turare dɔ̃ɔ dokemɔ nɛn yãku yerɔ, ka wi u bũu sãamɔ, ba sãawa tia. Tɔn ben baawure u nɛn swaa deri u swaa tuka mwa ye u kĩ, ma ben gɔ̃ru ga ǹ bu taarɛ wɛ̃ɛmɔ. 4Yen sɔ̃na nɛn tii, kon de bu nɔni swãaru wa ben kookoo sin sɔ̃. Kpa wahala yu bu deema ye ya koo bu nandasia. Domi na bu soka adama ba ǹ man wurari. Na ka bu gari kua, ma ba ǹ man swaa daki. Kɔ̃sa ba mɔ̀. Ma ba swĩi ye nɛn gɔ̃ru ga ǹ kĩ. 5Bɛɛ be i Yinni Gusunɔn gari nasie, i swaa dakio i nɔ ye u gerumɔ. U nɛɛ, wee, bɛɛn mɛro bisibu be ba bɛɛ tusa ba gira ben min di nɛn yĩsirun sɔ̃, ba bɛɛ yaakoru mɔ̀ ba mɔ̀, Yinni Gusunɔ u win yiiko sɔ̃ɔsio, kpa bu bɛɛn nuku dobu wa. Adama ben tiiwa ba koo sekuru wa. 6I maa nɔɔ damguu swaa dakio ge ga nɔɔramɔ wuuɔ. Yinni Gusunɔn nɔɔwa ga naamɔ sãa yerun di. U win yibɛrɛba ben are kɔsiamɔ. 7Wunɛ Yerusalɛmu a sãawa nge tɔn kurɔ wi u kun marubun wuriribu wa u ka mara. U ǹ marubun wahala wa, u ka bii tɔn durɔ mara. 8Wara yen bweseru nɔɔre. Wara yen bweseru waare, tɔn bweseru tu yari nɔni kpaki teeru. Adama nge mɛya Yerusalɛmu kpaa ya koo yen bibu marusina n kun ka marubun wahala. 9Domi Gusunɔ bɛɛn Yinni u nɛɛ, wi, wi u ra de tɔn kurɔ u gura sua, wiya u koo nɛɛ, u ku ma? 10Bɛɛ kpuro, bɛɛ be i Yerusalɛmu kĩ, i nuku dobu koowo kpa i yɛ̃ɛri ka ye sannu. I yɛ̃ɛrio bɛɛ kpuro, bɛɛ be i raa yen gɔɔ wooru sɔ̃. 11Kpa bɛɛn nukuru tu yɛmia yen yiikon sɔ̃, nge bii wi u bɔm nɔrumɔ u debumɔ win mɛron mi. 12Amɛniwa nɛ, Yinni Gusunɔ na gerua. Na nɛɛ, kon de bɔri yɛndu tu kokuma Yerusalɛmuɔ nge daarun nim, kpa bwese tukunu nu ka dukia na mi, ya n kpã, nge daa tèn nim mu yiba mu bɔ̃ɔ saramɔ. Kon bɛɛ nɔɔri nge mɛ bii mɛro u ra win bii bɔm kɛ̃ kpa u nùn sua u taaru swĩi u sɔ̃su. 13Mɛya kon maa bɛɛ nukuru yɛmiasia Yerusalɛmu mi, nge mɛ bii mɛro u ra win bii nukuru yɛmiasie. 14Sanam mɛ i ko i ye kpuro wa, bɛɛn gɔ̃ru ga koo dora, kpa bɛɛn dam mu wurama nge tom buruku yakasu. Nɛ, Yinni Gusunɔ, kon nɛn dam sɔ̃ɔsi nɛn sɔm kowobun sɔ̃, kpa nɛn yibɛrɛba bu nɛn mɔru wa. 15Wee, na sisi na wãa dɔ̃ɔ yara sɔɔ. Ma nɛn tabu kɛkɛba ba sãa nge woo guna. Na wee n nɛn mɔru kɔsia, kpa n tɔmbu sɛɛyasia ka dɔ̃ɔ yari. 16Domi dɔ̃ɔ ka takobiwa nɛ, Yinni Gusunɔ, kon ka tɔmbu kpuro siri. Tɔn dabira ta koo gbi dɔma te. 17- 18Be ba ra n tii dɛɛrasiamɔ ba n daamɔ dãa sɔ̃sɔ, ba n bũu sãamɔ mi, kpa ba n kurusɔ yaa dimɔ ka gunɔnu ka sere maa sese dabinu, be kpurowa kon kam koosia. Domi na ben kookoosu ka ben bwisikunu yɛ̃. Nɛ, Yinni Gusunɔwa na yeni gerua. Wee saa ya tura n ka bwesenu kpuro mɛnna. Ba koo na kpa bu nɛn yiiko wa. 19Kon nɛn dam yĩreru doke ben suunu sɔɔ. Kon de be ba yara nɛn siribun di bu da bu nɛn yiiko kpara Taasisiɔ, ka Puluɔ, ka Ludiɔ mi tɛn towoba wãa, ka Tubaliɔ ka Yafaniɔ ka sere mi n toma, mi ba ǹ nɛn gari nɔɔre, ba ǹ maa nɛn yiiko waare. 20Kpa bu ka bɛɛn mɛro bisibu wurama bwesenu kpuron min di nɛn guu dɛɛrarɔ Yerusalɛmuɔ, ba n yɔɔwa dumi wɔllɔ ka kɛkɛ be dumi gawe sɔɔ, ka amakɛɛba sɔɔ, ka kɛtɛkunun wɔllɔ, ka sere yooyoosun wɔllɔ. Ba koo ka bu nawa nge mɛ Isireliba ba ra kɛ̃nu doke gbɛ̃ɛ dɛɛranɔ bu ka man naawa nɛn sãa yerɔ. 21Kpa n yãku kowobu gɔsi ben suunu sɔɔ ka be ba koo Lefiban sɔmburu ko. Nɛ, Yinni Gusunɔwa na yeni gerua. 22Nge mɛ wɔn kpaaru ka tem kpam mɛ kon ko mu ko n wãa nɛn wuswaaɔ ka baadommaɔ, nge mɛya bɛɛn bweseru ka bɛɛn yĩsira ko n maa wãa sere ka baadommaɔ. 23Suru kpao baawure sɔɔ ka tɔ̃ɔ wɛ̃rarugiru baatere sɔɔ, baawure u ko n da nɛwa u yiira u man sã. Nɛ, Yinni Gusunɔwa na yeni gerua. 24Adama ba ko n da tɔn be ba man seesin gonu wawa nu kpĩ tɔɔwɔ. Domi kɔkɔ ni nu ko n bu dimɔ, nu ǹ gbimɔ. Dɔ̃ɔ wì sɔɔ ba ko n wãa, u ǹ maa gbimɔ. Mɛya ben gonu nu ǹ ko n waabu wã.

will be added

X\