Esai 65

1Yinni Gusunɔ u nɛɛ, na sɔɔru kpeerewa n ka nɛn tɔmbun kanaru mwa, adama ba ǹ man gãanu bikie. Na sɔɔru sãa n ka bu nɛn tii sɔ̃ɔsi, adama ba ǹ man kasu. Ma na nɛɛ, nɛ wee, baa mɛ ba ǹ man soka. 2Na tɔn be ba ra n man seesimɔ nɔma gãri saa kpuro. Tɔn be, swaa kɔ̃sa sɔɔra ba ra n sĩimɔ, kpa ba n ben tii tiin bwisikunu swĩi. 3Ba ra n nɛn mɔru seeyamɔwa kiri kiri. Domi ba ra n bũu yãkunu mɔ̀wa dãa konɔ, ba n turare dɔ̃ɔ dokemɔ yãku yenun wɔllɔ ni ba kua ka biriki. 4Kpa ba n bikiaru daamɔ sikaɔ, ba n wãa mi wɔ̃kuru kpuro. Ba ra n kurusɔ yaa dimɔ ka maa dĩa sesenuginu ganu, 5kpa ba n sere gabu sɔ̃ɔmɔ ba n mɔ̀, bu gɛsiro bu ku bu susi, domi ba dɛɛre. Adama nà n yeniba kpuro wa nɛn mɔru ra sewa nge dɔ̃ɔ wi u ku ra gbi. 6Bɛɛ nɛn tɔmbu, wee ye na gɔ̃ru doke n ko tɛ̃. Na ǹ marimɔ. Kon dewa i bɛɛn kɔ̃san are kpuro sɔbe. 7Kon de i bɛɛn durum sɔbe ka maa bɛɛn sikadobagia, be, be ba man torari ba bũnu turare dɔ̃ɔ dokea guunu wɔllɔ. Kon bɛɛ bɛɛn kookoo si i kuan are kɔsia. 8- 10Ì n resɛm swaaru wa te ta nim mɔ, i ra nɛɛwa, bu ye derio mi, bu ku ye sanku, domi ya koo tam gem ko. Nge mɛya kon ka Isireliba ka Yudaban sukum ko, be ba gɔ̃ru gɔsia ba man kasu. Kon bu gɔsi bu ko nɛn sɔm kowobu, kpa n bu domaru kua bu marura, kpa bu tem mɛ tubi di mi guunu wãa, bu ben wãa yenu ko mi. Kpa Saronin wɔwa yu ko ben yaa sabenun kpara yeru, kpa Akɔɔn wɔwa yu ko nin sɔri yeru. 11Adama kon na n bɛɛ deema bɛɛ be i nɛ, Yinni Gusunɔ deri, ma i nɛn sãa yee dɛɛra te duari te ta wãa guuru wɔllɔ, i da i dimɔ bũu wi ba mɔ̀ Gadin nuurɔ, ma i bɛɛn nɔri tam yibiamɔ bũu wi ba mɔ̀ Mɛnin sɔ̃. 12Wee na ka takobi sisi. Kon de i yiira kpa bu bɛɛ sakiri, domi na bɛɛ soka, adama i ǹ man wurari. Na ka bɛɛ gari kua, ma i ǹ man swaa daki. I kua ye ya ǹ wã nɛn nɔni sɔɔ. Ma i swaa gɔsa ye nɛn gɔ̃ru ga ǹ kĩ. 13Yen sɔ̃na na nɛɛ, nɛn sɔm kowobu ba koo wa bu di kpa bu nɔ. Adama bɛɛ, gɔ̃ɔru ka nim nɔru sɔɔra i ko i n wãa. Nɛn sɔm kowobu ba koo nuku dobu ko. Adama bɛɛ, i ko n wãawa sekuru sɔɔ. 14Wee, nɛn sɔm kowo be, ba koo womusu ko ka nuku dobu. Adama bɛɛ, i ko kuuki kowa nuku sankiranun sɔ̃, kpa i n weeweenu mɔ̀. 15- 16Bɛɛn gɔɔn biru, bɛɛn yĩsa nɛn sɔm kowobu ba ko n da ka gabu bɔ̃rusi, bu nɛɛ, Yinni Gusunɔ u de a gbi nge waanɛ kasa. Adama yĩsiru gara ba koo ka tɔmbu domaru kua. Ba koo tu kowa ka nɛ, Yinni Gusunɔn yĩsiru, nɛ wi na sãa gemgii. Bà n maa bɔ̃rumɔ bu ka ben gari sire, ka nɛn yĩsi tera ba koo ka bɔ̃re. 17Domi Yinni Gusunɔ u nɛɛ, wee kon tem kpam ka wɔn kpaaru ko. Ba ǹ maa yaayamɔ ye ya raa koora yellu. Tɔmba kun maa ye bwisikumɔ. 18I yɛ̃ɛrio, kpa i n wãa nuku dobu sɔɔ sere ka baadommaɔ ye kon taka kon sɔ̃. Wee, na Yerusalɛmu kpaa banimɔ yè sɔɔ nuku dobu ko n wãa, kpa yen tɔmbu bu yɛ̃ɛri. 19Nɛn tii kon yɛ̃ɛri Yerusalɛmu yen sɔ̃ ka nɛn tɔmbun sɔ̃. Ba ǹ maa wuri ka weeweenu nɔɔmɔ mi. 20Biin gɔɔ kun ko n maa wãa mi, ǹ kun mɛ durɔ tɔkɔ wi u kun win wãarun tɔ̃ru yiba. Wi u wɔ̃ɔ wunɔbu (100) tura u ka gu, ba koo nùn garisiwa aluwaasi. Wi u maa gu u ǹ wɔ̃ɔ wunɔbu (100) ye tura, ba koo nɛɛwa, na yɛ̃ro bɔ̃rusi. 21- 22Ba koo dia bani ba n wãa ye sɔɔ. Goo kun diru banimɔ u kun wure te sɔɔ u sere gbi. Ba koo resɛm dãa duure kpa bu yen marum di. Goo kun dãa duurumɔ u kun yen marum di u sere gbi. Domi nɛn tɔn be na gɔsan wãaru ta koo dɛnya nge dãrugiru, kpa bu ben nɔman sɔmburun are di. 23Ba ǹ koo sɔmburu ko kam. Ben biba kun maa gbimɔ, domi be ka ben bibu, ba sãawa bwese te nɛ, Yinni Gusunɔ na domaru kua. 24Bu sere kanaru ko bu kpe, ko na n da bu wisiwa. 25Saa ye sɔɔ, purukanu ka yãanu koo yakasu di yam tem. Mɛya gbee sinansu koo maa yakasu di nge kɛtɛba, kpa waa ya kun maa gɔbu. Kɔ̃sa gaa, ǹ kun mɛ asɔrɔ gaa kun ko n maa wãa Siɔniɔ nɛn guu dɛɛra ten wɔllɔ. Nɛ, Yinni Gusunɔwa na gerua mɛ.

will be added

X\