Esai 64

1Kaa n sãa nge dɔ̃ɔ wi u dãa gbeba mwaamɔ, ǹ kun mɛ wi u nim gbisisiamɔ, kpa wunɛn yibɛrɛba bu gia nge mɛ a sãa, kpa bu diiri wunɛn wuswaaɔ. 2Yinni Gusunɔ, sanam mɛ a sarama a maamaaki kua ye sa ǹ ka yĩiyɔ, guunu diira bɛrum sɔ̃. 3Sa ǹ gasɔ goon gari nɔɔre. Wunɛ baasi, sa ǹ maa goo waare wi u yen bweseru kua win tɔn be ba nùn naanɛ sãan sɔ̃. 4Wi u gem swĩi ka nuku dobu, ka sere be ba wunɛn wooda yaaye, ba sĩimɔ ye sɔɔ, bera a ra swaa gbiiye. Adama a ka sun mɔru kua yèn sɔ̃ sa durum kua. Ka mɛ, sa ra n durum ye mɔ̀wa sa n dɔɔ saa yellun di. 5Sa kua nge disigibu, ma bɛsɛn daa gea ya sãa nge yãa disinuginu. Sa gbere nge wurusu, ma bɛsɛn durum ka sun doonɔ nge woo. 6Goo sari wi u wunɛn somiru kasu. Goo maa sari wi u ra nun kanɛ bururu, domi a sun wunɛn wuswaa berua, ma a sun deri sa gɔɔ dɔɔ bɛsɛn durum sɔ̃. 7Ka yen de, Yinni, wuna a sãa bɛsɛn baaba. Sa sãawa nge sɔndu, wuna a sun mɔma ka wunɛn nɔma. 8Yinni Gusunɔ, a ku mɔru ko too, a kun maa bɛsɛn durum ye yaaye sere ka baadommaɔ. Adama a n yɛ̃ ma sa sãawa wunɛn tɔmbu. 9Wee wunɛn wuu si a gɔsa su kua bansu. Yerusalɛmu ya wɔruka. 10Bɛsɛn sãa yee bura dɛɛra te, mi bɛsɛn sikadoba ba ra raa nun sã, ta dɔ̃ɔ mwaara. Gãa gee ni sa maa mɔ kpuro, nu kam kua. 11Kaa n yeniba kpuro mɛɛrawa a n nɔɔ maari, kpa bɛsɛn nuki yi sankira n banda?

will be added

X\