Esai 63

1Wara u wee Botisiran di ye ya wãa Edɔmun temɔ, u yabe swãaru sebua kom kom. Ma u sĩimɔ ka win dam kpuro, ka toro sindu. Yinni Gusunɔ u nɛɛ, nɛna na wee n ka siri dee dee. Na dam mɔ n ka nɛn tɔmbu faaba ko. 2Mban sɔ̃na wunɛn yãnu nu sɔ̃ri nge wi u resɛm gamamɔ. 3U wisa u nɛɛ, nɛ turowa na da na tɔmbu taaka nge resɛm. Bwesenu kpuro sɔɔ, baa tɔn turo u ǹ nɛ u man somi. Na bu taaka na kɔsuka ka mɔru, sere ben yɛm mu nɛn yãnu wisi nu disinu kua. 4Domi na gɔ̃ru doke n ka mɔru kɔsia. Tɔ̃ra maa tura n ka nɛn tɔmbu yakia. 5Na mɛɛra mɛɛra na biti soora. Na ǹ wa wi u koo man somi. Goo sari wi u koo man dam kɛ̃. Adama nɛn mɔru ya man dam sosia na ka nasara wa. 6Wee, na tɔmbu taaka ka mɔru. Ba burisina nge tam nɔrobu nɛn mɔrun sɔ̃. Ma na ben yɛm yari temɔ. 7Kon Yinni Gusunɔn durom mɛ u sun kua kpara, kpa n nùn tɔma ye u sun kuan sɔ̃. Kon win tɔn geerun gari gere te u bɛsɛ Isireliba sɔ̃ɔsi win wɔnwɔndu ka win kĩi bakarun saabu. 8U bwisika u nɛɛ, sa sãawa win tɔmbu, sa ǹ nùn tɔnu kandu kuammɛ. Yen sɔ̃na u sun faaba kua. 9Bɛsɛn wahala kpuro sɔɔ, u sun somi. N ǹ mɔ win gɔrado u sun faaba kua, win tiiwa u sun yakia win kĩru ka win wɔnwɔndun sɔ̃. Ma u sun nɔɔri saa yellun di. 10Adama sa nùn seesi sa win Hunde nuki sanka. Yen sɔ̃na u kua bɛsɛn yibɛrɛ ma u ka sun tabu kua. 11Ma sa Mɔwisin waati yaaya sa nɛɛ, mana Yinni Gusunɔ u wãa wi u ka bɛsɛ ka bɛsɛn wirugibu nim wɔ̃ku tɔbura. Mana u wãa, wi u dera win Hunde Dɛɛro u wãa bɛsɛn suunu sɔɔ. 12Ma u Mɔwisi kpara ka win dam bakam. U nim burana bɛsɛn wuswaaɔ u n ka yĩsi bɛɛrɛgiru yara sere ka baadommaɔ. 13U sun kpara nim bweru sɔɔ. Ma sa sĩa gbaburɔ nge dumi yi yi duki mɔ̀, sa ǹ sokure. 14Win Hunde u ka sun da sa wɛ̃ra nge mɛ yãa kparo u ra ka win yaa sabenu de wɔwaɔ. Nge mɛya u sun kpara u ka yĩsi bɛɛrɛgiru yara. 15Yinni Gusunɔ, a mɛɛrima saa wɔllun di mi wunɛn wãa yee dɛɛraru ka yiikogira wãa, kpa a wa ye ya sun mɔ̀. Mana wunɛn hania ka wunɛn dam mu wãa. Wee a sun wunɛn kĩru ka wunɛn wɔnwɔndu wunari. 16Adama wuna a sãa bɛsɛn baaba. Bɛsɛn yĩiyɔbu kun maa wãa bɛsɛn sikadoba sɔɔ. Baa Aburahamu ka Isireli bà kun sun wure, Yinni Gusunɔ, wuna a sãa bɛsɛn baaba, wunɛ wi a sun faaba kua saa yellun di. 17Yinni Gusunɔ, mban sɔ̃na a dera sa ka wunɛn swɛɛ tonda, ma bɛsɛn gɔ̃rusu bɔbia, sa ǹ maa nun nasie. A wurama bɛsɛn kĩrun sɔ̃ bɛsɛ be sa nun sãamɔ. Sa sãawa wunɛgibu saa yellun di. 18Wee, saa fiiko tɔnawa bɛsɛ wunɛn tɔn be a gɔsa, sa sina tem mɛ sɔɔ. Ma bɛsɛn yibɛrɛba ba wunɛn sãa yeru wɔri ba kɔsuka. 19Wee ya tɛ, mìn di sa sãa nge be a ǹ kpare, ka be ba ǹ wunɛn yĩsiru sɔɔwa. Yinni Gusunɔ, sa nun mara a wɔllu gĩa kpa a sarama. À n tunuma, guunu nu koo diiri bɛrum sɔ̃.

will be added

X\