Esai 62

1Yinni Gusunɔ u nɛɛ, wunɛ Yerusalɛmu, wunɛn kĩrun sɔ̃ na ǹ marimɔ. Na ǹ maa wɛ̃ramɔ sere n ka nun faaba ko, kpa yu sɔ̃ɔsira nge bururun sɔ̃ɔ, ǹ kun mɛ, nge wii bɔn te ta dɔ̃ɔ yabure, 2kpa bwesenu kpuro nu wa ma na nun faaba kua, kpa sinambu ba n wunɛn yiiko mɛɛra. Yĩsi kpaara ba koo ka nun soku te nɛ, Yinni Gusunɔ kon nun kɛ̃. 3Kpa a n sãa nge furɔ bɛɛrɛguu ge ga ballimɔ nɛ, Gusunɔ wunɛn Yinnin nɔma sɔɔ. 4Ba ǹ maa nun sokumɔ wuu ge na deri. Ba koo nun sokuwa nɛ, Yinni Gusunɔn nuku dobu. Domi wunɛ sɔɔra nɛn nuku dobu wãa. Ba ǹ maa wunɛn tem sokumɔ bansu. Ba koo mu sokuwa kurɔ kpao, domi kon mu durɔ kɛ̃. 5Nge mɛ bii durɔbu ga koo ka gen kurɔ gbinna, nge mɛya wunɛn bibu ba koo ka nun gbinna. Nge mɛ aluwaasi u ra n nuku dobu mɔ win kurɔ kɛ̃ɛron sɔ̃, nge mɛya ko na n nuku dobu mɔ wunɛn sɔ̃. 6Wunɛ Yerusalɛmu, na dera gaba sãa nge wuu kɔ̃sobu be ba ra n yɔ̃ gbãraru wɔllɔ, ba ǹ nɔɔ marimɔ sɔ̃ɔ sɔɔ ka wɔ̃kuru. Bɛɛ wuu kɔ̃sobu, bɛɛ be i nɛ, Yinni Gusunɔ Yerusalɛmun gari yaayasiamɔ, i ku wɛ̃ra. 7I ku de n wɛ̃ra sere n ka Yerusalɛmu swĩi, kpa ya n bɛɛrɛ mɔ handunia sɔɔ. 8Nɛ, Yinni Gusunɔ, na bɔ̃rua ka nɛn dam, na nɛɛ, na ǹ maa wunɛn alikama yibɛrɛba wɛ̃ɛmɔ bu di. Mɛya sɔbu ba ǹ maa wunɛn tam nɔrumɔ, mɛ mu sãa wunɛn sɔmburun are. 9Adama be ba alikama gã ba koo ye di, kpa bu nɛ, Yinni Gusunɔ siara. Be ba maa ben resɛmba sɔra ba koo yen tam nɔ nɛ, Yinni Gusunɔn sãa yerɔ. 10Bɛɛ Yerusalɛmugibu, i yario saa wuun di, i bɛɛn tɔn be ba wee swaa sɔnwa, i yen kpenu wuna i nɔɔ nɛrasia. I gidi bɔra yɔ̃rasio ben bera gia. 11Wee ye nɛ, Yinni Gusunɔ, na handunian tɔmbu kpuro sɔ̃ɔmɔ. Na nɛɛ, i Yerusalɛmugibu sɔ̃ɔwɔ i nɛɛ, wee, nɛ, ben faaba kowo, na sisi ka ben tɔn be ba raa yoru mwɛɛra. 12Ba koo bu soku bwese te na gɔsa na yakia. Wunɛ maa Yerusalɛmu, ba ǹ maa nun sokumɔ wuu ge na deri. Ba koo nun sokuwa wuu ge na kĩ.

will be added

X\