Esai 61

1Yinni Gusunɔn Hunde u ka man wãa. Domi wiya u man gɔsa n ka dam sarirugibu labaari gea nɔɔsia, kpa n be ba nuki sankire nukuru yɛmiasia, kpa n yobu sɔ̃ ma ba koo bu yakia, kpa n maa pirisɔmba sɔ̃ ma ba koo bu kara. 2N kpara saa ye Yinni Gusunɔ u koo tɔmbu durom kua, n gere saa ye u koo win yibɛrɛba mɔru kɔsie, kpa n maa be ba gɔɔ sɔ̃ kpuro nukuru yɛmiasia. 3Ba gɔɔ sɔ̃ Siɔnin sɔ̃. Adama Gusunɔ u man gɔsa n ka ben nuku sankiranu gɔsia nuku dobu. Ba ǹ maa torom wisimɔ wirɔ, dawani bura ba koo bɔke. Ben wuswaa kun maa burisinamɔ, ya ko n sãawa nge be ba gum nubu durorugim sawagia. Ba koo ben yãa wɔnwɔnduginu pota bu tɔ̃ɔ baka yãnu sebe. Saa ye sɔɔra ba ko n sãa nge dãa ni nu Gusunɔn bɛɛrɛ sɔ̃ɔsimɔ, ǹ kun mɛ nge gbee te ta win yiiko sɔ̃ɔsimɔ. 4Ba koo ban gurusu seeya, kpa bu wuu si ba raa kɔsuka yellu sɔmɛ. 5Bɛɛ Isireliba, sɔba koo na bɛɛn mi, bu bɛɛn yaa sabenu kpara, kpa bu maa bɛɛ gbee sɔma kua. 6Adama ba koo bɛɛn tii sokuwa Yinni Gusunɔn yãku kowobu ka win sɔm kowobu. I ko bwese tukunun arumani gura, kpa i n ka woo kanamɔ. 7Yinni Gusunɔ u nɛɛ, ba bɛɛ sekuru doke ta kpã. Tɔmba bɛɛ yãatam siemɔ, yen sɔ̃na seku ten ayerɔ i ko n baa mɔ n kpã tɔn ben temɔ, kpa i n wãa nuku dobu sɔɔ bi bu ǹ kpeemɔ. 8Wi, Yinni Gusunɔ, gema u ra kã. U dam dɔrebu ka kom kɔ̃sum tusa. U koo win tɔmbu ben are wɛ̃ dee dee, kpa u ka bu arukawani bɔke ye ya ko n wãa sere ka baadommaɔ. 9Bwesenu kpuro nu koo be ka ben bibun bweserun gari nɔ, kpa be ba bu wa kpuro bu gia ma wiya u bu domaru kua. 10Yinni Gusunɔ sɔɔra Yerusalɛmu koo nuku dobu ko, kpa yen gɔ̃ru ga n do win sɔ̃. Domi wiya u ye faaba kua u ye gem wɛ̃. Ma win faaba ye ka win gem mɛ, mu sãa nge bura yãa ni kurɔ kpao ka win durɔ ba doke. 11Nge mɛ tem mu ra de dĩa bweseru tu kpi, nge mɛya Yinni Gusunɔ u koo win tɔmbu faaba ko u bu bɛɛrɛ wɛ̃, kpa bwesenu kpuro nu ye wa.

will be added

X\