Esai 60

1Yerusalɛmu, a seewo kpa a n ballimɔ, domi yam bururam mu nun naawa. Nɛ, Yinni Gusunɔn yiiko ya nun wukiri. 2Wee yam wɔ̃kura tem ka tɔn tukobu wukiri. Adama wunɛ, nɛn yiiko ya nun yam bururasie nge sɔ̃ɔ. 3Bwesenu ka nin sinambu ba koo na bu sĩ yam bururam mɛ sɔɔ. 4A mɛɛrio a ka sikerena. Be kpuro ba mɛnnama ba sisi wunɛn mi. Ba ka wunɛn bibu wee tontonden di, ba wɔndiaba bɛɛwa. 5À n bu wa ba wee, kaa nuku dobu ko. Wunɛn gɔ̃ru ga koo dora sanam mɛ bwesenu nu koo ka nun arumani naawa saa nim wɔ̃kun guru giɔn di. 6Ba koo nawa ka yooyoo dabi dabiru Madianin di ka Efan di. Gaba koo maa na Seban di, ba n wura ka turare sɔɔwa, kpa ba n nɛ, Yinni Gusunɔ tɔmamɔ. 7Ba koo nun Kedaan yaa sabenu mɛnnama, kpa bu ka nun Nɛbayɔtun yãa kinɛnu naawa a ka nu yãkuru ko ni nu koo man wɛ̃re, kpa n nɛn sãa yeru bɛɛrɛ sosi n kere yellu. 8Mba n wee mɛ, nge guru wii wuroru, ǹ kun mɛ nge totobɛrɛ ni nu wee nin dirɔ. 9Wunɛn biba ba wee tem mi n toman di. Goo nimkuu bakasa su gbia su ka bu sisi tontonden di, ka ben sii geesu ka wura bu ka man bɛɛrɛ wɛ̃, nɛ, wunɛn Yinni Dɛɛro, nɛ wi na nun wɔlle sua. 10Tɔn tukoba koo wunɛn gani seeya, kpa ben sinambu bu ko wunɛn yobu bu nun sã. Yellu, na raa nun sɛɛyasia ka mɔru, adama tɛ̃, nɛn durom sɔ̃, na wunɛn wɔnwɔndu wa. 11Yerusalɛmu, wunɛn gbãrarun gamboba ba ko n kɛniarewa baadomma. Ba ǹ bu kɛnumɔ sɔ̃ɔ sɔɔ ka wɔ̃kuru, kpa bwesenu ka nin sinambu bu ka du bu nun dukia wɛ̃. 12Domi bwese ni nu yina nu nun sã mi, nu koo gbiwa. Ba koo ni kpuro kpeerasiawa. 13Libanin bɛɛrɛ ya koo kpe, domi ba koo ka nun yen dãa gea naawa ye ba mɔ̀ sipɛrɛ ka oromu ka buyi, kpa bu ka nɛn sãa yeru buraru kua, kpa n nɛn wãa yeru bɛɛrɛ wɛ̃. 14Be ba raa nun dam dɔremɔ mi, ben biba koo na wunɛn wuswaaɔ bu tii kawa. Be ba raa maa nun yaakoru mɔ̀, ba koo yiira wunɛn wuswaaɔ bu nun sã, kpa bu nun soku Siɔni, Isireliban Yinni Dɛɛron wuu. 15Wunɛ wi tɔmbu ba raa tusa ba deri, ba ku ra maa nɛ wunɛn mi, kon nun ko wuu burɔ sere ka baadommaɔ, kpa a n wunɛn tɔmbu nuku dobu wɛ̃ɛmɔ sere ka ben bibun bibɔ. 16Bwese tukunu ka nin sinambu ba koo nun nɔɔri nge mɛ bii mɛro u ra win bii bɔm kɛ̃, kpa a gia ma nɛna na sãa Gusunɔ Yakɔbun Yinni damgii wi u nun yakia ma u nun faaba mɔ̀. 17Kon de wura yu koora mi sii ganda raa wãa, sii geesu maa mi sii wɔ̃kusu raa wãa. Kon dãa wuna n sii gandu kɔsire ko, kpa n kpenu wuna n sisu kɔsire ko. Kpa n de bu nun kpara gem ka bɔri yɛndu sɔɔ. 18Saa ye sɔɔ, ba ǹ maa sannɔsun damu nɔɔmɔ wunɛn temɔ. Mɛya ba ǹ maa mu wɔrimɔ bu mɛn yãnu gura kpa bu mu deri bansu. Domi kon nun kɔ̃su nge gbãraru, kpa a man siara nɛn faaban sɔ̃. 19N ǹ maa sɔ̃ɔ u koo nun yam bururasia sɔ̃ɔ sɔɔ. N ǹ maa suru u koo nun yam dɛɛrasia wɔ̃kuru. Adama nɛ, Yinni Gusunɔwa ko na n nun yam bururasie sere ka baadommaɔ, kpa a bɛɛrɛ wa nɛn sɔ̃. 20Wunɛn nuku sankiranu kpuro nu koo doona. Domi nɛ, Yinni Gusunɔwa ko na n nun yam bururasie sere ka baadommaɔ. Sɔ̃ɔ u ra du, suru ra maa wɔ̃kuru ko, adama nɛn yam bururam mɛ, mu ku ra kpe. 21Wunɛn tɔmbu kpuro ba ko n sãawa gemgibu, kpa ba n tem mɛ mɔ sere ka baadommaɔ. Na bu girawa nge dãa kãasa. Ba sãawa be na taka kua bu ka nɛn kpãaru sɔ̃ɔsi. 22Bwese kɛra ye ya piiburu bo, ya koo ko bwese baka damgirun nuuru. Nɛ, Yinni Gusunɔwa kon ye ko fuuku yen saa yà n tura.

will be added

X\