1 Wɔ̃ɔ gè sɔɔ sina boko Osiasi u gu, nɛ Esai, na Yinni Gusunɔ wa kãsiru sɔɔ, u sɔ̃ sina kita bakaru garun wɔllɔ win sãa yerɔ. Ma win yaberun kasa ya sure sãa yee ten sɔɔwɔ kpuro. 2 Wɔllun kɔ̃sobu ba bɛllimɔ win wɔllɔ. Ben baawure, kasa nɔɔba tia u mɔ. U ka yen yiru win wuswaa wukiri, yiru maa win naasu ma u ka yiru ye ya tie yɔ̃ɔwa. 3 Ba nɔɔgiru sue ba mɔ̀, Dɛɛro Dɛɛro, Gusunɔ wɔllu ka tem Yinni u sãawa Dɛɛro. Win yiiko ya handunia kpuro yiba. 4 Ma sãa yee ten gamboba ba diira saa ben tem di, nɔɔ ge ga nɔɔramɔ min sɔ̃, ma wiisu su yiba dii te sɔɔ. 5 Saa ye sɔɔra na nɔɔgiru sua na nɛɛ, na kam kuawa. Domi nɛn yara ya durum sɔɔwa, na maa wãa tɔmbun suunu sɔɔ bèn yari durum sɔɔwa ma na sere Gusunɔ, wɔllu ka tem Yinni wa ka nɔni wi u sãa kpuron sunɔ. 6 Adama wɔllun kɔ̃so ben turo u dɔ̃ɔ gɛ̃ɛ sua ka baku yãku yerun di, u yɔ̃ɔma u na nɛn mi. 7 Ma u ka yi nɛn nɔɔ baba ma u nɛɛ, yeni ya wunɛn nɔɔ baba ya sɔ̃ɔsi ma Gusunɔ u wunɛn toraru wuna. Mɛya u maa wunɛn durum wɔka. 8 Yen biruwa na Yinni Gusunɔn tiin nɔɔ nua ga gerumɔ ga mɔ̀, wara kon wa n gɔri. Wara koo se u man daawa. Ma na wisa na nɛɛ, nɛ wee, a man gɔrio. 9 Ma u man sɔ̃ɔwa u nɛɛ, ǹ n mɛn na, n doo n Isireliba gari yini sɔ̃ n nɛɛ, wee ba ko n da kasu bu win gari nɔ, adama ba ǹ yi nɔɔmɔ. Ba ko n da kasu bu wa, adama ba ǹ gãanu wasi. 10 N de tɔn ben gɔ̃ru gu bɔbia, kpa bu swaa taaya bu ku raa gari nɔ. N ben nɔni wɔ̃kuo bu ku raa ka yam wa, kpa bu ku raa gɔ̃ru gɔsia bu faaba wa. 11 Ma na nɛɛ, Yinni, sere saa yerà ya ko n sãa mɛ. Ma u man wisa u nɛɛ, sere wuu sinin tɔmbu bà n gbisuka, kpa su ko bansu, kpa tem mɛ kpuro mu kam ko. 12 Domi u koo de bu ka mɛn tɔmbu da sere mi n toma kpa bu mɛ deri mu n sãa bansu. 13 Baa bà n tem mɛn tɔmbu bɔnu kua suba wɔkuru, ma ten teera tie mi, u koo tu surawa nge dãa bakaru. Adama nge mɛ dãa kpiriru ta ra kpare, nge mɛya bwese kpaara koo se ta n sãa bwese geeru te u gɔsa.
