1 I tamaa Gusunɔ kun dam mɔwa u ka bɛɛ faaba ko? I tamaa u ǹ swaa mɔ u ka bɛɛn gari nɔ? 2 Aawo, n ǹ mɛ. I n yɛ̃ ma bɛɛn tiin durum sɔ̃na i karanɛ ka wi. Bɛɛn toranun sɔ̃na u bɛɛ biru kisi, ma ya dera u ǹ maa bɛɛn gere swaa daki. 3 Bɛɛn nɔma ya yɛm yiba, domi i tɔmbu go. Weesu ka gari kɔ̃siya yi yarimɔ bɛɛn nɔsun di. 4 Weesa i ra n ka bɛɛn berusebu siribu sokumɔ. Bɛɛn goo ku ra ka gem siribu de. Seeda weesugia sɔɔra i ra n tãsa siri yeru mi. Kɔ̃sa i ra bwisiku kpa i kom kɔ̃sum ko. 5 Bɛɛn himba ya sãawa gãa kɔ̃sunu nge waan sɛ̃a. Bà n ye kɔra, surɔkɔra ta ra yande yari min di. Wi u ye di u ko n gbimɔwa. Bɛɛn bwisikunu nu sãawa nge naran wɛ̃ɛ yi ya tarimɔ. N ǹ mɔ yi wãa yi ka gãa geenu ko, nge bekuru te tɔnu koo wukiri, ma n kun mɔ yi ka gãanu yina mwa. Nge mɛya bɛɛn nɔma ya sãa, ya wãawa yu ka kɔ̃sa ko. 7 I ra n sɛndewa i ka kɔ̃sa ko, kpa i n naasu sãu i ka tɔnun yɛm yari kam. I ra n bwisikumɔwa i ka tɔmbu kɔ̃sa kua, kpa i n tɔmbu dam dɔremɔ i n ben yãnu guramɔ mi i dua kpuro. 8 I ǹ alafian swaa yɛ̃. Bɛɛn sanu sanusu ku ra maa gem swĩi, sere swɛɛ yi yi ǹ dɛnde. Wi u gesi bɛɛn swɛɛ yi mwa kpuro, u ku ra bɔri yɛndu wa. 9 Isireliba ba nɛɛ, bɛsɛn toranun sɔ̃na wunɛ Yinni Gusunɔn faaba ya tɛɛmɔ yèn nɔɔ mwɛɛru a sun kua. Sa yam bururam mara, adama yam wɔ̃kuru sɔɔra sa sĩimɔ ka tɛ̃. Sa mara sɔ̃ɔ u yari, adama yam mu tĩriwa sere ka gisɔ. 10 Sa sĩimɔ sa bãarimɔ nge wɔ̃ko wi u gana babi. Ma sa sokikiramɔ sɔ̃ɔ sɔɔ nge wi u wãa yam wɔ̃kuru sɔɔ. Baa mɛ sa bwãa do, bɛsɛ ka gonu sa kua tia. 11 Sa gbãramɔ nge yaa gɔba, ma sa sumɔ nge kparukonu. Yinni Gusunɔ, sa mara a sun yakia, adama wunɛn faaba ya ka sun tonda. N ǹ koore su ye wa. 12 Domi bɛsɛn toranu kpɛ̃a wunɛn wuswaaɔ, ma bɛsɛn durum ya bɛsɛn daa sɔ̃ɔsimɔ. Sa bɛsɛn toranu yɛ̃ ni nu sun wãasi. 13 Sa kua taarɛgibu ka naanɛ sarirugibu wunɛ Yinni Gusunɔn mi. Sa nun deri wunɛ wi a sãa bɛsɛn Yinni, ma sa nun seesi, sa tɔmbu dam dɔre. Bwisiku weesugina nu ra n yiba bɛsɛn gɔ̃rusɔ. 14 Yera n dera gem kun ka maa wãa bɛsɛn suunu sɔɔ, ma faaba ya ka sun tonda. Gem mu ku ra maa sɔ̃ɔsire mi tɔmba mɛnnɛ. Sa ra mu tɛɛsiwa. 15 Gem mu kpa. Wi u maa kɔ̃sa suurimɔ ba ra nùn wɔriwa bu win yãnu gura. 16 Ma u biti kua, yèn sɔ̃ goo kun yen gari mɔ̀. Yen sɔ̃na win tii u gɔ̃ru doke u win dam sɔ̃ɔsi. Ma u tãsa win gem sɔɔ, 17 u mu sebua nge tarakpe, ma u faaba doke wirɔ nge sii furɔ kɔkɔru. U mɔru kɔsiabu sebua nge yaberu, ma u tii nisinu wukiri nge gurumusuru. 18 U koo baawure siri nge mɛ̀n nɔɔ win kookoosu nɛ, kpa u ka win yibɛrɛba mɔru ko, baa be ba ka nùn toma, 19 kpa bu win yĩsiru nasia kpa win yiiko yu sɔ̃ɔsira saa sɔ̃ɔ yari yerun di n ka da sɔ̃ɔ duu yerɔ. Sanam mɛ yibɛrɛba ba koo na nge daa bakarun nim, Yinni Gusunɔn Hunde u koo bu gira bu doona. 20 Faaba kowo u koo na Yerusalɛmun sɔ̃, ka sere maa Isireliba be ba gɔ̃ru gɔsian sɔ̃. Yinni Gusunɔwa u yeni gerua. 21 U maa nɛɛ, win arukawani wee, ye u ka bu bɔkumɔ. Win Hunde u ko n wãawa be sɔɔ, kpa u win gari doke ben nɔsɔ. Yin gɛɛ kun doonɔ ben nɔsun di, sere n ka da ben bibun bibun nɔsɔ, saa tɛ̃n di sere ka baadommaɔ. Wi, Yinni Gusunɔwa u yeni gerua.
