Esai 58

1Yinni Gusunɔ u nɛɛ, a nɔɔgiru suo ka dam nge mɛ kaa kpĩ, kpa wunɛn nɔɔ gu nɔɔra nge kɔba. A nɛn tɔmbu Yakɔbun bweseru sɔ̃ɔwɔ ma ba durum kua. 2Tɔ̃ɔ baatere ba ra n man sokuwa ba n kĩ bu gia ye na kĩ bu ko. Ba mɔ̀ nge tɔn be ba gem swĩi, be ba ǹ nɛn woodaba deri. Ba ra man kanɛ n bu siria dee dee, kpa ba n kĩ ba n ka man wãa. 3Adama ba ra nɛɛ, mban sɔ̃na ba koo maa nɔɔ bɔke, domi na ǹ bu mɛɛra. Mban sɔ̃na ba tii wahala mɔ̀, domi na bu atafiiru sãa. Kpa n bu wisi n nɛɛ, baa ì n nɔɔ bɔkumɔ, bɛɛn tiin kĩra i ra n mɔ̀, kpa i n bɛɛn sɔm kowobu dam dɔremɔ. 4I ra n sikirinamɔwa i n sankinamɔ, kpa i n nɔm kusenu soonamɔ ka nuku kɔ̃suru. Ì n nɔɔ bɔkumɔ ma i mɔ̀ mɛ, nɛ, Gusunɔ na ǹ bɛɛn gari nɔɔmɔ. 5Nɔɔ bɔku te na kĩ, teya mi? I winu sikamɔ nge yakasu, ma i saakiba sebua i tii torom wisimɔ. Adama i tii kawewa mi ka gem? Nɔɔ bɔku ten bwesera kun man wɛ̃remɔ. 6Wee nɔɔ bɔku te na kĩ. Be i bɔkua nuku kɔ̃surun sɔ̃, i bu yɔ̃suo. Be i raa dam dɔremɔ, i de bu doona. Kpa be ba yoru dimɔ bɛɛn mi, bu kara. 7I bɛɛn dĩanu bɔnu koowo ka wi u kun mɔ u di, kpa i be ba kun wãa yeru mɔ nɛnɛ bɛɛn yɛnuɔ. Ì n goo wa u sĩimɔ tereru, i nùn yãnu wɛ̃ɛyɔ u sebe, kpa i ku maa bɛɛn winsim biru kisi. 8Saa yera nɛn durom mu koo bɛɛ naawa nge buruku sɔ̃ɔ, kpa mi i mɛɛra mɔ yu bɛkura fuuku. Mɛya maa gem mu ko n da n bɛɛ swaa gbiiye. Nɛ, Yinni Gusunɔ, na kon ka bɛɛ wãa na n bɛɛ kɔ̃su. 9Sanam mɛya ì n man soka, kon bɛɛ wisi n nɛɛ, nɛ wee. Ì n bɛɛn yobu kara, ma i murafitiru ka gari kɔ̃si deri, 10ì n gɔ̃ɔro dĩanu wɛ̃, ma i maa sãaro debia, saa yera i ko yari yam wɔ̃kurun di, kpa yam wɔ̃ku te, tu ko nge sɔ̃ɔ sɔɔ. 11Nɛ, Yinni Gusunɔ, kon bɛɛ kpara sere ka baadommaɔ, kpa n de i n deba baa mi dĩanu ku ra kpi. Kon de bɛɛn wasi yi dam wa, kpa i n sãa nge gbee te ta kakoru mɔ, ǹ kun mɛ nge bwii yìn nim ku ra kpe. 12Saa yera i ko bansu seeya si ba kɔ̃ n tɛ, kpa i maa bani kpɛɛkpɛɛku wɔllɔ ge ba swĩi saa yellun di. Sanam mɛya ba koo bɛɛ soku be ba ra bansu ka swɛɛ sɔmɛ, kpa bu de tɔmbu ba n wãa mi sɔɔ. 13Yinni Gusunɔ u nɛɛ, ì n tii nɛnua i kun sɔmburu kue, ma i bɛɛn tiin kĩru deri i ka tɔ̃ɔ wɛ̃rarugirun wooda mɛm nɔɔwa, ma i man bɛɛrɛ wɛ̃ i nɛn tɔ̃ɔ dɛɛra te garisi tɔ̃ɔ duroru, ma i kun gari bɛkɛ saare, 14saa yera i ko nuku dobu wa nɛn sãaru sɔɔ, kpa tɔmbu kpuro bu bɛɛ bɛɛrɛ wɛ̃, kpa n bɛɛ diisia tem mɛ sɔɔ, mɛ na bɛɛn sikado Yakɔbu wɛ̃. Nɛ, Yinni Gusunɔwa na yeni gerua.

will be added

X\