Esai 57

1Gemgibu bà n gu, goo ku ra bu weeweenu kue. Tɔn geobu bà n wɔruka, goo ku ra bwisiku ma tɔn kɔ̃soba ba bu sɛ̃re ba go. 2Adama tɔn geo be, ba ko n wɛ̃rewa gɔriɔ ka bɔri yɛndu. 3I susima bɛɛ, bwese te i ǹ ka nɛ, Gusunɔ turo yɔ̃, bɛɛ be i sãa nge sɔron bibu. 4Wara i yɛ̃ɛmɔ, wara i nɔɔ swiikinu koosimɔ. I ǹ yɛ̃ ma i sãawa bwese te ta ku ra mɛm nɔ, te ta ra weesu ko? 5Ma i bũu sãarun gari wɔra dãa koo bakaru baateren nuurɔ. Ma i ka bɛɛn bibu yãkunu mɔ̀ daanun goonɔ kpee baaba sɔɔ. 6Bɛɛ Isireliba, daa torin kpee goriya yi sãa bɛɛn bũnu. I ra yi yãkunu koosi kpa i yi tam wisi. I tamaa nɛ, Yinni Gusunɔ, kon ye tii marisiwa? 7Guunu wɔllɔwa i ra bɛɛn sãanu ko. Miya i ra maa yɔ i yãkunu ko. 8I bwãarokunu mani bɛɛn gamboban biruɔ, ma i ka bũnu arukawani bɔkua. Nu sãa nge durɔ tanɔ be i kĩ i ka kpuna. Ma i man biru kisi i bɛɛn yãnu potira, i bɛɛn kpin yenu yasum sosi. Wee i ben terenu mɛɛra. 9I tii gum sawa i da i bɛɛn bũu wi ba mɔ̀ Mɔlɔku deema. I tii turare yɛ̃ka mam mam ma i sɔmɔbu gɔra mi n toma. Wee, i wɔruma sere temɔ. 10I ka bɛɛn sirenabu wasire. Adama i ǹ bwisika i nɛɛ, bu ǹ arufaani gaa mɔ. Ma i mɔ̀, i dam tie, i ǹ wasire. 11Ǹ n mɛn na, waran bɛruma i mɔ, i ka man nɔni wɔ̃kumɔ. Waran bɛruma i mɔ, i ǹ ka man yaaye, i ǹ maa man garisi. Yèn sɔ̃ na nɔɔ maari saa tɛɛbun di, yen sɔ̃na i ǹ man nasie. 12Adama kon bɛɛ sɔ̃ɔsi ma bɛɛn kookoo si i raa tamaa su dee dee sãa mi, su ǹ bɛɛ arufaani gaa mɔ̀. 13Yen sɔ̃, ì n kuuki mɔ̀, ì n somiru kanamɔ, bɛɛn bũu dabi te, ta ǹ bɛɛ wɔramɔ. Kon dewa woo gu ka nu doona mam mam. Adama be ba man naanɛ sãa ba koo tem mɛ tubi di, kpa ba n wãa Siɔniɔ, guu te na gɔsan mi. 14Nɛ, Yinni Gusunɔ, na nɛɛ, i tii suo i swaa sɔmɛ. I gãa kɔ̃sunu kpuro wunɔ ni nu wãa nɛn tɔmbun swaa sɔɔ. 15Nɛ, Gusunɔ Wɔrukoo, nɛ wi na dɛɛre, na wãa wɔllɔ sere ka baadommaɔ, adama na maa wãa ka tɔnu wi ba taare ma win nuki sankire, kpa n ka nùn dam kɛ̃. 16Na ǹ kĩ na n bɛɛ taarɛ wɛ̃ɛmɔ baadomma, kpa na n ka bɛɛ mɔru nɛni saa kpuro. Nà n mɔ̀ mɛ, nɛn taka koora kpuro ya koo kam kowa. 17Nɛn mɔru ya seewa Isireliban taarɛ bakan sɔ̃, ma na bu sɛɛyasia sere na ǹ maa kĩ n bu mɛɛri. Adama ka mɛ, ba yɔ̃rariwa ben mɛm nɔɔ sari te sɔɔ, ma ba ben tiin gɔ̃ru kĩru swĩi. 18Na ben daa yɛ̃. Ka mɛ, kon bu bɛkia, n bu kpara kpa n bu nukuru yɛmiasia. Be ba gɔɔ wooru sɔ̃ ba sumɔ, 19kon de bu nuku dobun kuuki ko. Be ba wãa n toma ka be ba wãa turuku, ba koo bɔri yɛndu wa. Nɛ, Yinni Gusunɔ, kon bu bɛkia. Nɛna na ye gerua. 20Adama nuku kɔ̃surugibu ba sãawa nge nim wɔ̃kun nim kurenu, ni nu ǹ kpɛ̃ nu yɔ̃ra sɛ̃ɛ, ni nu ra n pɔtɔkɔ ka disinu sɔɔwa. 21Nuku kɔ̃surugii kun bɔri yɛndu wasi. Nɛ, Yinni Gusunɔwa na yeni gerua.

will be added

X\