Esai 56

1Amɛniwa nɛ, Yinni Gusunɔ na gerua. Na nɛɛ, i de i gem swĩi dee dee kpa i n sãa naanɛgibu. Domi na ka faaba wee, na ǹ tɛɛmɔ. Kon sɔ̃ɔsi ma na sãa gemgii. 2Doo nɔɔrugiiwa wi u mɔ̀ ye na gerua, ma u yɔ̃ dim dim u nɛn tɔ̃ɔ wɛ̃rarugiru mɛm nɔɔwammɛ, ma u ku ra tu disi doke, ma u tii nɛni u ku ka kɔ̃sa ko. 3Tɔn tuko wi u nɛ, Yinni Gusunɔ sãamɔ, u ku gere u nɛɛ, na ǹ wuramɔ u du nɛn tɔmbun suunu sɔɔ. Wi ba maa matam kua sina kpaarun sɔmburun sɔ̃, u ku gere u nɛɛ, wee, u kua dãa gbeburu. 4Domi amɛniwa nɛ, Yinni Gusunɔ na gerua. Na nɛɛ, sina kpaarun sɔm kowo be, bà n nɛn tɔ̃ɔ wɛ̃rarugiru mɛm nɔɔwammɛ, ma ba mɔ̀ ye ya koo man wɛ̃re, ma ba nɛn arukawani nɛni dim dim, 5kon bu ayeru wɛ̃ nɛn yɛnuɔ, kpa bu yĩsiru yari n kere bà n daa bibu mara. Kon bu yĩsiru kɛ̃ te ta ko n wãa sere ka baadommaɔ, ta ǹ gbimɔ. 6Tɔn tuko be ba man sãamɔ, ma ba nɛn yĩsiru kĩ, ma ba sãa nɛn sɔm kowobu, be kpuro be ba tɔ̃ɔ wɛ̃rarugiru mɛm nɔɔwammɛ, ma ba ǹ tu disi dokemɔ, ma ba nɛn arukawani nɛni, 7kon ka bu da nɛn guu dɛɛrarɔ, kpa n de bu nuku dobu ko nɛn sãa yerɔ. Kon ben yãku dɔ̃ɔ mwaararuginu ka ben yãku ni nu tie mwa nɛn yãku yerɔ. Domi ba koo nɛn dii te sokuwa bwesenu kpuron kana yeru. 8Nɛ, Yinni Gusunɔ, nɛ wi na Isireli be ba raa yarinɛ mɛnna, kon maa bwese tukunu mɛnna ka be, nɛn tɔmbu sannu. 9Bɛɛ gbeeku yɛɛ kpuro, i na i di. 10Domi be ba sãa Isireliban kɔ̃sobu, ba sãawa wɔ̃kobu, ba ǹ bwisi mɔ. Be kpuro ba sãawa nge bɔ̃ɔ ni nu kun kpɛ̃ nu wori. Ba ra kãwa ba n kpĩ ba n do kpa ba n dosimɔ. 11Ba sãawa nge bɔ̃ɔ ni nù n di, nu ku ra debu. Ba sãawa nge kparo laakari sariba. Swaa ye ben baawure u kĩ, yera u ra swĩi win tiin arufaanin sɔ̃. 12Ba sokunamɔ ba mɔ̀, bu mɛnnama bu tam bɔɔbɔm nɔ, sia kpa bu maa ko mɛ domi tam mu yiba.

will be added

X\