Esai 55

1Yinni Gusunɔ u nɛɛ, bɛɛ be nim nɔru ga mɔ̀, i na i nim nɔ. Baa bɛɛ be i ǹ gobi mɔ, i na i mwa i di. I na i tam ka bom mwa i nɔ n kun ka gobi. 2Mban sɔ̃na i bɛɛn gobi dimɔ ye ya ǹ arufaani mɔ sɔɔ. Mban sɔ̃na i bɛɛn sɔmburun are dimɔ ye ya ǹ bɛɛ debumɔ sɔɔ. I man swaa dakio kpa i wa i di ye ya gea sãa, kpa bɛɛn bwɛ̃ra yu yɛmia dĩa duronun sɔ̃. 3I swaa dakima, i na nɛn mi, kpa i wa i n wãa. Kon ka bɛɛ arukawani bɔke ye ya kun kpeemɔ, n ka bɛɛ durom sɔ̃ɔsi sere ka baadommaɔ, mɛ̀n nɔɔ mwɛɛru na Dafidi kua. 4Wee, na nùn kua nɛn seedagii bwese tukunun mi. Na nùn kua nin sina boko. 5Nɛ, Gusunɔ wunɛn Yinnin sɔ̃, kaa bwese tukunu sokusia, kpa nu duki na wunɛn mi, baa mɛ nu ǹ daa nun yɛ̃. Domi nɛ, Isireliban Yinni Dɛɛrowa na nun bɛɛrɛ wɛ̃ɛmɔ. 6Ǹ n mɛn na, i Yinni Gusunɔ kasuo tɛ̃ saa ye u wãa bɛɛn bɔkuɔ. I nùn sokuo sanam mɛ u wãa bɛɛn turuku. 7Kpa durumgii u win daa kɔsi, toro u maa win bwisiku kɔ̃sunu deri, kpa u gɔsira u wurama Yinni Gusunɔn mi. U koo nùn wɔnwɔndu kua, wi, wi u ku ra suuru kpanɛ. 8Yinni Gusunɔ u nɛɛ, nɛn bwisikunu kun sãa nge bɛɛn bwisikunu. Bɛɛn kookoosu su ǹ maa sãa nge nɛgisu. 9Nge mɛ wɔlla ka tem toma, nge mɛya maa nɛn bwisikunu ka nɛn kookoosu ka bɛɛgisu tondinɛ. 10Nge mɛ gura ka guru kpenu ra tem dwiiyasie, kpa dĩanu nu se nu maa gbee wuko bweseru wɛ̃, ka ye u koo di, 11nge mɛya nɛn gari yi na gerua, yi ku ra kam wɔri yi kun nɛn kĩru kue, kpa yi nɛn himba yibia. 12Ka gem, i ko yari yorun di ka nuku dobu, kpa bu bɛɛ kpara alafia sɔɔ. Guunu ka gungunu nu koo yɛ̃ɛri bɛɛn wuswaaɔ, kpa dãa ni nu wãa yakasɔ nu taki ko. 13Mi sãki ra kpi, dãa ye ba mɔ̀ sipɛrɛ, ka dãa kiki nubu durorugisa su koo kpi mi, kpa ye kpuro yu ko yĩreru te ta nɛn yiiko sɔ̃ɔsimɔ sere ka baadommaɔ.

will be added

X\