Esai 53

1Ma Esai u wisa u nɛɛ, wara u naanɛ doke ye sa nɔɔsia. Wara Yinni Gusunɔ u win dam sɔ̃ɔsi. Sari. 2Wee, win sɔm kowo u seewa win wuswaaɔ nge dãa kpii pɔtura ye ya kpia tem gbebum sɔɔ, ya ǹ dam mɔ. Mɛya u ǹ durɔ burɔ sãa, u ǹ nanum gam mɔ su sere nùn mɛɛri. Win wasi kun maa gãanu sãa yi sere sun wɛ̃re. 3Tɔmba nùn gɛma ma ba nùn biru kisi. U nɔni sɔ̃ɔre, u wahalan dɔɔnɛ mɔ, u ǹ waabu wã. Sa nùn atafiiru kua, sa ǹ nùn garisi gãanu. 4Adama bɛsɛn nɔni swãaru ka bɛsɛn wahalawa u sɔɔwa. Ma sa nùn garisi wi Gusunɔ u sɛɛyasia u sekuru doke. 5Bɛsɛn durum sɔ̃na ba nùn sɔka ba yaba. Bɛsɛn toranun sɔ̃na ba win wasi kɔsiki. Wahala ye ya nùn wɔri mi, ya ka sun alafia naawa. Sa bɛkurawa win mɛɛra yen saabu. 6Sa raa yarinɛwa bɛsɛ kpuro nge yãa ni nu kɔ̃ɔre. Baawure u win swaa swĩi ye u kĩ. Ma Gusunɔ u nùn sɛɛyasia bɛsɛn toranun sɔ̃. 7Ba nùn nɔni sɔ̃ɔwa, adama u tii kawa. U ǹ nɔɔ wukie u gãanu gere nge yãa kpɛn te ba koo saka, ǹ kun mɛ, yãa te ta maari sɛ̃ɛ ba ten sansu bɔɔrimɔ. 8Ka dama ba nùn mwa ba siri. Ba nùn go nɛn tɔmbun durum sɔ̃. Be ba wãa win waati ye sɔɔ, ben wara u yen bwisikunu kua. 9Ba nùn kpĩ ka dukiagibu sannu, ba nùn sikua tɔn kɔ̃sobun suunu sɔɔ baa mɛ u ǹ kɔ̃sa gaa kue, ba ǹ maa weesu gasu nɔɔre win nɔɔn di. 10Adama Gusunɔn kĩra wahala ye, ya ka nùn wɔri. Ma u dua nuku sankiraru sɔɔ. U tii kua yãkuru tɔmbun durum sɔ̃. Yen sɔ̃, u koo bii dabinu wa, kpa win wãarun tɔ̃ru tu dɛnya. Kpa Yinni Gusunɔn himba yu koora saa win min di. 11Win nɔni swãarun biru, u koo wãaru di, kpa u ten dobu nɔ. U koo tii sɔ̃ɔsi gemgii tɔn dabinun suunu sɔɔ, wi, wi u ben durum sɔɔwa. 12Yen sɔ̃na kon de u sina ka tɔn bokobu, kpa u n baa mɔ damgibun arumani sɔɔ. Domi u tii wɛ̃ sere u da u ka gu. Ma ba nùn garisi tɔn kɔ̃so, yèn sɔ̃ u tɔn dabirun durum sɔɔwa. U maa be ba taarɛ mɔ suuru kana.

will be added

X\