Esai 52

1Yerusalɛmu, wunɛ wi Yinni Gusunɔ u tii gɔsia, a dom yando kpa wunɛn dam mu wurama, kpa a wunɛn bura yãnu doke. Domi be ba ǹ Yinni Gusunɔ sãamɔ, ben goo kun maa duɔ wunɛ sɔɔ. 2A seewo a tii tua kpara, a wunɛn yoo yɔni pota wunɛn wĩirun di, kpa a sina wunɛn sina gɔna sɔɔ. 3Yinni Gusunɔ u Yerusalɛmu sɔ̃ɔwa u nɛɛ, ba raa nun dɔrawa gobi sari. Mɛya kon maa nun yakia n kun ka gobi. 4Yellu, nɛn tɔmbu ba da Egibitiɔ ba sɔru di mi. Yen biru, Asirigiba na ben temɔ ba bu dam dɔre ka wɔbia. 5Tɛ̃, mba kon ko. Wee Babilonigiba na ba bu gura kam sɔɔ, ma ba kuuki mɔ̀ ba nɛn yĩsiru gari kam gerusimɔ saa baayere. 6Yen sɔ̃na sɔ̃ɔ teeru, nɛn tɔmbu ba koo gia wi na sãa, kpa bu tubu ma nɛna na gerumɔ na mɔ̀, nɛ wee, na wee. 7Anna a wa nge mɛ ba bu dam koosiamɔ, be, be ba wee guunun di ba labaari gea kparamɔ. Ba Siɔni bɔri yɛndu ka faaban gari sɔ̃ɔmɔ ba mɔ̀, Gusunɔ wunɛn Yinni u bandu dii. 8Wee, be ba ra gbãraru kɔ̃su ba nɔɔgiru sue, ba kuuki mɔ̀ ka nuku dobu. Domi ba wa ka nɔni ma Yinni Gusunɔ u Siɔni yakiam wee. 9Yerusalɛmun bansu, a kuuki koowo ka nuku dobu, domi Yinni Gusunɔ u win tɔmbun nukuru yɛmiasia. U Yerusalɛmu yakia. 10U koo win dam ka win dɛɛraru bwesenu kpuro sɔ̃ɔsi, kpa bu wa handunian goonu nnɛ kpuro sɔɔ ma u win tɔmbu faaba kua. 11Bɛɛ be i Yinni Gusunɔn sãa yerun dendi yãnu sɔɔwa i ka wee, i tii dɛɛrasio. Kpa i se i yari Babilonin di. I ku gãanu ganu baba ni nu disi mɔ. 12Ì n yariɔ, i ǹ ko i yari ka sɛndaru nge be ba kpikiru suɔ. Domi Gusunɔ Isireliban Yinni u ko n bɛɛ kɔ̃su biruɔ ka wuswaaɔ. 13Yinni Gusunɔ u nɛɛ, wee nɛn sɔm kowo u koo nasara wa. U koo se u ko tɔn boko. 14Nge mɛ u tɔn dabiru nandasia yèn sɔ̃ win wuswaa ya kɔsa wahalan sɔ̃, ma win wasi yi ǹ maa ka tɔnugii weenɛ, 15nge mɛya u koo bwese dabinu biti kpɛ̃ɛ, kpa sinambu bu kpana bu gari gere win wuswaaɔ. Domi yèn faagi ba ǹ bu kuare, ba koo ye wa, kpa ye ba ǹ nɔɔre, n bu yeeri.

will be added

X\