Esai 50

1Yinni Gusunɔ u maa nɛɛ, bɛɛ Yudaba, mana tirera wãa te ta sɔ̃ɔsimɔ ma na bɛɛn mɛro Yerusalɛmu yina. Bèn dibu na nɛni, ben wara na bɛɛ wɛ̃. Sari. Bɛɛn durum sɔ̃na na bɛɛ dɔra. Bɛɛn toranun sɔ̃na na maa bɛɛn mɛro yina. 2Domi na na n bɛɛ faaba ko. Mban sɔ̃na na ǹ goo wa. Na soka soka, mban sɔ̃na na ǹ goon wurabu nua. I tamaa nɛn nɔmu ga ǹ dam tura n ka bɛɛ wɔra? Na ǹ dam mɔ n ka bɛɛ yakia? I ǹ yɛ̃ ma nà n nim wɔ̃ku gerusi ga ra gberewa, kpa daanu nu ko nge mi nim ku ra sinɛ, kpa swɛ̃ɛ yi gbi yi kɔ̃si? 3Na ra de wɔllu tu yam tĩra, kpa ta n sãa nge ta gɔɔ wooru sɔ̃. 4Yinni Gusunɔ u man keu kua kpa n ka kpĩ n wi u wasire dam kɛ̃. U ra nɛn laakari yamiɛ bururu baatere n ka kpĩ n nùn swaa daki, nge keu bii. 5U nɛn swasu kɔria, na ǹ nùn yinari. Na ǹ maa nùn biru kisi. 6Na be ba man soomɔ nɛn biru deria, ma na maa be ba nɛn baa sansu wukamɔ nɛn baanu deria. Na ǹ nɛn wuswaa berua sanam mɛ ba man wɔmmɔ ba yãatam siemɔ. 7Adama Yinni Gusunɔwa u man faaba kua. Yen sɔ̃na na ǹ bɛɛrɛ bie. Ma na yɔ̃ra na tãsa. Domi na yɛ̃ ma na ǹ sekuru wasi. 8Gusunɔ u wãa nɛn turuku, u koo man gem wɛ̃. Wara u sãa nɛn yibɛrɛ. Yɛ̃ro u susima. Wara u koo nɛn taarɛ wa. Yɛ̃ro u seewo bu sun siria. 9Nɛ, na yɛ̃ ma Yinni Gusunɔwa u koo man somi. Wara u koo man taarɛ wɛ̃. Nɛn yibɛrɛba kpuro ba koo munda nge yabe kĩasu si gɛmi yi di. 10Bɛɛ sɔɔ, wi u Yinni Gusunɔ nasie, u win sɔm kowon nɔɔ nɔɔwɔ. Wi u sĩimɔ yam wɔ̃kuru sɔɔ, u Yinni Gusunɔ naanɛ koowo, kpa u n tãsa wi sɔɔ. 11Bɛɛ be i mɔru seewa nge dɔ̃ɔ, ma i himba sãa i tɔmbu dɔ̃ɔ mɛni, i duo bɛɛn dɔ̃ɔ wi sɔɔ, kpa i dɔ̃ɔ mwaara. Yinni Gusunɔwa u koo de ye kpuro yu koora. Wahala sɔɔra i ko kpuna i gbi.

will be added

X\