Esai 5

1I womu swaa dakio i nɔ ge kon nɛn kĩnasi kua. Womu ge, ga ka wi ka win resɛm gbaaru yã. Ge wee. Nɛn kĩnasi u resɛm gbaaru garu mɔ te ta wãa tem turenu wɔllɔ mi n tem gem mɔ. 2U gbaa te kɔrɔ kua, ma u ten kpenu wukura. Ma u resɛm dãa ye ya koo bii duronu ma duura. Yera u ten kɔ̃sobun diru bana ten suunu sɔɔ. Ma u resɛm gama yeru kua mi. Saa yè sɔɔ u den yĩiyɔ resɛm gbaa te, tu nùn bii geenu marua, yera u deema kɔ̃suna ta nùn marua. 3Tɛ̃, nɛn kĩnasi u gerumɔ u mɔ̀, bɛɛ Yudaba, bɛɛ be i wãa Yerusalɛmuɔ, i bu sirio wi ka win resɛm gbaa te. 4Mba u tu burea u ǹ kue. Mban sɔ̃na ta bii kɔ̃sunu mara sanam mɛ u yĩiyɔ tu bii geenu ma. 5Wee ye u koo win gbaa te kua. U koo ten kara ka yen dãa wukiriwa, kpa yaa sabenu ka gbeeku yɛɛ yi du mi, yi di, yi taaku. 6U ǹ maa win resɛm dãa ye sɔmmɔ, mɛya u ǹ maa gbaa te wukumɔ. U koo tu deriwa tu kam ko, kpa sãki yi tu wukiri, kpa u de gura yu ku maa nɛ mi. 7Isirelibara ba sãa Gusunɔ, wɔllu ka tem Yinnin resɛm gbaa te. Ma Yudaba ba sãa resɛm dora ye u duura. U kĩa bu gea ko adama kɔ̃sa ba kua. Ba tɔmbu go ba yɛm yari. U maa kĩa bu gem swĩi, ma ba yina. Yen sɔ̃na tɔmba wuri mɔ̀. 8Bɔ̃ruroba be ba yɛnusu ka gbea sosimɔ ye ba raa mɔ sɔɔ, sere gabu ba ǹ maa ayeru mɔ, ma be tɔna ba batuma mɔ. 9Wee ye Gusunɔ wɔllu ka tem Yinni u man sɔ̃ɔwa. U nɛɛ, kam kam ba koo tɔn ben yɛnu dabi ni kpuro kam koosia. Kpa goo u kun maa wãa yenu bura si sɔɔ, si su kpã mi. 10Bà n resɛm ɛkitaa ita gama, yen tam kun ditiri weeraakuru turi. Bà n maa alikama kilo wunɔbu (100) duura, ye ba koo gɛ̃ ya ǹ kilo wɔkuru keramɔ. 11Bɔ̃ruroba be ba ra buru buru yellu se ba n tam bɔɔbɔm nɔrumɔ, kpa ba n wãa tam gbaburɔ sere n ka ko wɔ̃ku suunu. 12Gɔ̃ɔgenu ka mɔrɔkunu, ka baranu ka guunu ka sere tam, yera ya ra ben tɔ̃ɔ bakanu gbisisie, kpa ba n nɛ, Yinni Gusunɔn sɔma atafiiru sãa. 13Yen sɔ̃na kon de bu bu yoru mwɛɛri subaru sɔɔ bu ka doona. Ben sina biba koo gbi gɔ̃ɔrun sɔ̃, kpa be ba tie bu gbi nim nɔrun saabu. 14Kpa gɔribun wãa yeru tu nɔɔ wukia ka dam, tu sina bii be mwɛ ka maa tɔn wɔru ge ga nuku dobu mɔ̀. 15Saa ye sɔɔ, tɔmbu kpurowa ba koo yiira Yinni Gusunɔn wuswaaɔ bu tii kawa, kpa be ba nɛɛ, ba tii tura, bu wɔruma. 16Tɔ̃ɔ te sɔɔ, Gusunɔ, wɔllu ka tem Yinni u koo win tɔmbu siri dee dee u ka win yiiko sɔ̃ɔsi, kpa u gea ko u ka sɔ̃ɔsi ma u dɛɛre. 17Yãanu nu koo yakasu di Yerusalɛmun bansɔ nge nin kpara yenɔ, kpa nin binu nu di nu bɔria mi. 18Bɔ̃ruroba be ba gbinnɛ ka kɔ̃sa nge naa wuku yi yi yin kɛkɛ gawe, 19ba n gerumɔ ba n mɔ̀, Yinni Gusunɔ u wasi suo u win sɔmburu ko fuuku, kpa su tu wa. Isireliban Yinni Dɛɛro u win himba sɔ̃ɔsio ye u yi, kpa su ye gia. 20Bɔ̃ruroba be ba ra kɔ̃sa soku gea, kpa bu gea soku kɔ̃sa. Bɔ̃ruroba be ba ra yam wɔ̃kuru soku yam bururam, kpa bu yam bururam gɔsia yam wɔ̃kuru. Bɔ̃ruroba be ba ra ye n sosu gɔsie ye n do, kpa bu ye n do gɔsia ye n sosu. 21Bɔ̃ruroba be ba tãsa ben tii tiin yɛ̃ru sɔɔ, ma ba tii mɛɛra bwisigibu. 22Bɔ̃ruroba be ba yĩsiru yara tam nɔrubu sɔɔ. Bɔ̃ruroba be ba tam bɔɔbɔm kobu yɛ̃. 23Bɔ̃ruroba be ba nɔm biran kɛ̃nu mwaamɔ, ba ka taarɛgibu gem wɛ̃ɛmɔ, ma ba gemgibu taarɛ wɛ̃ɛmɔ. 24Yen sɔ̃na Yinni Gusunɔ u koo de bu dɔ̃ɔ mwaara nge mɛ dɔ̃ɔ u ra doo gãanu ka yaka gbebusu mwɛ, kpa ben gbini yi kɔ̃si, kpa ben wɛ̃su su ka woo doona nge tua, yèn sɔ̃ ba ǹ Gusunɔ wɔllu ka tem Yinnin woodaba garisi gãanu. Ma ba win gari atafiiru kua, wi, wi u sãa ben Yinni dɛɛro. 25Yen sɔ̃na win mɔru ya wɔrimɔ be sɔɔ. U bu nɔma dokemɔ u goomɔ. Guunu diirumɔ. Ma tɔmbun gonu nu sweenɛ swɛɛ sɔɔ nge kubanu. Adama ka mɛ, win mɔru kun sure, ma u bu nɔma dokemɔ u sɛɛyasiamɔ. 26U gidi bɔra yɔ̃rasia u ka bwese tukunu soku ni nu toma. Ma u nu soka ka wia. Ni wee nu wee ka wasi kasanu. 27Ben goo kun wasire, goo kun maa wɔrumɛ. Dom kun goo mwɛ u sere dweeya. Goon kpaka kun maa kusiare ye u sɛ̃ke pɔraɔ. Mɛya ben goon baranun wɛ̃ɛ kun nùn kare. 28Ben sɛ̃ɛnu nu nɔɔ do. Ba maa nu sɔri bu ka to. Ma ben dumin naa konnu nu bɔɔbu nge kperu. Ma ben tabu kɛkɛba ba sãu nge woo guna. 29Ma ba kukirimɔ nge gbee sunɔ, ge ga yaa mwa ga ka doonɔ goo kun gu yinari. 30Saa ye sɔɔ, kukiribu koo nɔɔra Isireliba sɔɔ nge nim wɔ̃ku ge woo bɔkɔ ga seeya. Bà n tem mɛ mɛɛra, yam wɔ̃kura ba koo wa ka nuku sankira bakanu, kpa wɔllu tu tĩra guru wii bakarun sɔ̃.

will be added

X\