Esai 49

1Bɛɛ be i wãa i toma, i swaa dakio i nɔ. Yinni Gusunɔwa man gɔsa saa nɛn mɛron nukurun di. U man soka ka nɛn yĩsiru ye ba man mara wurɛ. 2Ma u dera nɛn gari yi kua nge takobi ye ya nɔɔ do. U man win nɔma wukiri, u man kɔ̃su. U man kua nge sɛ̃u ge ga dɛ̃ɛ mɔ, ma u man doke win sɛ̃ɛ bwãarɔ. 3U man sɔ̃ɔwa u nɛɛ, Isirelin bweseru ta sãawa win sɔm kowo. Ten min diya u koo win yiiko sɔ̃ɔsi. 4Adama nɛ, na nɛɛwa, kama na sɔmburu kua. Nɛn dam, kama mu kua. Ka mɛ, na yɛ̃ ma Gusunɔ nɛn Yinni u koo man gem wɛ̃. Na are yĩiyɔ win mi. 5Yinni Gusunɔwa u man gɔsa ba sere man mara, n ka ko win sɔm kowo, kpa n ka win tɔmbu Isireliba, Yakɔbun bweseru gɔsiama win mi. Wee, u man bɛɛrɛ dokemɔ. Wiya u maa man dam wɛ̃ɛmɔ. 6U nɛɛ, na n ka sãa win sɔm kowo, kpa n ka Isireliban bwese ni nu tie seeya, ya ǹ gãanu tura. Wee u man kua bwese tukunun yam bururam, kpa n ka win faaba da handunian goonu nnɛ kpuro sɔɔ. 7Yeniwa Gusunɔ, Isireliban Yinni Dɛɛro wi u bu faaba kua, u nun sɔ̃ɔwa, wunɛ wi a sãa damgibun yoo wi tɔmba tusa ba gɛma. U nɛɛ, sinamba koo nun wa kpa bu nun bɛɛrɛ wɛ̃. Sina biba koo maa nun kpuna nɛ, Isireliban Yinni Dɛɛron sɔ̃, nɛ wi na sãa naanɛgii ma na nun gɔsa. 8Saa yà n tura n ka nun faaba ko, kon nun durom kua kpa n nun somi. Kon nun kɔ̃su kpa n ka tɔmbu kpuro arukawani bɔke saa wunɛn min di. Kon de a wunɛn tem sɔmɛ kpa a kpam wunɛn tɔmbu ben tem wesia mɛ mu bansu sãa tɛ̃. 9Kon de a dɛsobu yakia bu doona, kpa a be ba maa wãa yam wɔ̃kurɔ sɔ̃ a nɛɛ, bu yarima bu da yam bururam sɔɔ, kpa ba n sãa nge yãa ni nu dĩanu waamɔ swɛɛn bɔkuɔ ka guunɔ. 10Gɔ̃ɔru ka nim nɔru kun bu mɔ̀. Sɔ̃ɔ ka win yam susura kun maa bu wahala mɔ̀. Domi wi u ben wɔnwɔndu mɔ, wiya u koo bu kpara u ka da mi bwii wãa. 11Nɛ, Yinni Gusunɔ, kon nɛn guunu gɔsia swɛɛ, nɛn tɔmbu bu ka swaa wa. 12Be wee, ba wee saa tontonden di, ben gabu saa sɔ̃ɔ yɛ̃san nɔm geu gian di, ka sɔ̃ɔ duu yeru gian di, gabu maa saa Egibitin bera gian di. 13Wɔllu, a yɛ̃ɛrio. Tem, a nukuru doro. Bɛɛ maa guunu, i dɛsiru karo. Domi Yinni Gusunɔ u win tɔmbu nukuru yɛmiasiamɔ. Be ba nɔni sɔ̃ɔre, u ben wɔnwɔndu mɔ. 14Yerusalɛmugibu ba mɔ̀, Yinni Gusunɔ u sun deri, ma u sun duari. 15Adama Gusunɔ u nɛɛ, tɔn kurɔ u ra win bii wi u bɔm kɛ̃mɔ duari? U ku ra win wɔnwɔndu ko? Baa ù n duari, nɛ, na ǹ nun duarimɔ, Yerusalɛmu. 16Domi na wunɛn yĩsiru yorua nɛn nɔm tararɔ. Na ra wunɛn gbãraru yaaye nɛn bwisikunu sɔɔ. 17Wee be ba koo nun seeya, ba wee. Kpa be ba raa nun wɔri ba wunɛn yãnu gura bu yari min di. 18A mɛɛrio a ka sikerena. Wunɛn bibu wee ba wee, ba mɛnnamɔ wunɛn mi. Ba ko n sãa nge bura yãnu, kpa a n sãa nge kurɔ kpao. Nɛ, Yinni Gusunɔwa na yeni bɔ̃rua ka nɛn tiin wãaru. 19Wunɛn tem mɛ ba raa wɔri ba sanka, tɔmba koo dabia mɛ sɔɔ ba n baasinɛ. Be ba raa maa nun dam dimɔ, ba koo doona n toma. 20Wunɛn bii be ba mara yoru sɔɔ tem tukumɔ, ba koo wurama ben temɔ, kpa bu nun sɔ̃ bu nɛɛ, tem mɛni, mu ǹ sun tura. Sa kĩ bu maa sun sosia. 21Saa yera kaa tii bikia a nɛɛ, wara u nun bii beni marua. Domi a wunɛn bibu bia, a ǹ maa gabu wa a mara ye ba nun yina ba doona. Wara u bii beni seeya. A raa wãawa wunɛ turo, man diya bii beni ba na. 22Yinni Gusunɔ u nɛɛ, wee na kon tɔn tukobu yĩreru garu sɔ̃ɔsi te ta koo de bu wunɛn bibu gurama bu nun wesia. 23Sinambu ka ben bii tɔn kurɔbu ba koo nun nɔɔri. Ba koo nun kpuna bu wiru tem girari, kpa bu tii kawa bu nun bɛɛrɛ baka wɛ̃. Sanam mɛya kaa gia ma nɛna na sãa Yinni Gusunɔ. Be ba maa man yĩiyɔ ba ǹ sekuru wasi. 24Ye tabu durɔ u gura tabu sɔɔ, ba koo kpĩ bu nùn ye wɔrari? Be damgii u yoru mwa, ba koo kpĩ bu bu yakia? 25Yinni Gusunɔ u nɛɛ, oo, mɛya, kon damgiin yobu yakia, kpa n tabu durɔn yãa ni u raa gura wɔra. Domi kon ka wunɛn yibɛrɛba sanna, kpa n wunɛn bibu faaba ko. 26Kon de be ba nun taare bu goona, kpa ben tɔn goberu ka ben mɔru yu bu go nge tam, kpa tɔmbu kpuro bu gia ma nɛ, Yinni Gusunɔwa na nun faaba mɔ̀. Nɛna na sãa wunɛ Yakɔbun Yinni damgii wi u nun yakia.

will be added

X\