Esai 48

1I swaa dakio i nɔ, Isireliba bɛɛ Yakɔbun yɛnugibu, bɛɛ be i yara Yudan bweserun di, wee i bɔ̃rumɔ ka nɛ, Gusunɔ Isireliban Yinnin yĩsiru, ma i man nɔɔgiru suemɔ, adama n ǹ mɔ ka gem. 2Bɛɛ be i Yerusalɛmun yĩsiru sɔɔwa, ma i tãsa nɛ Gusunɔ, Isireliban Yinni sɔɔ, wi ba sokumɔ wɔllu ka tem Yinni, i swaa dakio i nɔ. 3Saa yellun di, na dera ba gãa gbiikinun gari gerua. Ba yi gerua i nua. Ma na dera yi koora subaru sɔɔ. 4Na yɛ̃ i tau, ma i wĩiru bɔɔbu, ma bɛɛn sirikana dam mɔ nge sisu. 5Yen sɔ̃na na bɛɛ yeni kpuro nɔɔsia saa yellun di. Na bɛɛ ye nɔɔsiawa yu sere tunuma, kpa i ku ra ka gere i nɛɛ, bɛɛn bũuwa u ye koosia. Ǹ kun mɛ i nɛɛ, bɛɛn bwãaroku ge i kua ka sii gandu ǹ kun mɛ ka dãa, gera ga yen wooda wɛ̃. 6I nua ye na raa gerua. I maa wa ye kpuro ya koora. I ǹ ko i ye wura? Wee, tɛ̃ na bɛɛ gãa kpaanu nɔɔsiamɔ ni nu berua i ǹ nu yɛ̃. 7Tɛ̃ra nu koo koora, n ǹ mɔ ni nu raa koora. I ǹ daa nin gari nɔɔre ma n kun mɔ gisɔ, kpa i ku ra ka gere i nɛɛ, i raa nu yɛ̃ kɔ. 8Wee i ku ra man swaa daki. I ku ra maa kã bu bɛɛ gãanu sɔ̃ɔsi, domi saa yellun di, ba ǹ bɛɛ swaa yabe. Na yɛ̃ ma i ko ko naanɛ sariba, domi bu sere bɛɛ ma, ba bɛɛ soka be ba koo man seesi. 9Adama yèn sɔ̃ na sãa Gusunɔ, yen sɔ̃na na nɛn mɔru suresia. Ma na nɛn tii nɛnua nɛn yiikon sɔ̃, kpa n ku ra ka bɛɛ kpeerasia. 10Na bɛɛn laakari mɛɛra, adama n ǹ mɔ ka dɔ̃ɔ nge mɛ ba ra sii geesu sɔwe. Na bɛɛ dokewa yibɛrɛban suunu sɔɔ bu ka bɛɛ sɛɛyasia nge dɔ̃ɔ boko. 11Nɛn kĩrun sɔ̃na na ye kua. Domi na ǹ derimɔ nɛn yĩsiru tu bɛɛrɛ bia. Na ǹ maa nɛn yiiko goo wɛ̃ɛmɔ. 12Yinni Gusunɔ u nɛɛ, bɛɛ Isireliba, bɛɛ be i sãa Yakɔbun bweseru, bɛɛ be na soka, i swaa dakio i nɔ. Nɛna na sãa gbiikoo ka dãako. 13Nɛna na tem kua, ma na wɔllu tɛria. Yen baayeren yĩsira na soka, ma ya koora yande. 14Bɛɛ kpuro i mɛnnama, kpa i man swaa daki. Na goo mɔ wi na kĩ. Wiya u koo nɛn kĩru ko u Babiloni wɔri. Kpa u nɔma dɛmia u yen tɔmbu nɛn dam sɔ̃ɔsi. Bɛɛn goo kun yen gari gerure. 15Nɛ, Yinni Gusunɔwa na ye gerua. Na nùn soka, u maa na. Ma na dera win swɛɛ kpuro yi nùn kusiara. 16Ma Esai u nɛɛ, i susima nɛn bɔkuɔ kpa i nɔ. Saa yellun di, na bɛɛ ye sɔ̃ɔwawa kpasasa. Saa yen toren diya na wãa mi. Wee, tɛ̃ Yinni Gusunɔ u man gɔrima ka win Hunde. 17Wi u sãa bɛɛ Isireliban Yinni Dɛɛro, ma u bɛɛ yakia u nɛɛ, u ra bɛɛ sɔ̃ɔsi ye n ko n bɛɛ arufaani ko, kpa u bɛɛ swaa sɔ̃ɔsi ye ya weenɛ i swĩi. 18Ì n daa win woodaba mɛm nɔɔwa, alafia ya ko n bɛɛ wãasiwa, nge daa bakarun nim mɛ mu ra n tɛrie. 19Bɛɛn bweseru ta koo dabiawa nge yani sɛɛri. Bɛɛn yĩsiru ta ǹ maa gbimɔ win wuswaaɔ. 20I yario Babilonin di i yen tɔmbu duki suurio. I nasaran womusu koowo, i kpara handunian goonu nnɛ sɔɔ i nɛɛ, wi, Yinni Gusunɔ u bɛɛ Yakɔbun bweseru yakia, bɛɛ be i sãa win sɔm kowobu. 21Nim nɔru ga ǹ bɛɛ mɔ̀ mi u koo bɛɛ kpara gbaburɔ, domi u koo kperu bɛra kpa nim mu koku i nɔ. 22Adama kɔ̃san kowobu ba ǹ bɔri yɛndu wasi. Wi, Yinni Gusunɔwa u yeni gerua.

will be added

X\