Esai 47

1Yinni Gusunɔ u nɛɛ, wunɛ wi ba ǹ kamiare, kaa wɔruma a kpuna tua sɔɔ. Wunɛ wi a sãa nge wɔndia, kaa sina temɔ, a ǹ maa sinamɔ sina kitarɔ. Domi ba ǹ maa nun sokumɔ kurɔ burɔ. 2Kaa nɛɛ bia sua kpa a som nam nge yoo. Kaa wunɛn sɔnditia wuna, kpa a wunɛn bekuru kpaasina a wunɛn taanu sɔ̃ɔsi kpa a daanu tɔbura. 3Ba koo wunɛn tereru wa kpa sekuru tu nun mwa. Kon nun mɔru kɔsie. Na ǹ goo derimɔ wunɛn nukurɔ. 4Nɛn yĩsira Gusunɔ, wɔllu ka tem Yinni. Na maa sãa Isireliban Yinni dɛɛro, wi u bu faaba mɔ̀. 5Babiloni, wunɛ wi a sãa nge Kaladeban wɔndia, a doo a sina yam wɔ̃kuru sɔɔ, a mari. Ba ǹ maa nun sokumɔ sinambun sina boko. 6Wee, na raa ka nɛn tɔmbu mɔru kua, na bu garisi nge disi, be, be ba sãa nɛgibu. Ma na nun bu nɔmu bɛria. Adama a ǹ bu wɔnwɔndu kue, sere a mam ben durɔ tɔkɔnu yoru diisia. 7Mɛya a ra n gerumɔ a n mɔ̀, kaa n bandu diiwa sere ka baadommaɔ. Adama a ǹ bwisika wunɛn gɔ̃ruɔ ma yeniba kpuro ya koo nɔru ko. 8A swaa dakio, Babiloni, wunɛ wi a ra n wunɛn tiin nuku dobu kasu, ma a sɔ̃ ka toro sindu a gerumɔ wunɛn gɔ̃ruɔ a mɔ̀, wuna mi, goo maa sari wi u ka nun nɛ. A ǹ gɔminiru dimɔ, wunɛn bii goo kun maa gbimɔ. 9Adama tɛ̃ ye yiru kpuro ya koo nun deema sɔ̃ɔ teeru subaru sɔɔ. Baa mɛ wunɛn tim mu do, ma wunɛn dobo dobo ya kpã, ka mɛ, kaa gɔminiru sina, kpa wunɛn bibu bu gbi. Ye kpuro ya koo koorawa mam mam. 10Wee, a raa kom kɔ̃sum mɔ̀ ka toro sindu, domi a gerumɔ a mɔ̀, goo kun nun waamɔ. Wunɛn laakari ka wunɛn yɛ̃ru ta nun wiru gɔsia. Ma a gerumɔ wunɛn gɔ̃ruɔ a mɔ̀, wuna mi. Goo kun ka nun nɛ. 11Adama tɛ̃, kɔ̃sa koo nun deema. A ǹ maa goo wasi wi u koo nun wɔra. Nɔni swãara koo nun wɔri. A ǹ maa kpɛ̃ a tu suuri, kpa a kam ko subaru sɔɔ. 12Ǹ n mɛn na, a n wãa a n wunɛn dobo dobo mɔ̀ ka tim timminu ni a ra raa ko wunɛn piiburun di. Sɔrɔkudo ya koo nun arufaani marua. Ǹ kun mɛ, ya koo de bu nun nasia. 13Wee, a wasira bikiarun sɔ̃ be ba ra wɔllun kperin saria mɛɛrin mi. Ǹ n mɛn na, bu seewo bu nun faaba ko, be, be ba ra nun sɔ̃ suru ka suru ye n koo nun deema. 14Ben tii ba koo dɔ̃ɔ mwaara nge yakasu. Ba ǹ kpɛ̃ bu ben wãaru wɔra saa dɔ̃ɔ yaran di. Dɔ̃ɔ yara ye, ya ǹ ko n sãa nge pɛ̃ɛn doon dɔ̃ɔ. Ya ǹ maa sãa dɔ̃ɔ wìn bɔkuɔ ba ra sinɛ. 15Yera ya koo bɛɛn sɔro be deema bèn sɔ̃ a raa tii wahala kua saa yellun di. Be kpuro ba koo yarinawa. Ben goo kun nun faaba mɔ̀.

will be added

X\