Esai 46

1Bũu wi ba mɔ̀ Bɛli, win dam kpeemɔ. Wi ba maa mɔ̀ Nɛbo, u ǹ maa do. Ba ra raa nu sã, adama tɛ̃, nu kua kuba ni yaa sabenu sɔɔwa. Yaa sabe ni, nu maa wasira sɔmu nin sɔ̃. 2Wee Bɛli ka Nɛbo ba wɔruka ba dam kpa sannu sannu. Ba kpana bu ben bwãarokunu faaba ko. Ma yibɛrɛba ba nu gura ba ka doona. 3Adama i man swaa dakio, bɛɛ Isireliba, bɛɛ be i tie, bɛɛ be na nɛni na nɔɔrimɔ saa bɛɛn marubun di. 4Na ǹ kɔsimɔ sere ka bɛɛn tɔkɔrɔ. Ko na n bɛɛ nɔɔrimɔwa baa ì n seri burura. Ko na n bɛɛ kɔ̃suwa. Na raa bɛɛ nɔɔri, kon maa wure n ye ko. Kpa n bɛɛ kɔ̃su n bɛɛ faaba ko. 5Wara i ko ka man sweena, kpa i nùn ko nɛn saara. Wara maa sãa nge nɛ. Bũu? 6Wee ba ra wura yare ben bɔɔrun di, kpa bu sii geesu yĩire kilo sɔɔ, bu ye kpuro seko wɛ̃ u ka bu bwãaroku kua ge ba koo yiira bu sã. 7Bà n gu seru sɔndi ba ka da ba yi mi ga ko n wãa, ga ku ra kesi gen yii yerun di. Bà n nɔɔgiru sua ba gu soka, ga ku ra wure. Ga ku ra maa bu yare nɔni swãarun di. 8Bɛɛ durumgibu, i yeniba kpuro bwisikuo, kpa i laakari ko ye na kua. 9I yaayo ye ya raa koora yellu. Domi nɛna Gusunɔ. Goo maa sari nge nɛ. 10Na gerua yellun di ye ya koo koora. Na nɛɛ, nɛn himba ye na yi, ya koo koora. Kon maa nɛn kĩru kpuro yibia. 11Nɛna na durɔ goo soka saa sɔ̃ɔ yari yerun di mi n toma. U koo na nge kasa u nɛn himba yibia. Ye na gerua, kon ye ko. Himba ye na yi, kon maa ye yibia. 12Tɛ̃ i man swaa dakio, bɛɛ bèn gɔ̃ru ga bɔɔbu, ma i tamaa nɛn faaba ya toma. 13Kon Yerusalɛmu faaba ko, kpa n de Isireliba bu bɛɛrɛ wa mi. Ye wee, ya turuku kua, ya ǹ maa toma. Ya ǹ tɛɛmɔ yu ka na.

will be added

X\