Esai 45

1Yinni Gusunɔ u Sirusi gɔsa u nùn nɛni ka win dam. U koo bwesenu kpuro taare win wuswaaɔ, kpa u sinambun dam wuna. U koo nùn wusun kɔnnɔsu wukia su n kɛniare. U nùn sɔ̃ɔwa u nɛɛ, 2kon nun gbiiya kpa n wunɛn swɛɛ kpuro sɔmɛ yi nɔɔ nɛra. Kon gambo sii gandugii ka yin kɔkɔrɔ sisugii bɔɔku. 3Kon nun arumani wɛ̃ ye ya raa berua yam wɔ̃kuru sɔɔ, kpa a gia ma nɛ Gusunɔ, Isireliban Yinniwa na nun sokumɔ ka wunɛn yĩsiru. 4Nɛn sɔmɔ Yakɔbu wi na gɔsan sɔ̃na na nun soka ka wunɛn yĩsiru, ma na nun bɛɛrɛ baka wɛ̃ baa mɛ a ǹ man yɛ̃. 5Nɛna Yinni Gusunɔ, goo maa sari nge nɛ. Yen sɔ̃na na nun dam wɛ̃ baa mɛ a ǹ man yɛ̃. 6Kpa tɔmbu bu gia saa sɔ̃ɔ yari yerun di sere sɔ̃ɔ duu yerɔ ma nɛna Yinni Gusunɔ. Goo maa sari nge nɛ. 7Nɛna na ra de yam bururam ka yam wɔ̃kura n wãa. Nɛna na ra maa de alafia ka wahala ya n wãa. Nɛ, Yinni Gusunɔwa na ra ye kpuro ko. 8Kon de nasara yu na wɔllun di nge gura, kpa tem mu nɔɔ wukia mu de faaba yu kpi, kpa gem mu kpɛ̃a ka ye sannu. Nɛ, Yinni Gusunɔwa na ye kpuro mɔ̀. 9Bɔ̃rurowa tɔnu wi u ka win taka kowo sikirinamɔ. U sãawa nge tem mɔndu te ta ten mɔmɔ bikia ta nɛɛ, mba u mɔ̀ mi. Ǹ kun mɛ nge gãa ni u kua ma nu nɛɛ, u ǹ nɔma du. 10Bɔ̃rurowa wi u win tundo ka win mɛro bikia u nɛɛ, mban sɔ̃na i man mara mɛni. 11Amɛniwa Gusunɔ Isireliban Yinni Dɛɛro wi u bu taka kua u bu sɔ̃ɔwa. U nɛɛ, n ǹ bɛɛ i ko man bikia ye kon ka nɛn bibu ko, kpa i man wooda wɛ̃ nɛn nɔman sɔmburun sɔ̃. 12Nɛna na tem kua ma na tɔnu taka kua u n ka wãa mɛ sɔɔ. Nɛn nɔmuwa ga maa wɔllu tɛria, ma na sɔ̃ɔ ka suru ka kperi yi yi mi. 13Nɛ, Yinni Gusunɔ Dam kpurogii, nɛna na Sirusi seeya u ka gea ko ye na gɔ̃ru doke. Kon win swɛɛ kpuro nɔɔ nɛrasia. U koo nɛn wuu Yerusalɛmun bansu seeya, kpa u nɛn tɔn be ba raa yoru mwɛɛra yara yorun di n kun ka kɔsiaru garu. 14Yinni Gusunɔ u Isireliba sɔ̃ɔwa u nɛɛ, Egibitigibu ka Etiopigibun dukia ya koo ko bɛɛgia, kpa Sebagii be ba gunu bu na bɛɛn mi, bu ko bɛɛn yobu. Bwese ni kpuro nu ko n bɛɛ swĩiwa ba n nu yɔni bɔkua. Nu koo yiira bɛɛn wuswaaɔ kpa nu wura nu nɛɛ, bɛɛ tɔnan miya nɛ, Gusunɔ na wãa. Goo maa sari nge nɛ. 15Gusunɔ Isireliban Yinni a sãawa faaba kowo, adama a ǹ waarɔ ka nɔni. 16- 17Gusunɔ u Isireliba faaba kua ye ya ǹ nɔru mɔ. Ba ǹ sekuru wasi sere ka baadommaɔ. Adama be ba bwãarokunu sekumɔ, ba koo tuka ka sekuru. 18Yinni Gusunɔ turowa u sãa Gusunɔ. Wiya u wɔllu taka kua, ma u tem kua. U ǹ maa dere mu n wãa dirum, kpa hunde koniba ba n ka wãa mɛ sɔɔ. Wiya u gerua u nɛɛ, wiya Yinni Gusunɔ. Goo maa sari nge wi. 19U ǹ win gari gerua gbɛnum gbɛnum. U yi kparawa batuma sɔɔ. U ǹ maa Yakɔbun bweseru sɔ̃ɔwa u nɛɛ, tu nùn kasuo kam sɔɔ. Wi, Yinni Gusunɔ, geeya u ra gere. Gem gariya u ra maa kpare. 20Yinni Gusunɔ u nɛɛ, yen sɔ̃, i mɛnnama. I susima bɛɛ be i kpikiru sua tabun di. Be ba bwãaroku dãaginu sɔɔwa, ma ba bũu sokumɔ wi u ǹ kpɛ̃ u bu faaba ko, ba ǹ yɛ̃ru mɔ. 21I na i tii tusia, kpa i ka bũu sãɔ be na bu wesiana ben tii tiinɛ sɔɔ. Wara u gerua saa toren di ye ya koo koora. N ǹ nɛ, Yinni Gusunɔ ro? Goo maa sari nge nɛ. Nɛ turowa na sãa gemgii wi u ra faaba ko. 22Yen sɔ̃, bɛɛ be i wãa handunian goonu nnɛ kpuro sɔɔ, i gɔsirama nɛn mi, kpa i faaba wa. Domi nɛna na sãa Gusunɔ. Goo maa sari nge nɛ. 23Gema na gerumɔ. Nɛn gari kun maa kam mɔ̀. Na bɔ̃rua ka nɛn tiin yĩsiru na nɛɛ, dũuru baatere ta koo yiira nɛn wuswaaɔ, kpa nɔɔ baagere gu bɔ̃re ka nɛn yĩsiru. 24Ba koo gere bu nɛɛ, nɛ turon miya gem ka dam mu wãa. Be ba man seesi kpuro ba koo sekuru wa. 25Nɛ, Yinni Gusunɔwa kon Isireliban bweseru kpuro gem wɛ̃ kpa ta n ka nuku dobu mɔ.

will be added

X\