Esai 43

1Yinni Gusunɔ u nɛɛ, Isireli, Yakɔbun bweseru, wunɛ wi na mɔma na taka kua, a ku bɛrum ko, domi nɛna na nun yakia. Na nun soka ka wunɛn yĩsiru, a sãawa nɛgii. 2À n wahala mɔ̀ nge wi u nim bweru tɔburamɔ, ko na n ka nun wãa. Wahala ye, ya ǹ nun kamiamɔ. À n maa nɔni sɔ̃ɔre nge wi u sĩimɔ dɔ̃ɔ sɔɔ, a ǹ wururamɔ. Mɛya nɔni swãa te, ta ǹ nun suramɔ. 3Domi nɛna na sãa Gusunɔ wunɛn Yinni Dɛɛro, nɛ wi na nun faaba mɔ̀. Na kon Egibiti ka Etiopi ka Saban tem yibɛrɛba wɛ̃ wunɛn ayerɔ, kpa a yakiara, 4yèn sɔ̃ a sãa gãa bakanu nɛn nɔni sɔɔ. A girima mɔ, na maa nun kĩ. Kon bwese dabinu yibɛrɛba nɔmu sɔndia wunɛn ayerɔ n ka wunɛn wãaru yakia. 5Yen sɔ̃, a ku bɛrum ko, domi na ka nun wãa. Kon de wunɛgii be ba gura ba ka da sɔ̃ɔ yari yeru gia mi, bu wurama, kpa n maa be ba wãa sɔ̃ɔ duu yeru gia mɛnnama. 6Na ǹ maa derimɔ sɔ̃ɔ yɛ̃si yɛ̃sikan tɔmbu bu maa bu nɛnɛ. Adama bu de nɛn bii be ba wãa handunian goonu nnɛ ye sɔɔ kpuro bu wurama, 7be, be ba nɛn yĩsiru sɔɔwa, be na taka kua bu ka man bɛɛrɛ wɛ̃. 8Gusunɔ u nɛɛ, bu de nɛn tɔmbu bu yarima, be, be ba nɔni mɔ, adama ba ǹ yam waamɔ, ba swasu mɔ, adama ba ǹ gari nɔɔmɔ. 9Bwesenu kpuro nu mɛnnɔ kpa n nu bikia, bũu wara u yenin gari gerua. Bũu wara u gbia u ye nɔɔsia ya sere koora. U win seedagibu mɛnnama, kpa bu sɔ̃ɔsi ma u gem mɔ, kpa bu swaa daki bu wura ma gema u gerua. 10Wunɛ Isirelin bweseru, wuna a sãa nɛn seeda. Wuna na gɔsa a n sãa nɛn sɔm kowo, kpa a n ka yɛ̃ kam kam ma nɛ baasi, Gusunɔ goo maa sari. Mɛya Gusunɔ goo kun maa koorɔ. 11Nɛna na Gusunɔ wi u ra n wãa. Nɛ baasi, faaba kowo goo sari. 12Nɛna na nun nɔɔsia ye ya koo koora. Ma na nun faaba kua. Bũu goo kun kpĩa u nun gãanu nɔɔsie. Wuna a sãa nɛn seeda. Nɛna na sãa Gusunɔ saa toren di. 13Goo sari wi u koo goo wɔra saa nɛn nɔman di. Goo maa sari wi u koo yina n ko ye na kĩ. 14Yinni Gusunɔ u nɛɛ, bɛɛ Isireliba, amɛniwa nɛ Gusunɔ, bɛɛn Yinni Dɛɛro, nɛ wi na bɛɛ yara, na gerua na nɛɛ, kon Babilonigibu bɛri yibɛrɛban nɔmaɔ bɛɛn sɔ̃, kpa n ben wuun gamboba kɔsuku, kpa ben nuku dobun kuuki yi gɔsira nuku sankiranun wuri. 15Nɛna na sãa Gusunɔ bɛɛn Yinni Dɛɛro. Nɛna na bɛɛ taka kua na maa sãa bɛɛn sunɔ. 16Ma Esai u nɛɛ, yellu, Yinni Gusunɔ u swɛɛ yara nim wɔ̃ku ka nim tori damgii sɔɔ. 17U tabu kɛkɛ be dumi gawe ka tabu durɔ wɔrugɔba tabu sure. Be kpuro ba wɔruka, ba kpana bu se, ma ba kam kua ba gu nge fitila. 18Adama tɛ̃, u gerua u nɛɛ, i ku maa ye ya koora kɔn bwisikunu ko. I ku maa gãa gurunun laakari ko. 19Wee kon gãa kpaanu ko. Ni wee nu wee. I ǹ nu tuba? Kon swaa yara gbaburɔ, kpa daanu nu n wãa mi tem gbere. 20Taataanu ka gbeeku bɔ̃nu, gbeeku yɛɛ kpuro gesi, yi koo man bɛɛrɛ wɛ̃. Domi kon de nim mu n wãa gbaburɔ, mi tem gbere, kpa tɔn be na gɔsa bu nim wa bu nɔ, 21be, be na taka kua ba koo man tɔma. 22Adama bɛɛ Isireliba, bɛɛ be i sãa Yakɔbun bweseru, i ka man wasira, i ku ra maa man sã. 23- 24N ǹ nɛ i yãku dɔ̃ɔ mwaararuginu kuammɛ ka bɛɛn yãanu. Yãku ni i ra maa ko mi, nu ǹ man bɛɛrɛ wɛ̃ɛmɔ. N ǹ nɛn sɔ̃ i gobi bɛkɛ di i ka turare dɔ̃ɔ doke. N ǹ maa nɛ i ka yaa gum naawammɛ ì n yãkuru mɔ̀ mu sere man tusi. N ǹ nɛ na bɛɛ tilasi kua i n da ka man kɛ̃nu naawɛ. Mɛya na ǹ maa bɛɛ tɔ̃ya kue i ka man turare dɔ̃ɔ dokea. Adama i man wahala kpɛ̃ɛwa bɛɛn durum sɔ̃, ma na wasira bɛɛn toranun sɔ̃. 25Ka mɛ, nɛna na bɛɛn durum wɔkamɔ yèn sɔ̃ na sãa Gusunɔ. Na ǹ maa ye yaayamɔ. 26I seewo i na i man bɛɛn gari tɛria, kpa i ka tii yina. 27Bɛɛn sikado gbiikoo u durum kua, ma bɛɛn sãa gbiobu ba man seesi. 28Yen sɔ̃na na yãku kowobu yara nɛn sãa yerun di, ma na bɛɛ Isireliba, Yakɔbun bweseru kam koosia, na bɛɛ sekuru doke.

will be added

X\