Esai 42

1Yinni Gusunɔ u nɛɛ, nɛn sɔm kowo wee, wi na gɔsa. Wiya na ka wãa, na maa nùn kĩ. Na nɛn Hunde doke wi sɔɔ. U koo gem gari kpara tɔmbu sɔɔ. 2U ǹ nɔɔgiru suamɔ u sere gbãra ka dam, kpa bu win nɔɔ nɔ swɛɛ sɔɔ. 3U ǹ koo tɔn be ba sunkure nge kaba dakura. Mɛya u ǹ maa bu goomɔ, baa bà n sãa nge fitila ge ga gɔɔ dɔɔ. U koo gem kparawa nge mɛ n sãa. 4U ǹ mwia kpanamɔ. U ǹ maa wasiramɔ sere u ka de gem mu n wãa handunia kpuro sɔɔ, kpa tɔn be ba wãa sere mi n toma ba n win woodaba naanɛ sãa. 5Yinni Gusunɔ wi u wɔllu kua u tɛria, ma u tem kua ka ye ya kpia mɛ sɔɔ, ma u dera tɔmbu ka sere hunde koni be ba wãa tem sɔɔ ba wɛ̃siamɔ, wiya u win sɔm kowo sɔ̃ɔwa u nɛɛ, 6nɛna na nun soka n ka nun faaba ko. Kon nun dam kɛ̃, na n wunɛn nɔma nɛni. Kon nun kɔ̃su, kpa n ka tɔmbu arukawani bɔke saa wunɛn min di, kpa bwesenu kpuro nu ka yam bururam wa. 7Kaa wɔ̃kobu nɔni wukia, kpa a be ba sɔ̃ yam wɔ̃kuru sɔɔ pirisɔm dirɔ yara. 8Nɛna Gusunɔ wi u ra n wãa. Nɛn yĩsira mi. Na ǹ nɛn yiiko bũu goo wɛ̃ɛmɔ. Mɛya na ǹ maa nɛn bɛɛrɛ bwãarokunu wɛ̃ɛmɔ. 9Wee, ye na gbia na gerua, ya koora. Tɛ̃, na bɛɛ gãa kpaanu nɔɔsiamɔ nu sere koora. 10I Yinni Gusunɔ wom kpɔɔ kuo. I nùn siaro handunian goonu nnɛ ye sɔɔ. Hunde koni be ba wãa nim wɔ̃ku sɔɔ, ka bɛɛ be i sĩimɔ gen wɔllɔ, ka sere be ba wãa n toma, i Yinni Gusunɔ siaro. 11Bɛɛ be i wãa gbaburu ka ten gberu kpaanɛba sɔɔ kpuro, i nɔɔgiru suo i Gusunɔ siara. Bɛɛ Kedaan bweseru, i ku nɔɔ mari, i Gusunɔ siaro. Bɛɛ bèn wuu ga sɔ̃ kperu wɔllɔ, i kuuki koowo guunu wɔllun di ka nuku dobu. 12Bɛɛ be i wãa n toma, i Gusunɔ bɛɛrɛ wɛ̃ɛyɔ, kpa i nùn tɔma. 13Yinni Gusunɔ u susimɔ u wee nge tabu kowo. U tabun gari wɔra nge tabu durɔ, ma u nɔɔgiru sue u kuuki mɔ̀, u win yibɛrɛba dam sɔ̃ɔsimɔ. 14Yinni Gusunɔ u nɛɛ, wee na nɔɔ mari na tii nɛnua n ka tɛ. Adama tɛ̃, kon nɔɔgiru sua nge tɔn kurɔ wi u yiire u kĩ u ma, ma u wasire u wom gabamɔ. 15Kon guunu ka gungunu kɔsuku, kpa n ye ya kpia gberasia. Kon daanun nim kpeerasia nu gbera woko woko, kpa n de yɛrusun nim mu gbera mam mam. 16Kon wɔ̃kobu sĩisia swaa ye ba ǹ yɛ̃ sɔɔ, kpa n de yam wɔ̃kuru tu gɔsia yam bururam ben wuswaaɔ. Kon de swɛɛ yi yi ǹ daa nɔɔ nɛ yi nɔɔ nɛra yi ko mara mara. Na ǹ kon ko na kun yeniba kpuro kue. 17Adama be ba bũnu naanɛ sãa ba nu sãamɔ, ba koo biruku yira wura ka seku bakaru. 18Yinni Gusunɔ u nɛɛ, bɛɛ Isireliba, bɛɛ be i sãa nge sosobu, i swaa dakio. Bɛɛ be i sãa nge wɔ̃kobu, i de i yam mɛɛri kpa i wa. 19Wara u sãa wɔ̃ko nge nɛn sɔm kowo. Wara u sãa soso ma n kun mɔ nɛn sɔmɔ wi na gɔra. Wara u sãa wɔ̃ko nge nɛn bɔrɔ. Wara u sãa wɔ̃ko nge nɛn sɔm kowo. 20Wee, u gãa dabinu wa, adama u ǹ nu garisi gãanu. U swasu wukie, adama u ǹ gari nɔɔmɔ. 21Yinni Gusunɔ u wooda baka gea yara win tɔmbun arufaanin sɔ̃. 22Adama yibɛrɛba ba ben yãnu gura kpuro, ma ba ben tii mwɛɛra ba kpɛ̃ɛ kpee baaba sɔɔ. Ba bu berua sere pirisɔm dirɔ. Ba bu wɔri ba yãnu gura. Goo sari wi u koo bu yakia, kpa bu yibɛrɛ be sɔ̃ bu yãa ni wesio. 23Ma Esai u nɛɛ, wara u koo yeni swaa daki bɛɛ sɔɔ. Wara u koo yɔ̃ra u ye swaa gãri saa tɛ̃n di. 24Wara u dera ba Isireli be ba sãa Yakɔbun bweseru wɔri ba ben yãnu gura. N ǹ Yinni Gusunɔn tii ro? Bɛsɛ Isireliba sa durum kua win wuswaaɔ. Sa yina su win woodaba swĩi, su ye mɛm nɔɔwa. 25Yen sɔ̃na u ka sun mɔru bara too. U dera ba sun tabu wɔri ka dam. Tabu sun sikerenɛ nge dɔ̃ɔ. Bu sun di, adama sa ǹ tuba. Sa ǹ mam laakari kue.

will be added

X\