1 Yinni Gusunɔ u nɛɛ, bɛɛ bèn tem mu toma, i swaa dakio i nɔ. I hania koowo i tii dam kɛ̃. I susima i ka gari gere, kpa su mɛnna su wesiana su gem kasu. 2 Wara u tabu durɔ goo seeyama sɔ̃ɔ yari yerun di ma u dera mi u dua kpuro u nasara wa. Wara u nùn bwesenu kpuro ka nin sinambu nɔmu sɔndia, ma u dera win takobi ya bu munka nge tua, ma win tɛma ya bu yarinasia nge yaka si woo ga ka doona. 3 U bu naa gira u ǹ wahala wa. U da sere mi win naasu kun yɛ̃. 4 Wara u dera yeni kpuro ya koora. Nɛna. Nɛ, Yinni Gusunɔ, nɛ, wi na bwesenu kpuro seeya saa toren di. Nɛna na gbiikoo, mɛya na kon maa wãa sere ka baadommaɔ. 5 Be ba wãa mi n toma ba wa ye na kua ma ba nanda ba diirimɔ. Be wee ba mɛnna ba susimamɔ. 6 Ba sominamɔ. Ben baawure u win winsim sɔ̃ɔmɔ u mɔ̀, u hania koowo. 7 Dãa dãko u seko dam kɛ̃mɔ. Wi u dãa wɔriasiamɔ u matalakagii dam kɛ̃mɔ. Ba mɔ̀, sii swɛɛbu bu wã. Ma ba bwãaroku giramɔ ba kulum kparemɔ, gu ku ka wɔruma. 8 Adama bɛɛ Isireliba, bɛɛ be i sãa Yakɔbun bibu, nɛn bɔrɔ Aburahamun bweseru sɔɔ, bɛɛya na gɔsa i n ka sãa nɛn sɔm kowobu. 9 Bɛɛya na soka na yarama saa tontonden di. Na ǹ bɛɛ biru kisi. Na bɛɛ gɔsawa i n ka sãa nɛn sɔm kowobu. 10 Yen sɔ̃, i ku nanda, domi na wãa ka bɛɛ. I ku wurura i n yam mɛɛra nge wɔnwɔndobu, domi nɛna na sãa bɛɛn Yinni. Kon maa bɛɛ dam kɛ̃. Wee na wee n bɛɛ somi, kpa n bɛɛ kɔ̃su ka nɛn dam. 11 Be ba ka bɛɛ mɔru mɔ̀, ba koo burisina bu sekuru wa. Be ba ka bɛɛ sannamɔ mi, ba koo kam ko bu gbi. 12 Baa ì n bu kasu, i ǹ bu wasi. Mɛya be ba ka bɛɛ tabu mɔ̀, ba koo kam ko bu gbisuku. 13 Domi nɛna na Gusunɔ bɛɛn Yinni wi u bɛɛ dam wɛ̃ɛmɔ. I ku bɛrum ko, na bɛɛ somiru wee. 14 Yakɔbun bweseru, bɛɛ be i tie i ǹ dam mɔ ma ba bɛɛ garisi nge kɔkɔminu, i ku nanda. Nɛ, Gusunɔ Isireliban Yinni Dɛɛro, na bɛɛ somiru wee. Na sãawa bɛɛn faaba kowo. 15 Wee, kon bɛɛ dam wɛ̃ nge naa tebo kpɔɔ ge ga sɔkia mɔ, kpa i guunu kɔsuku, i gungunu munia muku muku nu ko nge yaka bii. 16 I ko nu sarawa nge dobi, woo gu ka nu doona, kpa woo guna yu nu yarinasia, kpa i nuku dobu wa nɛn min di, nɛ, wi na sãa bɛɛn Yinni Dɛɛro, kpa i man bɛɛrɛ wɛ̃. 17 Sanam mɛ bɛɛ nɛn tɔmbu i wɔnwɔndu soore i nim kasu i ǹ wa, ma bɛɛn yari yi gbere nim nɔrun sɔ̃, nɛ, Gusunɔ bɛɛn Yinni, kon bɛɛ nɔɔri. Na ǹ bɛɛ derimɔ. 18 Kon de daanu nu yari saa guunun di, kpa bwii yi yari wɔwi sɔɔ, kpa nim bwenu ka daa koki yi koora mi tem mu gbere, gãanu ku ra kpi. 19 Kpa dãa ye ba mɔ̀ sɛduru ka akasia yu kpi mi, ka sere maa dãa kikisu gasu ka dãa ye ba mɔ̀ olifi, ka maa dãa bakanu ganu, 20 kpa tɔmbu bu wa ka nɔni, bu gia ma nɛ, Gusunɔ Isireliban Yinni Dɛɛrowa na yeni kua. 21 Gusunɔ Isireliban Yinni u nɛɛ, bɛɛ bũnu i kasuo nge mɛ i ko ka tii yina. I sɔ̃ɔsima nge mɛ i ko ka tii wɔra. 22 I na i sun sɔ̃ gari yi i raa gerua yellu, kpa sa n yɛ̃ yì n koora, kpa su yin laakari ko. Ǹ kun mɛ, i sun sɔ̃ɔwɔ ye ya koo na sia, kpa su gia ì n dam mɔn na nge nɛ Gusunɔ. I gea gaa koowo ǹ kun mɛ kɔ̃sa gaa, kpa su wa su nanda. 24 Adama i ǹ kpɛ̃ i gãanu ko. Bɛɛ ka bɛɛn sɔma kpuro i sãawa kam dirum. Wi u maa bɛɛ sãamɔ goo kun win mɛm kĩ. 25 Wee na goo seeya saa sɔ̃ɔ yɛ̃san nɔm geun di, ma u na saa sɔ̃ɔ yari yerun di u sĩimɔ ka nɛn yĩsiru. U wirugibu taakumɔ nge pɔtɔkɔ, nge mɛ weke kowo u ra sɔndu suni. 26 Wara u yenin gari gerua saa yellun di, su ka gere ma gari geeya. Goo kun yen gari gerure su sere nɔ. 27 Nɛ, Yinni Gusunɔ, nɛna na gbia na sɔmɔ gɔra u Yerusalɛmugibu labaari gea sɔ̃. 28 Na mɛɛra bũu ni sɔɔ, na ǹ bũu goo wa wi u nɛn gari gerumɔ. Nà n gari bikia, bũu goo sari wi u koo kpĩ u man wisi. 29 Domi ni ka nin sɔma nu sãawa kam dirum. Nin bwãarokunu nu maa sãawa wom dirum.
