1 Yeniban biru Mɛrodaki Baladani, Baladanin bii, Babilonin sina boko, u Esekiasi sɔmɔbu gɔria ka tireru ka kɛ̃nu. Domi u nua Esekiasi u bara ma u bɛkura. 2 Ye sɔmɔ be, ba tunuma Esekiasin mi, yera win nukura dora. Ma u ka bu da u bu sɔ̃ɔsi mi win arumani ya berua, ye ya sãa sii geesu ka wura ka turare ka gum nubu durorugim ka tabu yãnu ka ye ya wãa win arumani beru yerɔ kpuro gesi. Gãanu sari win dirɔ ka win tem kpuro sɔɔ ni u ǹ bu sɔ̃ɔsi. 3 Yen biruwa Gusunɔn sɔmɔ Esai u na u Esekiasi bikia u nɛɛ, man diya tɔn beni ba nun naawa. Ye ba tunuma, mba ba gerua. Ma Esekiasi u nùn wisa u nɛɛ, ba nawa saa tem ton tonden di mɛ ba mɔ̀ Babiloni. 4 Esai u kpam nùn bikia u nɛɛ, mba ba wa wunɛn yɛnuɔ. Esekiasi u nùn wisa u nɛɛ, ye ya wãa nɛn yɛnu ge sɔɔ kpuro ba wawa. Nɛn arumani sɔɔ gãanu sari ni na ǹ bu sɔ̃ɔsi. 5 Yera Esai u nùn sɔ̃ɔwa u nɛɛ, a swaa dakio a nɔ ye Gusunɔ, wɔllu ka tem Yinni u gerua. 6 U nɛɛ, tɔ̃ru gara sisi tè sɔɔ ba koo wunɛn arumani kpuro gura bu ka da Babiloniɔ, ka ye wunɛn baababa ba sweena ba nun deria. Yen gaa sari ye ba koo nun deria tɔ̃ɔ te. 7 Ba koo wunɛn tiin bweseru sɔɔ bibu mwɛɛri, kpa bu ka da Babiloniɔ bu bu matam ko bu ko sɔm kowobu yen sina kpaarɔ. 8 Yera Esekiasi u Esai wisa u nɛɛ, Yinni Gusunɔn gari yi a gerua mi, gari burɛya. Domi alafia ka bɔri yɛndu ta ko n wãa nɛn wãarun tɔ̃ru kpuro sɔɔ.
