Esai 38

1Saa ye sɔɔ, Esekiasi u bara sere u gɔɔ turuku kua. Ma Gusunɔn sɔmɔ Esai Amɔtin bii u na win mi, u nùn sɔ̃ɔwa u nɛɛ, amɛniwa Yinni Gusunɔ u gerua. U nɛɛ, a wunɛn yɛnugibu sɔ̃ɔwɔ ye baawure u koo ko wunɛn biru, domi kaa gbi. 2Yera Esekiasi u win wuswaa sĩiya u gana girari. Ma u kanaru kua. 3U nɛɛ, Yinni Gusunɔ, a suuru koowo. A yaayo ma na sĩa dee dee wunɛn wuswaaɔ, na wunɛn woodaba mɛm nɔɔwa, na maa kua ye n nun wɛ̃re. Yen biru u swĩ gem gem. 4Yera Yinni Gusunɔ u Esai sɔ̃ɔwa u nɛɛ, 5a doo a Esekiasi sɔ̃ a nɛɛ, amɛniwa nɛ, Yinni Gusunɔ na gerua. Nɛ, wi na sãa win baaba Dafidin Yinni, na nɛɛ, na win kanaru nua, na maa win nɔni yĩresu wa. Wee, kon win wãarun tɔ̃ru sosi wɔ̃ɔ wɔkura nɔɔbu, 6kpa n nùn faaba ko n nùn wɔra ka Yerusalɛmu sannu saa Asirin sina bokon nɔman di, kpa n ye kɔ̃su. (21) Ma Esai u nɛɛ, bu ka figien marum na bu mu pɛre Esekiasin bwisi te sɔɔ, kpa u bɛkura. (22) Ma Esekiasi u bikia u nɛɛ, yĩre terà ta koo man sɔ̃ɔsi ma kon da Yinni Gusunɔn sãa yerɔ. 7Ma Esai u nɛɛ, yĩre te wee te ta koo nun sɔ̃ɔsi ma Yinni Gusunɔ u koo win gari yibia yi u gerua. 8U koo de yãku yerun tiro gu dɛ̃ɛbu kaara ten yɔɔtian naa dabusanu wɔkurun saka. Ma ga kaara naa dabusanu wɔku te. 9Sanam mɛ Esekiasi u bɛkura, u womu kua u nɛɛ, 10na raa gerumɔ nɛn gɔ̃ruɔ na mɔ̀, nɛn wãarun suunu sɔɔra kon da gɔribun wãa yerun kɔnnɔwɔ. Nɛn wɔ̃ɔ si su tie, na ǹ maa su dimɔ. 11Na nɛɛ, na ǹ maa Yinni Gusunɔ wasi handunia yeni sɔɔ. Mɛya na ǹ maa goo wasi tem mɛni sɔɔ mi wasoba wãa. 12Wee, ba man nɛn wãaru mwaari, ba tu swɛnyasia ba ka tonda nge yãa kparon kuu bekurugiru. Ba nɛn wãarun wɛ̃ɛ bura. Ma ba man kurua nge mɛ weso u ra beku yasa kure. Sɔ̃ɔ u sere kpe ba koo nɛn wãaru kpeerasia. 13Ma na tii deri sɛ̃ɛ sere ka bururu yam sãrerɔ. Yinni Gusunɔ u nɛn kukunu kɔsuka nge gbee sunɔ. Sɔ̃ɔ u sere kpe, u koo nɛn wãaru kpeerasia. 14Wee, na ra n wuri mɔ̀wa nge kpaaru baniku ge ga yɔ̃ɔwa. Kpa na n weeweenu mɔ̀ na n kukirimɔ nge totobɛrɛru. Na wɔllu twɛ̃ɛ ka wɔnwɔndu. Yinni Gusunɔ, na wãa nuku sakira bakanu sɔɔ. A man somiɔ. 15Mba kon maa gere, domi Yinni Gusunɔ u nɛn kanaru nua u man wisa. Kon sĩ ka tii kawabu sere nɛn wãarun tɔ̃ru tu ka kpe nɛn nuku sankira tenin biru. 16Yinni Gusunɔ, wunɛn durom saabuwa tɔnu u ka wãa. Domi mɛn saabuwa na ka wɛ̃siamɔ kpam. A man wãaru wesia ma na wãa. 17Wee, nɛn wahala ya gɔsira bɔri yɛndu, a wura a man yara siki wɔrun di wunɛn kĩrun sɔ̃. Domi a nɛn durum kpuro wɔka a kɔ̃ wunɛn biruɔ. 18Yinni Gusunɔ, n ǹ mɔ gɔribun wãa yera ta koo nun siara. N ǹ maa mɔ gɔɔwa u koo nun wɔlle sua. Be ba wãa siki wɔruɔ ba ǹ maa wunɛn durom yĩiyɔ. 19Adama wasowa u ra nun siare nge nɛ gisɔ. Ka tundo wi u ra win bibu sɔ̃ ma a naanɛ mɔ. 20Yinni Gusunɔ, wuna a man faaba kua. Sa ko bɛsɛn mɔrɔkunu ka baranu ka guunu so su ka nun siara bɛsɛn wãaru kpuro sɔɔ wunɛn sãa yerɔ.

will be added

X\