Esai 35

1Sanam mɛ sɔɔ, tem mi gãanu ku ra kpi, mu koo tem wurama kpa mu biibii burɛ kpi. 2Kpa nuku dobu bu sɔ̃ɔsira mi, ka womusu ka nasaran kuuki. Mu ko n girima mɔ nge Libanin dãa sɔ̃ɔ. Mu ko n bɛɛrɛ mɔ nge guu te ba mɔ̀ Kaamɛli ka Saronin tem gem. Saa ye sɔɔ, ba koo Yinni Gusunɔn yiiko wa ka yen girima. 3Yen sɔ̃ tɛ̃, bɛɛ be i wasire, i nɔma sãare, i tii tãsisio i nɔma sua. Bɛɛ be i diirimɔ, i de bɛɛn dũa yi dam ko. 4Bɛɛ bèn gɔ̃ru ga ǹ kpĩ, i ku nanda. I tii dam kɛ̃ɔ. Domi Gusunɔ bɛɛn Yinni u sisi u bɛɛ mɔru bara, kpa u bɛɛn yibɛrɛba kɔsie ye ba bɛɛ kua. Win tiiwa u koo na u bɛɛ faaba ko. 5Saa yera wɔ̃kobun nɔni koo wukiara, kpa sosobu bu gari nɔ, 6kpa kɔ̃ri kpirinugibu ba n yɔ̃ɔkumɔ nge kpasi. Mɛya wi u ku ra kpĩ u gari gere, win yara koo kusiara kpa u n nɔɔgiru mɔ̀ ka nuku dobu. Nim mu koo yari mu koku tem mi gãanu ku ra kpi sɔɔ, 7kpa yani sɛɛri mi sɔ̃ɔ ra gɛm wɔ̃ yi ko yɛru, kpa daru koki yi yari mi tem mu gbere, kpa naa yari ka gbĩi yi kpi mi gbeeku bɔ̃nu nu ra kuke. 8Miya ba koo swaa yara bu ye soku dɛɛrobun swaa. Durumgii goo kun dɔɔ mi. Be ba ye swĩi, ba ǹ kɔ̃ɔramɔ, baa be ba ǹ bwisi mɔ. 9Gbee sunɔ ǹ kun mɛ yaa gɔba gaa kun swaa ye sĩimɔ. Be Yinni Gusunɔ u faaba kua, beya ba koo swaa ye mwa, 10bu ka da Siɔniɔ ka nasaran womusu. Ben wuswaa ya n nuku dobu sɔ̃ɔsimɔ baadomma, kpa weeweenu ka nuku sankiranu nu bu doonari.

will be added

X\