Esai 34

1Bɛɛ bwese tukunu, i susima i nɔ. I bɛɛn laakari kpĩiyɔ. Tem mu swaa dakio ka ye ya wãa mɛ sɔɔ, ka sere ye mu marumɔ. 2Domi wee, Yinni Gusunɔn mɔru ya koo tɔmbu kpuro wɔri ka ben tabu kowobu sɔɔ kpuro. U koo de bu goona kpa bu kam ko. 3Ben yɛm mu ko n kokumɔ saa guunun di. Ben gonu ko n kɔ̃ɔkire, kpa nin nubura n pusa. 4Wɔllun kperi ka suru ka sɔ̃ɔ koo wukura, kpa wɔllu tu kure nge tireru, kpa kperi yi, yi wɔruku nge dãa wuru si su dɛlla. 5Yinni Gusunɔn takobi ya yɛm deba wɔllɔ. Wee, ya koo sarama yu Edɔmuba wɔri, be u siri u nɛɛ, bu kam koosio. 6Wee, takobi ye, ya yɛm ka yaa gum yiba. N sãare u ka yãanu ka bonu yãkuru mɔ̀ Botisiraɔ. Tɔn dabira ba sakira Edɔmu kpuro sɔɔ. 7Gbeeku kɛtɛba ka nɛɛ, yi wɔrukumɔ ka be sannu. Ma yɛm mu tem wukiri ma tua ya gum kure. 8Domi saa ya tunuma Yinni Gusunɔ u ka win yibɛrɛba mɔru kɔsia. Kpa u bu sɛɛyasia Siɔnin sɔ̃. 9Edɔmun nim mu koo gɔsira kontaa. Kpa yen tua yu ko nge gbim. Kpa yen tem mu dɔ̃ɔ mwaara nge kontaa. 10Dɔ̃ɔ wi, u ǹ gbimɔ sɔ̃ɔ sɔɔ ka wɔ̃kuru. Win wiisu su ko n seewawa sere ka baadommaɔ. Kpa tem mɛ, mu kam ko mam mam. Goo kun maa sarɔ mi. 11Gunɔ sarenu ka duuru bɛɛkuna nu ko n wãa mi. Boorosu ka gbanamgbaana nu koo sokunu ko mi. N koo kowa batuma dira. 12Ben sina bibu kpurowa ba koo kam ko. Goo kun ko n maa wãa wi u koo bandu di mi. 13Kikisu ka sãki ka awĩi yi koo kpi ben sina kpaanɔ ka ben kuku yenɔ, kpa nu ko purukanu ka taataanun wãa yenu, 14kpa gbeeku yɛɛ yi n ka dɛmakunu yinnamɔ mi, kpa bonu nu n sokunamɔ gbaburu mi. Miya wɔ̃kurun siiniba ba ko n ben wãa yeru mɔ kpa ba n wɛ̃re mi. 15Wɛɛ yi koo yin wãa yeru ko mi, yi sɛ̃a ke kpa yi kɔwa, kpa yi yin binu gure yin kɔkɔrɔ. Miya yaberekunu nu koo maa mɛnna. 16I Yinni Gusunɔn tireru wukio kpa i gari. I ko wa mi ba yorua ba nɛɛ, yɛɛ yinin gaa kun biaramɔ mi. Yi kpuro yi koo nawa. Domi win tiin nɔɔwa ga ye gerua. Win Hundewa u koo maa yi mɛnna. 17Wiya u tem mɛ yĩira, ma u mu yin baayere bɔnu kua ka tɛtɛ, mu n ka sãa yigim, kpa yi n wãa mi sere ka baadommaɔ.

will be added

X\