1 Bɔ̃ruroba bɛɛ, bɛsɛn yibɛrɛba. Domi i tɔmbu wɔri i ben yãnu gura ma i ka bu murafitiru kua, baa mɛ ba ǹ bɛɛ yen gaa kuare. Yen sɔ̃, ì n tɔmbu wɔri i kpa, i ben yãnu gura, ba koo maa bɛɛ kua nge mɛ. Mɛya saa ye i bu murafitiru kua i kpa, ba koo maa bɛɛ murafitiru kua. 2 Yinni Gusunɔ, a bɛsɛn wɔnwɔndu waawo, wuna sa yĩiyɔ. A de a n sãa bɛsɛn dam bururu baatere. Kpa a sun faaba ko sanam mɛ sa wãa nɔni swãaru sɔɔ. 3 Yibɛrɛba bà n wunɛn nɔɔ damguu nua, ba koo duki yakikira. À n maa seewa ba koo yarina. 4 Tɔmba koo ben yãnu wɔri bu gura nge mɛ twee yi ra tem wukiri yi dĩanu kpuro di. 5 Yinni Gusunɔ u kpã, domi u wãa wɔllɔ. U koo de win gem mu n yiba Siɔni kpuro sɔɔ. 6 Yinni Gusunɔ, kaa de Siɔnigibu ba n wãa bɔri yɛndu sɔɔ, kpa ba n bwisi ka laakari mɔ ye ya koo de bu faaba wa. Wunɛn nasiara ta sãa ben arumani. 7 Adama tɛ̃, wee tabu durɔbu ba kuuki mɔ̀, ba faaba kanamɔ. Be ba gɔra bu ka yibɛrɛba suuru kana bu nɔɔ tia ko ba kpana, ba wuri mɔ̀. 8 Tɔmbu ba ku ra maa sĩ swɛɛ sɔɔ. Domi yibɛrɛba ba ben arukawani kusia. Ba ǹ maa ben seedagibu yɛ̃. Ba ǹ maa goon bɛɛrɛ yɛ̃. 9 Wee tɔmbu ba ben gbea deri. Libanin dãa sɔ̃su su gberamɔ. Ma Saronin tem gem mu kua yani sɛɛri. Basanin bera gia ka guu te ba mɔ̀ Kaamɛliɔ dãnun wurusu dɛllamɔ. 10 Yinni Gusunɔ u bwese tukunu sɔ̃ɔwa u nɛɛ, yen sɔ̃ tɛ̃, kon se n yɔ̃ra, kpa n sɔ̃ɔsi nge mɛ na kpãaru nɛ. 11 Domi bɛɛn bwisikunu nu sãawa nge yaka bii yi ba duura. Nù n koora, nu koo kam kowa nge yaka si. Nɛn wɛ̃siaru ta ko n sãawa nge dɔ̃ɔ wi u koo bɛɛ mwa, 12 kpa i gɔsira nge kuku ni ba dɔ̃ɔ mɛni, ǹ kun mɛ nge sãki yi ba bɔɔra ba dɔ̃ɔ doke. 13 Bɛɛ be i toma ka bɛɛ be i wãa turuku, i swaa dakio i nɔ ye na kua, kpa i gia nge mɛ nɛn dam mu nɛ. 14 Durumgiba nanda Siɔniɔ. Be ba ǹ Yinni Gusunɔn bɛɛrɛ yɛ̃ ba diirimɔ ba mɔ̀, Yinni Gusunɔ u sãawa nge dɔ̃ɔ yari baka ye ya ku ra gbi. Wara u koo kpĩ u yɔ̃ra win wuswaaɔ, 15 ma n kun mɔ wi u sĩimɔ gem sɔɔ, ma u ku ra bwɛ̃ɛbwɛ̃ɛ taki di, u ku ra maa nɔm biran kɛ̃ru mwɛ, u ku ra tɔn gowobun gari swaa daki, u ku ra maa kã u kɔ̃sa mɛɛri. 16 Tɔnu win bwesera ko n wãawa nandabu sari nge wi u kukua kpee baa sɔɔ. U koo maa wa u di, u nɔ. 17 Sɔ̃ɔ teeru, kaa sina boko wa u wãa win yiikon girima sɔɔ, u bandu dii tem bakam sɔɔ. 18 Kaa wunɛn yellun bɛrum yaaya mɛ a raa mɔ saa ye a wãa yoru sɔɔ, kpa a nɛɛ, mana gbere mwaɔbu ba wãa. Mana wɔ̃ɔ gobigibu ba wãa. Mana gbãrarun kɔ̃sobu ba wãa. 19 A ǹ maa tɔn tuko be ba tii sue mi wasi, be, bèn barum a ǹ nɔɔmɔ. 20 A Yerusalɛmu mɛɛrio mi sa ra bɛsɛn tɔ̃ɔ bakanu ko. Kaa ye wa ya wãa bɔri yɛndu sɔɔ. Ya ko n sãawa nge kuu bekurugiru tèn dãnu ba ǹ maa wukamɔ. Mɛya ba ǹ maa ten wɛ̃ɛ kusiamɔ. 21 Miya Yinni Gusunɔ u koo sun win girima sɔ̃ɔsi. U koo de sa n wãa daa bakanun bɔkuɔ. Adama yibɛrɛban goo nimkusu ku ǹ kpɛ̃ su sĩ mi, baa si su kpãaru bo. 22 Wee, sin wɛ̃ɛ yi koo kasikira, kpa yi kun maa sin beka nɛni gbereba sɔɔ woo gu ka su bɔria. Yera n koo de bu bu dukia baka gurari. Baa ka yɛmɔbɔ ba koo da mi, bu ka yãa ni gura. Yinni Gusunɔwa u ko n sãa bɛsɛn siri kowo, kpa u sun wooda wɛ̃. Wiya u ko n sãa bɛsɛn sina boko. Kpa u sun faaba ko. 24 Goo kun maa gerumɔ u nɛɛ, u barɔwa. Yinni Gusunɔ u koo Yerusalɛmugibu ben durum wɔka.
