Esai 32

1Sɔ̃ɔ teeru goo u koo yari u bandu di kpa wi ka win bwãabu bu tem mɛ kpara gem sɔɔ. 2Ben baawure u ko n sãawa nge kuku yeru woo bɔkɔn sɔ̃, ǹ kun mɛ nge daaru mi kakoru sari, ǹ kun mɛ nge kpee bakarun saaru mi dãru garu sari. 3Be n weenɛ bu yam wa, ben nɔni koo wukiara. Be n weenɛ bu gari swaa daki, ba koo nɔ sãa sãa. 4Be ba ku ra bwisiku ba koo kasu bu gia. Be ba maa bebirimɔ ba koo gari gere dee dee tɔmbu bu ka nɔ. 5Ba ǹ maa gari bɔkɔ sokumɔ tɔn boko. Mɛya ba ǹ maa tɔn kɔ̃so sokumɔ tɔn geo. 6Domi gari bɔkɔ u ra gari swiniwa. Kɔ̃sa sɔɔra win bwisikunu nu ra n woo. Win kookoosu ka win gari kpuro ku ra Gusunɔ bɛɛrɛ wɛ̃. Mɛya u ku ra wi u gɔ̃ɔru barɔ dĩanu kɛ̃. U ku ra maa wi nim nɔru ga mɔ̀ nim kɛ̃. 7Tɔn kɔ̃son kookoosu kpuro su ku ra n wã. U ra kpunaa dabinu kowa u ka bwɛ̃ɛbwɛ̃ɛ kam koosia ka weesu, baa bwɛ̃ɛbwɛ̃ɛ wi, ù n gem mɔ. 8Adama tɔn geo, kpunaa gea u ra ko. U ra n maa yɔ̃wa gem sɔɔ dim dim. 9Bɛɛ tɔn kurɔbu, bɛɛ be i kun bwisikunu ganu mɔ bɛɛn wãaru sɔɔ, i seewo i nɛn gari nɔ. Bɛɛ wɔndia garu koo sariba, i man swaa dakio. 10Gasɔku amadaare, i ko i wurura, domi i ǹ maa resɛm wasi i sɔri. 11I de i nanda bɛɛ be i ǹ bwisikunu mɔ bɛɛn wãaru sɔɔ. Bɛɛ garu koo sariba i diirio. I bɛɛn yãnu potirio i yɔ̃ra basi, kpa i kĩasu dewe nuku sankiranun sɔ̃. 12I bɛɛn bwãsu nɛnuɔ, i ka nuku sankiranu sɔ̃ɔsi, yèn sɔ̃ bɛɛn gbee geenu ka bɛɛn resɛm gbaa geenu nu koo kam ko. 13Wee Yinni Gusunɔn tɔmbun tem ka yɛnu gèn mi nuku dobu raa wãa, n koo ko bansu, kpa sãki yi kpi mi. 14Ba koo ben sina kpaaru biru kisi kpa Yerusalɛmu ye ya raa tɔmbu yiba bu ye deri. Yen guuru ka yen kɔ̃sobun wãa yenu nu koo ko bansu. Yɛɛ kpiki yi ko n da bɔsu mi, kpa bu maa yaa sabenu kpara mi. 15Adama Gusunɔn Hunde u koo sarama wɔllun di u n wãa bɛsɛ sɔɔ. Saa yera mi dĩanu ku ra raa kpi, n koo dĩanu ko, kpa yam mi dãnu kun daa dabi, n ko dãa sɔ̃ɔ. 16Saa ye sɔɔra gem mu ko n wãa tem mɛ kpuro sɔɔ. 17Mɛya mu koo ka bɔri yɛndu na, ka wɛ̃rabu bɛrum sariru sɔɔ sere ka baadommaɔ, 18kpa bɛsɛ Yinni Gusunɔn tɔmbu sa n wãa mi, bɔri yɛndu sɔɔ dii naanɛginɔ. 19- 20Sa ko n wãawa doo nɔɔru sɔɔ sa n dĩanu duurumɔ mi nim mu wãa, kpa sa n bɛsɛn kɛtɛkunu ka bɛsɛn nɛɛ yɔ̃su yi n dimɔ baama. Adama guru kpenu nu koo yibɛrɛban tabu kowobu kam koosiawa be, be ba dabi nge dãa sɔ̃ɔ, kpa ben wuu ge, gu wɔruma.

will be added

X\