1 Bɔ̃ruroba Yuda be ba kpikiru dɔɔ Egibitiɔ bu ka somiru wa. Ba ben naanɛ doke dumi sɔɔ, ka tabu kɛkɛ dabi ni dumi gawe sɔɔ ka sere maasɔ damgibu sɔɔ. Adama ba ǹ Gusunɔ ben Yinni Dɛɛro kasu, bu nùn naanɛ ko. 2 Yen sɔ̃na win tii u yɛ̃ ye u mɔ̀. U koo de kɔ̃sa yu na. U ǹ maa win gari kɔbiamɔ. U koo tɔn kɔ̃sobu seesi, ka maa be ba bu somimɔ. 3 Egibitigibu ba ǹ sãa Gusunɔ, ba sãawa tɔmbu. Mɛya maa ben dumi yi ǹ dam tukum gam mɔ, yi sãawa yɛɛ diri. Yinni Gusunɔ ù n win dam sɔ̃ɔsima, be ba somiru kasu ka be ba bu somiru wee, ba koo sokura bu wɔruku, kpa be kpuro bu mɛnna bu gbi. 4 Amɛniwa Yinni Gusunɔ u man sɔ̃ɔwa u nɛɛ, gbee sunɔ ge ga yaa mwa ga wuri koosimɔ ga ku ra yãa kparobun bɛrum ko, baa bà n dabi ma ba gu tarusi ba gbãsukumɔ. Nge mɛya wi, wɔllu ka tem Yinni, u ko n sãa ù n sarama u ka Siɔnin guuru kɔ̃su, u tu sanna. 5 Nge mɛ gue yi ra n yin binu kɔ̃su, nge mɛya wi, wɔllu ka tem Yinni, u koo Yerusalɛmu yakia u ye kɔ̃su. 6 Yen sɔ̃, bɛɛ Isireliba, bɛɛ be i ka Yinni Gusunɔ wi tonda n kpã, i gɔ̃ru gɔsio kpa i wurama win mi. 7 Domi saa ya sisi yè sɔɔ bɛɛn baawure u koo win bwãaroku ni u seka ka sii geesu ka wura wuna u kɔ̃ ni nu nùn durum koosiamɔ. 8 Mɛya ba koo Asirigibu kam koosia, adama n ǹ ka tɔnun dam. Ba koo duki yarina tabu sɔɔ kpa bu ben aluwaasiba mwɛɛri bu yoo sɔma koosia. 9 Ben sina boko u koo duka yakura bɛrum sɔ̃. Kpa ben tabu sinambu bu bɛrum soora bu ben gidi bɔra biru kisi bu doona. Yeniwa Yinni Gusunɔ u gerua wi ba ra sã Yerusalɛmuɔ ka yãku dɔ̃ɔ mwaararuginu.
