Esai 30

1Yinni Gusunɔ u nɛɛ, bɔ̃ruroba Yudaba be ba ku ra mɛm nɔ. Ba ku ra man saawara ko bà n wesianamɔ. Kpa bu ka gabu arukawani bɔke ba kun nɛn kĩru bikie. Ba tii durum guremɔ ba sɔbimɔ ba dɔɔ. 2Be wee ba kpikiru dɔɔ Egibitiɔ ba ǹ man saawara kue. Ba faaba kasu Egibiti sunɔn mi. 3Adama u ǹ kpɛ̃ u bu faaba ko. U koo bu sekuru dokewa. 4Wee ben wirugibu ba tura ba wãa Soaniɔ kɔ. Mɛya maa ben gɔro be, ba Hanɛsi tura. 5Adama be kpuro ba koo sekuru di Egibitigibun sɔ̃, domi ba ǹ kpɛ̃ bu bu faaba ko. Ba koo bu sekuru dokewa kpa bu bɛɛrɛ bia. 6Wee Yudaba ba ben yaa sabenu sɔmunu sɔbi ba ka dɔɔ sɔ̃ɔ yɛ̃san nɔm dwaru gia mi nuku sankirara wãa. Domi gbee sinansu su wãa mi, ka surɔkɔnu ka sere wɛɛ nanumgii gɛɛ. Tɔn be, ba ben dukia ka ben arumani kpuro kɛtɛkunu ka yooyoosu sɔbi, ba ka Egibitigibu daawɔ, be ba ǹ koo bu arufaani gaa kua. 7Domi ben somiru ta sãawa kam. Yen sɔ̃na na Egibiti ye sokumɔ waa ye ya kun dɛ̃ɛ mɔ. 8Gusunɔ u Esai sɔ̃ɔwa u nɛɛ, tɛ̃, a ye kpuro yoruo kpee bɛsi sɔɔ ka tirenɔ Yudaban wuswaaɔ kpa ya n yii mi, ya n sãa seeda sere ka baadommaɔ. 9Domi tɔn be, ba sãawa mɛm nɔɔ sariba ka wee kowobu. Ba swaa tau, ba ǹ kĩ bu sɔ̃ɔsiru swĩi. 10Ma ba yam waobu sɔ̃ɔmɔ bu ku yam wa. Mɛya ba maa nɛn sɔmɔbu sɔ̃ɔmɔ bu ku bu gari gee sɔ̃. Adama bu bu gari dori sɔ̃ɔwɔ baa ǹ n mɛren na. 11Bu swaa ye derio kpa bu ku maa bu nɛ, Isireliban Yinni Dɛɛron gari sɔ̃. 12Ma Esai u Yudaba sɔ̃ɔwa u nɛɛ, amɛniwa Gusunɔ bɛɛn Yinni Dɛɛro u bɛɛ sɔ̃ɔmɔ. U nɛɛ, yèn sɔ̃ i gari yi yinamɔ ma i tii yɔ̃su daa bɔɔbɔya sɔɔ, ka weesu sɔɔ, ma i tãsa ye sɔɔ, 13tora nini, nu koo bɛɛ ko dam sarirugibu, kpa i wɔruma subaru sɔɔ, nge gana ye ya beu mɔ. 14I ko i kɔsikirawa muku muku nge wekeru tèn kɛ̃ka ba ǹ kpɛ̃ bu ka dɔ̃ɔ gura, ǹ kun mɛ bu ka nim sɔka. 15Adama u wure u nɛɛ, ì n gɔ̃ru gɔsia i wurama win mi laakari sɔɔ, i ko faaba wa. Mɛya ì n kua tɛɛru i nùn naanɛ doke, i ko dam wa. Adama i ǹ mɛ kĩɛ. 16I nɛɛ, i ko yakurawa ka dumi. Yen sɔ̃na u koo maa de i yakura. I nɛɛ, i ko dawa ka dumi yi yi duki mɔ. Yen sɔ̃na u koo de be ba koo maa bɛɛ naa gira ba n sãu. 17Bɛɛn nɔrɔbu (1.000) bà n yibɛrɛ turo wa, ba koo duki yarina. Yibɛrɛba nɔɔbu ba koo maa bɛɛ kpuro yarinasia kpa i da i n sebi sebi nge dɛka ye ba gire guuru wɔllɔ. 18Yinni Gusunɔ u tɔ̃ru mara tè sɔɔ u koo bɛɛ durom kua kpa u bɛɛ wɔnwɔndu sɔ̃ɔsi. Domi u sãawa gemgii. Doo nɔɔrugiba be ba nùn naanɛ sãa. 19Bɛɛ Yerusalɛmugibu, bɛɛ be i wãa Siɔnin guurɔ, bɛɛn goo kun maa sumɔ. Yinni Gusunɔ u koo bɛɛn wɔnwɔndu wa sanam mɛ i nùn soka. Ù n bɛɛn nɔɔ nua, u koo bɛɛ wurari. 20U koo bɛɛ dĩanu wɛ̃ i di nɔni swãarun saa sɔɔ, kpa u bɛɛ nim wɛ̃ i nɔ wahalan saa sɔɔ. Wi, wi u bɛɛ keu sɔ̃ɔsimɔ u ǹ maa kukumɔ bee tia. I ko i nùn wa. 21Ì n sĩa i tura swaa kɛɛnanɔ, bɛɛn swaa koo gari yi nɔ, yi yi nɛɛ, swaa wee, i sĩiyɔ ye sɔɔ. 22I ko i bɛɛn sii geesu ka wura ye i raa bɛɛn bwãarokunu pote garisi disi, kpa i bwãaroku nin kɛ̃ki yari nge kubanu, kpa i nɛɛ, bu ka nu yario saa min di. 23Saa yera Gusunɔ u koo de gura yu nɛ bɛɛn dĩa ni i duura sɔɔ, kpa dĩa ni, nu gea ko nu ma. Saa ye sɔɔra, yaa sabenu koo yakasu di batuma baka sɔɔ. 24Nɛɛ yi ba ka sɔmburu mɔ̀ ka sere kɛtɛkunu nu koo dobi di yi ba bɔru yɛ̃ka. 25Nim tori yi ko yi n wãawa guu bakanun wɔllɔ, ka gungunu wɔllɔ, dɔma te ba koo tɔmbu go bu ben kuku yenu kɔsuku. 26Kpa Yinni Gusunɔ u win tɔmbun bosu nɔɔri, kpa u bu bɛkia mi u bu mɛɛra kua. Dɔma tera, surun yam bururam mu koo ko nge sɔ̃ɔgim, kpa sɔ̃ɔgim mu dora mu sosi nɔn nɔɔba yiru n kere yellu. 27Wee Yinni Gusunɔn yĩsira nɔɔramɔ saa tontonden di. Win mɔru ya kpã ya sãa nge dɔ̃ɔ wii bakaru. Win nɔɔ ga mɔru yiba. Ma win yara ya sãa nge dɔ̃ɔ yari bakaru. 28Win mɔrun wɛ̃siaru ta sãawa nge daaru te ta nim yiba ta tɔnu mwɛɛ sere wĩirɔ, u ka tɔmbu kam koosia, ma ta sãa nge yaruka ben nɔsɔ u ka bu da mi ba ǹ kĩ. 29I ko i womusu ko nge mɛ i ra ko Gɔɔ sararibun tɔ̃ɔ bakaru sɔɔ wɔ̃kuru, kpa i n nuku dobu mɔ nge wi u guuru soomɔ u ka sĩimɔ sanam mɛ i sãaru dɔɔ Yinni Gusunɔn guurɔ, wi, wi u sãa Isireliban dam. 30Saa yera u koo de win nɔɔ damguu ge, gu nɔɔra. Win mɔru baka ye, yà n seewa u koo win dam sɔ̃ɔsi dɔ̃ɔ boko ka nim yibu bakaru ka guru woo bɔkɔ ka guru kpenu sɔɔ. 31Yinni Gusunɔ ù n gbãra, Asirin sina boko u koo nanda u diiri. Domi u koo nùn sɛɛyasia ka win bokuru. 32Mɛ̀n nɔɔ u gesi nùn boku te so, gãasu ka mɔrɔkuna nu koo nɔɔra. U koo nùn sowa ka dam. 33Saa yellun di ba wi sina bokon kpaku yeru kua ta wãa mi. Ta duku, ta maa yasu. Ma ta dɔ̃ɔ mɔ ta maa dãa yiba. Wee Yinni Gusunɔn mɔrun wɛ̃siaru ta dɔ̃ɔ wi yabiamɔ nge gbim mɛ ba dɔ̃ɔ doke.

will be added

X\