Esai 3

1Esai u nɛɛ, Gusunɔ, wɔllu ka tem Yinni, u koo Yerusalɛmugibu ka Yudaba kpuron arumani kpeerasia. Ba ǹ maa dĩanu ka nim wasi. Ba ǹ maa somiru garu wasi gam di. 2- 3Domi u koo ben tabu durɔ damgibu ka ben tabu kowobu wuna u go, ka ben siri kowobu ka ben sɔrobu ka guro gurobu ka be ba sãa tabu kowobu weeraakuukuubun wirugibu ka ben sina asakpɔbu ka ben bwisi kɛ̃ɔbu ka ben nɔman sɔm kowo kpokoba ka ben timgii gisonkoba ka mam wi, Gusunɔn sɔmɔbun tii. 4U koo de aluwaasiba ba n bu kpare nge mɛ ba ka kĩ. 5Tɔmba koo dam dɔrena. Aluwaasiba ba koo durɔ tɔkɔnu seesi, kpa garu ko sariba bu damgibu nɔni du. 6Saa ye sɔɔ, tɔnu u koo win wɔnɔ sɛ̃re u nɛɛ, wunɛ a yãnu mɔ. Yen sɔ̃, a koowo bɛsɛn yɛnu yɛ̃ro, kpa a bɛsɛn yɛnu seeya. 7Adama u koo nùn wisi u nɛɛ, na ǹ yen tim mɔ. Dĩanu sari yɛnu ge sɔɔ, yãnu maa sari mi. A ku man ko bɛɛn yɛnu yɛ̃ro. 8Esai u maa nɛɛ, Yerusalɛmu ya bãarimɔ, ma Yuda ya wɔrukumɔ yèn sɔ̃ ba Yinni Gusunɔ seesi ka ben gari ka ben kookoosu. Ba ǹ win bɛrum mɔ. 9Ben kookoosu su ben daan seeda dimɔ. Ben daa kɔ̃sa kun berua. Ba ye mɔ̀ batuma sɔɔ nge Sodomugibu. Bɔ̃ruroba ba sãa, domi bɔ̃riya ba tii sɔɔru kuammɛ mi. 10A gemgii sɔ̃ɔwɔ ma u koo kuura. U koo win sɔmburun are wa. 11Adama bɔ̃rurowa wi u nuku kɔ̃suru mɔ. U ko n wãawa nuku sankiranu sɔɔ, domi win sɔmburun areya u koo wa. 12Aluwaasiba ba Yinni Gusunɔn tɔmbu dam dɔremɔ. Ma tɔn kurɔbu ba sãa ben yinnibu. Be ba bu kpare ba bu torasiamɔ. Ba ben swaa go ye ba raa swĩi. 13Yinni Gusunɔ u na u yɔ̃ u ka win tɔmbu siri. 14U win siribu torua ka win tɔmbun guro gurobu, ka ben wirugibu. U nɛɛ, i tɔmbun dĩanu wɔra ma i ye i sãarobu mwaari yii bɛɛn yɛnusɔ. 15Mban sɔ̃na i nɛn tɔmbu dam dɔremɔ, ma i sãarobu taki dimɔ. Nɛ, Yinni Gusunɔ, wɔllu ka tem Yinniwa na yeni bikiamɔ. 16Yinni Gusunɔ u maa nɛɛ, wee Yerusalɛmun tɔn kurɔbu ba tii sue. Ma ba sĩimɔ ba yɛ̃kɔ mɔ̀, ba wĩinu dɛmiɛ. Ba ǹ sekuru mɔ, ba ben naasun sumi soonamɔ. 17Yen sɔ̃na kon de bu ko wii kparanugibu, kpa n bu terenu yɔ̃su. 18Saa ye sɔɔ, kon ben bura yãnu kpuro wuna. Niya ben naasun sumi ka ben serin bura yãnu ka ben sababa yi yi ka suru kɛ̃ka weenɛ, 19ka ben swaa tonkunu, ka ben sumi ka ben sɔnditii, 20ka yasi, ka yɔni yi ba doke naasɔ ka ben sɛ̃katii, ka ben yɔrɔmannin bɔki, 21ka ben taabu nɔmaginu ka wɛ̃ruginu, 22ka ben yãa gobiginu, ka yabe bakanu ka ben bɔɔnu, 23ka digiba, ka yãa ni nu ǹ sinum mɔ, ka yasi, ka sere sɔnditii. 24Ba ǹ maa turaren nuburu nɔɔmɔ ma n kun mɔ nubu kɔ̃suru. Ba ǹ maa sɛ̃katii sɛ̃kemɔ ma n kun mɔ wɛ̃ɛ. Ba ǹ maa seri wasi wirɔ bu tari. Wii pɔnna ba ko n mɔ. Ba ǹ maa yabe bakanu sebumɔ sere saakiba nuku sankiranun sɔ̃. Ben buram kun maa sɔ̃ɔsiramɔ. Sekura ba koo wa. 25Ba koo Yerusalɛmun tɔmbu ka yen tabu durɔbu go tabu sɔɔ. 26Tɔmba koo wuri ko bu gɔɔ swĩ yen gbãra kɔnnɔwɔ nge tɔn kurɔ wi ba wɔri ba win yãnu gura ma u sɔ̃ temɔ.

will be added

X\