Esai 29

1Ariɛli, Ariɛli, wunɛ wi ba mɔ̀ Yerusalɛmu, mi Dafidi u win wãa yeru kua, a sãawa bɔ̃rura. A n wunɛn wɔ̃ɔ ka wɔ̃ɔ tɔ̃ɔ baka ni mɔ̀ a n dɔɔ. 2Adama kon nun wɔri, kpa wuri ka weeweenu nu nɔɔra wunɛ sɔɔ, kpa a ko nge nɛn yãku yeru. 3Kon de tabu kowobu bu nun tarusi, kpa bu ben tabu sĩa yi yi bu ka nun sikerena. 4Ba koo nun sura. Kaa gari geruma tem di, adama tua kun derimɔ yi yari. Wunɛn nɔɔ ga koo nɔɔra nge siinin nɔɔ. Tuan diya ba ko n gu nɔɔmɔ kutu kutu. 5Wunɛn yibɛrɛba ba ko n dabiwa nge tua, kpa ba n pusa nge doo dirisu. 6Adama subaru sɔɔ Gusunɔ, wɔllu ka tem Yinni u koo na u bu sɛɛyasia ka guru gbãsukubu ka tem yĩirubu, ka wɔki bakanu ka woo guna ka guru woo bɔkɔ, ka sere maa dɔ̃ɔ boko, 7kpa tabu kowo dabi te, te ta nun wɔri mi, ta wunɛn gbãraru tarusi, tu doona nge dosu. 8Nge mɛ wi gɔ̃ɔra mɔ̀ u ra dosi u nɛɛ, u dimɔ, adama ù n dom yanda kpa u deema nukurɔ gãanu sari. Ǹ kun mɛ nge mɛ wi nim nɔru ga mɔ̀ u ra dosi u nɛɛ, u nim nɔrumɔ, adama ù n dom yanda kpa win gɔ̃ru ga n gbere, u n wasire, nge mɛya tabu kowo be, ba ko n sãa be ba koo na bu Siɔnin guu te wɔri. 9I biti sooro, kpa i nɔni yimɛ i ko nge wɔ̃kobu. Wee i sãare i tam goore, adama i ǹ tam nɔra. I bãarimɔ, adama n ǹ tam bɔɔbɔm sɔ̃. 10Domi Yinni Gusunɔ u bɛɛn laakari sikarisia, u win sɔmɔbu ka bɛɛn sɔrobun nɔni wɔ̃kua. 11Gari yini kpuro yi ko n bɛɛ sãawɛwa nge tire te ba wukiri ba yĩreru koosi. Ma ba tu goo wɛ̃ wi u garibu yɛ̃ ba nɛɛ, u tu gario. Ma u wisa u nɛɛ, u ǹ kãkɔ u tu gari, domi ba tu yĩreru koosiwa. 12Ǹ kun mɛ nge tire te ba goo wɛ̃ wi u kun garibu yɛ̃, ba nɛɛ, u tu gario. Ma u wisa u nɛɛ, u ǹ garibu yɛ̃. 13Yinni Gusunɔ u nɛɛ, bwese teni tà n nùn sãamɔ, nɔɔwa ta ra ka nùn bɛɛrɛ wɛ̃. Ben gɔ̃ru ga ka nùn toma. Tɔmbun wooda ka ben sɔ̃ɔsina ba swĩi, ba ka nùn sãamɔ. 14Yen sɔ̃na u koo de bu biti soora ka sɔm maamaakiginu. U koo de ben laakarigibun laakari yu kam ko. Kpa ben bwisigibun bwisi yi kpe. 15Bɔ̃ruroba bɛɛ be i ra bɛɛn himba Yinni Gusunɔ berue, kpa i n bɛɛn kookoosu mɔ̀ yam wɔ̃kuru sɔɔ, kpa i n gerumɔ i n mɔ̀ wara u bɛɛ waamɔ, nge wara u bɛɛ yɛ̃. 16Daa kɔ̃sagibu bɛɛ! Ba ku ra mɔmɔ garisi nge sɔndu. Tem mɔndu ta ǹ kpɛ̃ tu mɔmɔ sɔ̃ tu nɛɛ, n ǹ wi, u tu kua, ǹ kun mɛ tu nùn sɔ̃ tu nɛɛ, u ǹ bwisi mɔ. 17Saa fiiko sɔɔ, Libani ya koo gɔsia dãa gbaaru kpa ta n sãa nge dãa sɔ̃ɔ. 18Saa ye sɔɔ, sosobu ba koo tire ten gari nɔ. Wɔ̃kobu ba koo yam wa, kpa bu yari yam wɔ̃kurun di. 19Nɛ, Yinni Gusunɔ, kon de wɔnwɔndobu ba n yɛ̃ɛrimɔ ba n dɔɔ, kpa sãarobu bu nuku dobu ko, nɛ, Isireliban Yinni dɛɛron sɔ̃. 20Domi be ba ra tɔmbu dam dɔre ka tɔn yaako kowobu ba koo kpe, kpa kɔ̃san kowobu ba kun maa wãa. 21Kon maa be ba ra tɔmbu taarɛ wɛ̃ siri yerɔ kpeerasia, ka be ba ra tɔmbu yina bɛrie be ba ka tii yinamɔ, ka be ba ra gemgii win gem bire siri yerɔ. 22Yen sɔ̃na nɛ, Yinni Gusunɔ, nɛ wi na Aburahamu yakia, na win debubu Isirelin yɛnugibu sɔ̃ɔwa na nɛɛ, tɛ̃, ba ǹ maa sekuru wasi. Mɛya ben wuswaa kun maa burisinamɔ. 23Domi sanam mɛ ben bibu ba koo nɛn nɔman sɔma wa, ye na kua ben suunu sɔɔ, ba koo nɛn yĩsiru bɛɛrɛ wɛ̃, kpa bu man nasia, nɛ, Gusunɔ ben Yinni dɛɛro. 24Bèn bwisikunu nu raa tondɔ, ba koo bwisi wa. Be ba ku ra raa maa gari wure, ba koo gari wura.

will be added

X\