Esai 28

1Bɔ̃rura Samari ye ya sãa nge sina furɔ ge Efaraimuba ba ka tii sue. Ya wɔwa tuke ye ya tem gem mɔ. Ma ya sãa yen buraru nge dãa wɛ̃ɛ si tɔmba ra doke wirɔ ba ka tam goore. 2Wee tɛ̃, Yinni Gusunɔ u goo sɔɔru kua wi u dam mɔ u ka ye wɔri. Win dam mu sãawa nge guru kpenu, ǹ kun mɛ nge woo bɔkɔ ge ga ra asɔrɔ ko, ǹ kun mɛ nge guru baka. U koo wuu ge surawa temɔ. 3Wuu ge, ge Efaraimuba ba ka tii sue mi, ga wɔra ba taakumɔ, 4nge dãa wɛ̃ɛ si su dɛlla. Ga sãawa nge dãa marum mɛ mu yellu ye, ma ba yande sɔra ba di. 5Sɔ̃ɔ teeru, Yinni Gusunɔ Dam kpurogiin tiiwa u koo bandu di kpa u n sãa win tɔn be ba tian sina furɔ burɔ ka ben buraru. 6U koo siri kowobu kpara bu ka siri dee dee. Mɛya u ko n maa sãa ben dam bu ka yibɛrɛba naa gira sere ben wuun gbãrarun kɔnnɔwɔ. 7Adama tɛ̃, baa ka Gusunɔn sɔmɔbu ka yãku kowobu, tam bɔɔbɔm mu bu tirekiramɔ ma ba bãarimɔ mɛn sɔ̃, sere Gusunɔn sɔmɔbu ba ǹ maa win gari mɔ̀ dee dee. Yãku kowobun tii ba ǹ maa kpɛ̃ bu siri dee dee. 8Ben dii yenɔ aye dɛɛraru sari. Sianu ka kubana nu yiba mi. 9Ba gerumɔ ba mɔ̀, wara na kĩ n keu sɔ̃ɔsi. Wara u koo ka nɛn gari sɔmburu ko, ma n kun mɔ bii wi ba bɔm kara. 10Ba mɔ̀, na bu keu mɔ̀ tɛɛru. Na bu wooda wɛ̃ɛmɔ tia tia. Na yen wiru ka naasu tubusiamɔ nge wi u bii piiminu keu sɔ̃ɔsimɔ. 11Yen sɔ̃ tɛ̃, Gusunɔ u koo de goo u ka bu gari ko ka barum tukum mɛ ba ǹ nɔɔmɔ. 12Domi u bu sɔ̃ɔwa bu de wi u wasira u wɛ̃ra. Wɛ̃ra yera maa wãa mi, adama ba ǹ kĩ bu win gari wura. 13Yen sɔ̃na win wooda ko n bu sãawɛ bii sɔ̃ɔsiru te ba sɔ̃ɔsimɔ tɛɛru tɛɛru, tia tia. Ka mɛ, ba koo sokura bu wɔruma bu bɔɔkira, kpa bu yina mwaara. 14Tɛ̃ bɛɛ yaako kowobu, bɛɛ be i Yerusalɛmugibu dam dɔremɔ, i swaa dakio i nɔ ye Yinni Gusunɔ u gerumɔ. 15Bɛɛ be i gerumɔ i mɔ̀, wee i ka gɔɔ ka gɔribun wãa yeru arukawani bɔkua. Baa wahala yà n tunuma ya banda, ya ǹ bɛɛ turi. Adama i n yɛ̃ ma weesa su kua bɛɛn kuku yeru. 16Yen sɔ̃na Yinni Gusunɔ u nɛɛ, wee u kperu swĩi Siɔniɔ, ta kua win kpɛɛkpɛɛku. Kpee te, ta sãawa kpee gobigiru te u gɔsa, ta kua gani gɔmburun dam. Wi u tu kua win tãsi yeru u ǹ wɔrumamɔ. 17Wee, u gem nɛni nge banɔbun wɛ̃ɛ yi ba ra ka diru yĩire, ǹ kun mɛ ben nifo ye ba ra ka ganan sikirabu mɛɛri. Guru kpenu nu koo wee si kpuro kɔsuku si su kua bɛɛn kuku yeru mi. Nim bakam mu koo su mwɛ. 18Bɛɛn arukawani ye i raa ka gɔɔ bɔkua ya koo kam ko. Kpa ye i raa ka gɔribun wãa yeru bɔkua ya kun maa wãa. Yibɛrɛba bà n bɛɛ wɔri ba asɔrɔ kua ba koo bɛɛ taakuwa. 19Ba ko n bɛɛ taakumɔwa saa kpuro nge mɛ̀n nɔɔ ba saramɔ. Domi ba ko n da sarewa bururu baatere ka maa sɔ̃ɔ sɔɔ ka wɔ̃kuru, kpa i bɛrum soora ì n ben labaari nua. 20Nge mɛ ba ra gere, bu nɛɛ, kpin yera kun dɛ̃ɛbu turi a ka tii dɛmia. Bekura kun maa yasum turi a ka wukiri. 21Domi Yinni Gusunɔ u koo tabu ko nge mɛ u raa kua Perasimun guurɔ. U koo mɔru bara nge mɛ u raa kua Gabaonin wɔwaɔ, u ka win sɔm maamaakigia sɔ̃ɔsi ye ba ǹ waare. 22Tɛ̃, i ku maa de i n wãa yaako kookoosu sɔɔ, kpa bu ku raa maa bɛɛ nɔni swãaru sosia. Domi na nua ma Gusunɔ, wɔllu ka tem Yinni, u himba yi u ka tem mɛ kpuro kpeerasia. 23I swaa dakio i nɔ. I swaa tem kpĩiyɔ i nɛn gari nɔ. 24Wi u gbaaru kɔramɔ u ka dĩanu duure u ku ra n kɔrɔ tɔna mɔ̀ u n dɔɔ baadomma. 25Ù n kɔra u kpa, u ra mi dĩa bwese bweseka duurewa bɛɛru ka bɛɛru. Kpa u maa dĩanu ganu duure nɛnɛm gbaa ten goorɔ. 26Gusunɔ wi u sãa win Yinni wiya u nùn bwisi kã. U nùn yen kpunaa sɔ̃ɔsi. 27U ku ra dobi so ka tebo, u ra yi sowa ka bokuru. U ku ra mɔri so ka dam, u ra yi sowa ka boku piibu. 28U ra alikama sure, adama u yen saka yɛ̃ yu ku ka munkira. 29Yenin tii ya weewa Gusunɔ, wɔllu ka tem Yinnin min di. Win bwisi kɛ̃ru ta sãawa maamaaki. Win laakari ya maa kpã.

will be added

X\