1 Yinni Gusunɔ, wuna a sãa nɛn Yinni, wuna kon tɔma, kpa n wunɛn yĩsiru wɔlle sua. Domi a gãa bakanu kua, wunɛn himba ye a yi saa yellun di, ya ǹ kɔsa. 2 A dera wuu ge, ga wɔruma ga kua nge kpee ni ba suba. Ma wuu ge ga gbãraru mɔ ga kua bansu. A dera tii suobun wuun gbãranu nu wɔruka. Ba ǹ maa nu seeyamɔ sere ka baadommaɔ. 3 Yen sɔ̃na bwese damginu nu nun bɛɛrɛ wɛ̃ɛmɔ. Ma be ba gabu dam dɔremɔ ba nun nasie. 4 Domi a kua dam sarirugibu ka wɔnwɔndobun kuku yeru, wahalan saa. A bu berua woo bɔkɔn saa ka sɔ̃ɔn saa. Domi tɔn kɔ̃sobu ba ra tɔnu wɔriwa nge guru woo ge ga gana sweemɔ. 5 Yinni Gusunɔ, wuna a tii suobun wɔkinu kpeerasia nge mɛ a ra yam susuru kpeerasie tem mi gãanu ku ra kpi. Wuna a ben nasaran womusu tɛɛsi nge mɛ guru wiru ta ra sɔ̃ɔ tɛɛsi. 6 Gusunɔ, wɔllu ka tem Yinni u koo bwesenu kpuro tɔ̃ɔ baka dim soku, Siɔnin guurɔ. Dĩa duronu ka yaa gumgia ka tam gema u koo bu wɛ̃. 7 Kpa u sɔnditia ye ba ben wuswaa wukiri nuku sankiranun sɔ̃ wuna guu ten wɔllu mi. 8 U koo de gɔɔ u kpe sere ka baadommaɔ, kpa u ben nɔni yĩresu woka kpa u ben sekuru wuna tem mɛ kpuro sɔɔ. Wi, Yinni Gusunɔwa, u yeni gerua. 9 Tɔ̃ɔ te sɔɔ, ba koo Yinni Gusunɔ sɔ̃ bu nɛɛ, wuna a sãa bɛsɛn Yinni wi sa naanɛ sãa. Wuna a sun faaba kua. Su nuku dobu ko kpa su yɛ̃ɛri faaba yen sɔ̃. 10 Yinni Gusunɔ u koo Siɔnin guuru kɔ̃su. Adama u koo Mɔabuba munkuwa nge yaka si ba yari kɔkɔrɔwɔ. 11 Kpa bu ben nɔma dɛmia kɔkɔrɔ ge sɔɔ nge be ba kɛ̃ɛrimɔ. Ka mɛ, u koo de ben tii sua bi, bu kpewa. 12 U koo gbãra damgii ni nu gunu sura u kɔsuku nu gɔsia tua.
