Esai 24

1Wee Yinni Gusunɔ u koo tem kpuro kpeerasia mu ko bansu. U koo mɛn tɔmbu kpuro yarinasia, 2yãku kowobu ka tɔn dirobu, yinnibu ka yobu, wi u dɔramɔ ka wi u dwemɔ, wi u mɔ ba bɔkuramɔ ka wi u bɔkuramɔ, wìn dibu ba nɛni ka wi u dibu nɛni. 3Ba koo tem kpuro wɔri, kpa bu mɛn yãnu gura, kpa mu ko bansu. Yinni Gusunɔwa u yeni gerua. 4Tem mu koo gbera. Mu ǹ maa gãanu kpiisiamɔ. Mɛn tɔmbu ba ko n wasikiramɔ ba n gɔɔ dɔɔ. Mɛn wirugibu ba ǹ ko n maa dam mɔ. 5Domi mɛn tɔmbu ba mu disi doke, ba Yinni Gusunɔn woodaba ka win yiirebu yina. Ma ba arukawani nɔru sarigia ye u raa ka bu bɔkua kusia. 6Yen sɔ̃na bɔ̃ri yi koo tem mɛ di, kpa mɛn tɔmbu bu nɔni sɔ̃ɔra kɔ̃sa ye ba kuan sɔ̃. Ba koo bu kpeerasia. Be ba koo tiara ba ǹ ko n maa dabi. 7Ben resɛm gbaanu nu koo gbera, kpa ben tam durom mu kpe. Be ba raa nuku dobu mɔ̀, ba koo weeweenu ko. 8Ba ǹ maa baranu ka mɔrɔkunu soomɔ, ni ba ra ka nuku dobu ko. Nuku dobun kuuki yi koo kpe. 9Ba ǹ maa tam nɔrumɔ ba n ka womusu koosimɔ. Tam bɔɔbɔm mu koo sosia be ba mu nɔrumɔn mi. 10Wuu ge, ga koo ko bansu. Yɛnusu su ko n wãa dirisu. Goo kun maa duɔ mi. 11Ba ko n weeweenu mɔ̀ swɛɛ sɔɔ, yèn sɔ̃ tam sari. Nuku dobu koo doona ben tem di. 12Wuu ge, ga ko n sãawa bansu, kpa gen duu yenu nu n wɔruka, 13kpa tɔmbu ba n kɔ̃ɔkire tia tia tem mɛ sɔɔ, nge dãa bii ni nu tiara sanam mɛ ba dãru sira, ǹ kun mɛ nge resɛm ye ba kunɔnu mɔ̀. 14Be Yinni Gusunɔ u koo deri ba n wasi ba ko n kuuki mɔ̀ ka nuku dobu. Be ba wãa sɔ̃ɔ duu yeru gia, ba koo Yinni Gusunɔ tɔma win kpãarun sɔ̃, ba n mɔ̀, 15bɛɛ be i wãa sɔ̃ɔ yari yeru gia ka be ba wãa nim wɔ̃kun gooru gia, i Gusunɔ Isireliban Yinni bɛɛrɛ wɛ̃ɛyɔ. 16Sa ko nɔ ba womusu mɔ̀ baama handunian goonu nnɛ sɔɔ ba mɔ̀, i gemgii bɛɛrɛ wɛ̃ɛyɔ. Adama nɛ, kon nɔɔgiru sua na n mɔ̀, gbera man di, na kam kua, domi yibɛrɛba ba hania mɔ̀ ba yãnu guramɔ. 17Bɛɛ tem mɛn tɔmbu i ko i bɛrum soora domi ba bɛɛ yɛ̃ri ka suuri bɛrie, 18wi u duka mɔ̀ bɛrum sɔ̃, kpa u suura wɔri. Wi u maa yariɔ suuran di, kpa u yina mwaara. Domi gura baka koo kindama wɔllun di. Kpa tem kpɛɛkpɛɛku gu diiri. 19Tem mu koo yĩiri kpa mu beu ko, kpa mu bɛsikira. 20Mu ko n bãarimɔ nge tam nɔro, kpa mu n yĩirumɔ nge kuu te woo ga sweemɔ. Mɛn durum ya ko n mu buniɛ, kpa mu wɔruma mu kpana mu se. 21Saa ye sɔɔ, Yinni Gusunɔ u koo kperi sɛɛyasia wɔllɔ. U koo sinambu sɛɛyasia tem mini, 22kpa bu bu yoru mwa bu bu taasi wɔrusɔ nge pirisɔmba. Sɔ̃ɔ dabi dabirun biru, kpa bu bu sɛɛyasia. 23Sɔ̃ɔ ka suru ba koo sekuru wa. Gusunɔ, wɔllu ka tem Yinni, u ko n win bandu diiwa Siɔnin guurɔ, Yerusalɛmuɔ, kpa win tɔmbun guro gurobu bu win yiiko wa.

will be added

X\