Esai 23

1Gari wee yi yi ka Tiri yã. Bɛɛ be i wãa goo nimkuu bakasu sɔɔ, i wuri koowo, domi bɛɛn wuu ga kam kua. Yɛnusu kun maa wãa, duu yeru maa sari. Saa Kitimun tem diya sa yen labaari nua. 2I mario bɛrum sɔ̃, bɛɛ be i wãa nim wɔ̃kun gooru gia mi Sidonin tenkuba ba ra sare. 3Egibitigibu ba dobi yeemɔ daa te mɔ̀ Niluɔ ma tenkuba ba ye dwemɔ ba dɔramɔ ma ba are bɛkɛ dimɔ. Ma yam mi, n kua bwesenu kpuron yaburu. 4Sidoni, kaa sekuru wa, domi Tiri, nim wɔ̃kun wuu damguu, ga gerua ga nɛɛ, ga ǹ marubun wahala gaa waare, ga ǹ maa marure. Ga ǹ bii aluwaasi bɔm kɛ̃ɛre, ga ǹ maa bii wɔndia seeyare. 5Egibitigibu bà n nua ma Tiri ya wɔruma, ba koo diiri. 6Bɛɛ be i wãa nim wɔ̃kun gooru gia, i wuri koowo i ka da Taasisiɔ. 7Bɛɛn wuu ge ga wãa saa yellun di gè sɔɔ i ra nuku dobu ko, gera mi? Tiri yera mi? Yèn tɔmbu ba da ba tem tukumgibu kamia? 8Wara u ye kpuron himba yi Tirin sɔ̃, ye, ye ya ra yen wirugibu swĩi tem tukumɔ. Yen tenkuba ba kua sina bibu. Ma ba bɛɛrɛ mɔ handunia kpuro sɔɔ. 9Gusunɔ, wɔllu ka tem Yinniwa u ye yi, u ka be ba tii sue kawa tem mɛ sɔɔ, kpa bu be ba raa bɛɛrɛ wɛ̃ɛmɔ gɛm. 10Bɛɛ Taasisigibu i tɛrio bɛɛn tem sɔɔ nge mɛ daa te ba mɔ̀ Nilu tà n nim yiba mu ra tɛrie. Domi yoo sɔma kpa. 11Yinni Gusunɔ u win nɔma dɛmia nim wɔ̃kun bera gia. Ma u dera sinamba diira. U dera Kananin gbãra damginu nu wɔruka. 12U maa nɛɛ, bɛɛ Sidonigibu i ǹ maa nuku dobu wasi. Domi ba bɛɛ dam dɔre nge wɔndia wi u kun durɔ yɛ̃. Baa ì n seewa i da Kitimun temɔ, min tii i ǹ wɛ̃rabu wasi. 13I Babilonigibu mɛɛrio. Ba ǹ maa wãa. Asirigibu ba bu kpeerasia. Nge mɛya ba Tiri wɔri ba tarusi, ba yen sina kpaanu kɔsuka, ma ye kpuro ya kua bansu. 14I wuri koowo bɛɛ be i wãa goo nimkuu bakasu sɔɔ. Domi Tirin wuu damguu ge, ga wɔruma. 15Ba koo Tirin gari duari n ka ko wɔ̃ɔ wata ka wɔkuru nge sina boko turon bandun tɛɛbun saka. Adama yen biru ya ko n sãawa nge kurɔ sakara wi ba womu doke ba mɔ̀, 16a mɔrɔku suo a n soomɔ a ka wuu sikerena, wunɛ wi a sãare kurɔ sakara wi ba duari. A gu soowo nge mɛ wunɛn yɛ̃ra nɛ, a n ka womu dabi dabinu mɔ̀, kpa bu wunɛn gari yaaya. 17Wɔ̃ɔ wata ka wɔku ten biru, Yinni Gusunɔ u koo de Tiri yu maa wura yen yellun tenkuru sɔɔ te ba mɔ̀ ka taki. Kpa yu ka handunian tɔmbu kpuro arukawani bɔke. 18Adama ba ǹ yen arumani ka yen are yi ba wa ka taki guramɔ bu mɛnna ben tiin sɔ̃. Ba koo ye kpuro Yinni Gusunɔ yiiyawa kpa ya n sãa be ba nùn sãamɔgia, kpa bu dĩanu wa bu di bu debu, kpa bu yãa buranu wa bu doke.

will be added

X\