Esai 22

1- 2Gari wee, yi yi ka Yerusalɛmun wɔwa yã mi ba ra kãsi. Wunɛ Yerusalɛmu, mban sɔ̃na wunɛn tɔmba nuku dobu mɔ̀, ma ba kuuki mɔ̀. Mba n kua ba ka yɔɔmɔ dii tɛɛri wɔllɔ. Wunɛn tɔn be ba mɛɛra kua, ba ǹ bu mɛɛra kue tabu sɔɔ, ba ǹ maa gu ka takobi. 3Wee wunɛn tabu sinambu ka wunɛn tɔmbu kpuro ba duki yarina n toma, ma tɛn towobu ba bu mwɛɛra ba kua yobu. 4Yen sɔ̃, na bɛɛ sɔ̃ɔmɔ, i gɛsiro nɛn bɔkun di, i man derio n swĩ. I ku tii nɔwia ko i nɛɛ, i ko i man nukuru yɛmiasia nɛn tɔmbun nɔni swãarun sɔ̃. 5Tɔ̃ɔ teni sɔɔ, Gusunɔ, wɔllu ka tem Yinni u dera sa nɔni sɔ̃ɔre, sa burisinɛ, sa wãa biti sɔɔ wɔwa yeni sɔɔ mi ba ra kãsi. Ba gani kɔsukumɔ ma sa nɔɔgiru sue sa faaba kanamɔ guunun bera gia. 6Elamun tabu kowobu ba wee ba wãa tabu kɛkɛba sɔɔ ka maasɔbu, ma ba sɛ̃ɛ bwãanu bɛki. Kirigibu ba maa wee, ba tɛrɛnu nɛni. 7Wunɛ Yerusalɛmu, wee tabu kɛkɛba ba tɛrie wunɛn wɔwi sɔɔ mi tem gem wãa. Ma maasɔbu ba wunɛn gbãra kɔnnɔsu tarusi. 8Bɛɛ Yudaba i ǹ maa tãsi yeru mɔ. Tɔ̃ɔ te, i mɛɛra mi i ra bɛɛn tabu yãnu bere dii te ba mɔ̀ Dãa sɔ̃ɔwɔ. 9- 10Ma i deema ba bɛɛn wuu Yerusalɛmun gbãraru yabura. Yera i dia mɛɛra mɛɛra i kɔsuka i ka gbãra te sɔnwa. Ma i nim tora ye ba raa gban nim yɔ̃rasia wuu sɔɔ. 11I kpaa gba gbãranu yirun baa sɔɔ yu ka yeɔnɔn nim nɛnɛ. Adama i ǹ Gusunɔ mɛɛra wi u yen himba yi yellun di. 12Yen sɔ̃na tɔ̃ɔ teni sɔɔ, Gusunɔ, wɔllu ka tem Yinni, u bɛɛ soka i ka swĩ, kpa i weeweenu ko i bɛɛn winu kɔni, kpa i saakiba dewe nuku sankiranun sɔ̃. 13Adama wee i nuku dobu mɔ̀ i yɛ̃ɛrimɔ. I kɛtɛba ka yãanu goomɔ. I yaa temmɔ ma i tam nɔrumɔ i mɔ̀, su di kpa su nɔ, domi sia sa ko gbi. 14Yen sɔ̃na Gusunɔ, wɔllu ka tem Yinni u man sɔ̃ɔwa u nɛɛ, u ǹ bɛɛ bɛɛn durum yeni wɔkammɛ sere i ka gbi. 15Amɛniwa Gusunɔ, wɔllu ka tem Yinni, u man sɔ̃ɔwa. U nɛɛ, n doo n Sebina wi u sãa sina kpaarun sɔm kowobun wirugii sɔ̃ n nɛɛ, 16mba u mɔ̀ mi. Wara u mɔ mi u ka tii siki wɔru dãkuammɛ kperɔ. 17Wee wi, Yinni Gusunɔ u koo nùn bɔke nge kureru kpa u nùn kasa kɔ̃ ka dam, 18kpa u n bindimɔ nge banɔ batuma baka sɔɔ. Miya u koo gbi ka win tabu kɛkɛ sisugii yi u naanɛ sãa, wi, wi u win yinnin yɛnu sekuru doke. 19Wi, Yinni Gusunɔ, u koo nùn yara win sɔmburun di kpa u kun maa sãa goo. 20Yen tɔ̃ɔ te, wi Yinni Gusunɔ, u koo win sɔm kowo Eliakimu, Hilikiyan bii soku, 21kpa u nùn wi, Sebinan yaberu sebusia kpa u nùn win kpaka sɛ̃ke kpa u nùn win dam wɛ̃. Eliakimu wi, u ko n sãawa Yerusalɛmugibu ka Yudaban baaba. 22Yinni Gusunɔ u koo nùn Dafidin yɛnun kɔkɔrɔ wɛ̃. Ù n kɛnia, goo kun kɛnumɔ. Ù n maa kɛnua, goo kun kɛniamɔ. 23U koo nùn girawa nge sasaru mi n naanɛ mɔ, kpa u de win tundon yɛnu ga n bɛɛrɛ mɔ. 24U ko n sãawa bɛɛrɛ yen wiru. Be ba wãa win yɛnuɔ, bukurobu ka bibu, gobigibu ka sãarobu, wiya u ko n be kpuro sɔɔwa nge sasaru. 25Adama Gusunɔ, wɔllu ka tem Yinni, u maa nɛɛ, sɔ̃ɔ teeru ba koo sasa te wuka te ba raa gira mi n naanɛ mɔ mi, kpa tu wɔruma tu bɔɔra, kpa sɔmu ni ta raa sɔɔwa mi, nu kam ko. Yinni Gusunɔwa u yeni gerua.

will be added

X\