Esai 21

1- 2Gari yiniwa Yinni Gusunɔ u gerua Babilonin sɔ̃. U man kãsi nanumgiru sɔ̃ɔsi. Na wa yibɛrɛba ba wee saa tem mɛ ba nasien di nge mɛ woo guna ya ra nɛ saa sɔ̃ɔ yɛ̃san nɔm dwaru gian di. Wi u ra dam dɔre, u dam dɔramɔ. Wi u ra maa kpeerasie, u kpeerasiamɔ. Elamun tabu kowobu, i seewo. Mɛdiba, i wuu ge tarusio. Domi Yinni Gusunɔ u dera Babiloni ye, ya ǹ maa tɔmbu weeweenu koosimɔ. 3Ye na wa ka ye na nua kãsi te sɔɔ, ya dera nɛn torora kara. Ma wuriribu man wɔri nge tɔn kurɔ wi u yiire u kĩ u ma. Tirerabu dera na ǹ maa gari nɔɔmɔ. Ma diiribu dera na ǹ yam waamɔ. 4Nɛn laakari ya burisina, ma na diirimɔ bɛrum sɔ̃. Yoka yè sɔɔ na nuku dobu yĩiyɔ, ye sɔɔra bɛrum man deema. 5Kãsi te sɔɔ, na maa wa ba dĩanu yii ba kɔnnɔ kɔsu, ba dimɔ ba nɔrumɔ. Yera goo u nɛɛ, i seewo tabu sinambu, i bɛɛn tɛrɛnu gum tɛɛni. 6Ma Yinni Gusunɔ u man sɔ̃ɔwa u nɛɛ, n doo n wuu kɔ̃so yi kpa u man sɔ̃ ye u koo wa. 7Ma na kua mɛ. Yera u maasɔbu wa ba sĩimɔ yiru yiru. Gabu ba kɛtɛkunu sɔni, gabu maa yooyoosu. Ma u ye kpuro mɛɛra ka laakari. 8Yera wuu kɔ̃so wi, u gbãra nge gbee sunɔ u nɛɛ, gbãra kɔnnɔ miya u yɔ̃ saa kpuro, sɔ̃ɔ sɔɔ ka wɔ̃kuru. 9Ma u maasɔbu wa ba sĩimɔ yiru yiru. Ma u wa Babiloni ya wɔruma birem. Ma bwãaroku ni ba kua ben bũnun sɔ̃ nu wɔruka temɔ nu bɔɔkira. 10Bɛɛ nɛn tɔmbu Isireliba, bɛɛ be ba so nge dobi doo soo yerɔ, yeniwa na nua Gusunɔ bɛɛn Yinnin min di, wi, wi u sãa wɔllu ka tem Yinni. Yera na bɛɛ ye nɔɔsiamɔ. 11Wee ye Yinni Gusunɔ u man sɔ̃ɔsi Edɔmun sɔ̃. Na nɔɔ gagu nua Seirin di ga nɛɛ, wuu kɔ̃so, saa yerà wɔ̃kuru ta koo kpe. 12Ma wuu kɔ̃so u wisa u nɛɛ, bururu ta koo na, yen biru wɔ̃kuru ta koo maa na. Ì n kĩ i maa man gari bikia, i wurama i bikia. 13Wee ye Yinni Gusunɔ u gerua Daarububan tem sɔ̃. Dedanigibu, i doo i n wãa yakasu sɔɔ wɔ̃kuru. 14Bɛɛ be i wãa Temaɔ i ka be nim nɔru ga mɔ̀ nim daawo, kpa i ka kpikobu dĩanu daawa. 15Domi tabu swĩa ma tɔmba duki mɔ̀ takobi ka tɛndun sɔ̃. 16Wee ye Yinni Gusunɔ u man sɔ̃ɔwa. U nɛɛ, kam kam wɔ̃ɔ tian biru kese, u koo Kedaan bɛɛrɛ kpuro kpeerasia. 17Ben tɛn towo wɔrugɔba sɔɔ, fiikowa ya koo tiara. Gusunɔ, Isireliban Yinniwa u yeni gerua.

will be added

X\