Esai 2

1Gari yiniwa Yinni Gusunɔ u Esai Amɔtin bii sɔ̃ɔwa kãsiru sɔɔ, Yudaba ka ben wuu Yerusalɛmun sɔ̃. 2U nɛɛ, saa dãaka sɔɔ, guu tèn mi Yinni Gusunɔn sãa yera gire, ta koo guu ni nu tie bɛɛrɛ kera, kpa bwesenu kpuro nu na mi, 3nu nɛɛ, i na su da Yerusalɛmuɔ su yɔ Yinni Gusunɔn guurɔ mi Isireliba ba ra nùn sã. Kpa u sun win swɛɛ sɔ̃ɔsi su sĩ yi sɔɔ. Ba koo gere mɛ, domi guu ten min diya u koo win wooda yara kpa u gari geruma. 4U koo bwese dabinu siri, kpa bwese ni, nu nin takobiba bɔɔri nu ka tebonu seku. Mɛya nu koo maa nin yaasi bɔɔri nu woba so. Bweseru gara kun maa garu seesimɔ. Ba ǹ maa ben bibu tabu toobu sɔ̃ɔsimɔ. 5Bɛɛ Yakɔbun yɛnugibu, i na su da su sĩ yam bururam sɔɔ, mɛ Yinni Gusunɔ u sun wɛ̃ɛmɔ. 6Yinni Gusunɔ, wee a wunɛn tɔmbu Yakɔbun yɛnugibu deri, domi ba sɔ̃ɔ yari yerugibun sãaru mɔ̀. Ma ba wɔri dobo dobon kobu sɔɔ nge Filisitiba. Ba da ba ka tɔn tukobu arukawani bɔkua. 7Ben tem mu sii geesu ka wura yiba. Arumani ye ya wãa mi, ya ǹ nɔru mɔ. Tem mɛ, mu maa dumi yiba, ka tabu kɛkɛ sisugii yi yi ǹ geeru mɔ. 8Ba bwãarokunu seka baama. Ma ba nu yiirammɛ ba sãamɔ. 9Yen sɔ̃, tɔmbu kpurowa ba koo yiira Yinni Gusunɔn wuswaaɔ bu tii kawa. Yinni Gusunɔ, a ku bu ben durum suuru kua. 10Yen sɔ̃, bɛɛ Yakɔbun yɛnugibu, i duo kpee baaba sɔɔ kpa i kuke wɔrusɔ i ka Yinni Gusunɔn nanum ka win yiiko duka suuri. 11Tɔ̃ru gara sisi tè sɔɔ ba koo wi u tii sue kawa kpa bu Yinni Gusunɔ turo wɔlle sua. 12Domi wi, wɔllu ka tem Yinniwa. U tɔ̃ɔ te yi, tè sɔɔ u koo baawure siri wi u tii sue, kpa u nùn kawa. 13Tɔ̃ɔ te sɔɔ, u koo dãa baka ni nu gunu Libaniɔ ka Basaniɔ kpeerasia. 14Kpa u guunu ka gungunu 15ka gbãra damginu kɔsuku, 16ka sere goo nimkuu bakasu, gãanu kpuro gesi ye ba kĩru bo. 17- 18Tɔ̃ɔ te sɔɔ, ba koo wi u tii sue kawa kpa bu bwãarokunu kpeerasia. Yinni Gusunɔ turowa ba koo wɔlle sua. 19Sanam mɛ u koo se u tɔmbu nandasia, tɔmba koo du bu kuke kpee baaba sɔɔ ka wɔrusɔ, bu ka win dam ka win yiiko duka suuri. 20Tɔ̃ɔ te sɔɔ, tɔmba koo ben bwãaroku ni ba seka ka sii geesu ka wura ba sãamɔ gunɔnguunu ka yankɔ̃su deria. 21Kpa bu du bu kuke kpee baaba sɔɔ ka wɔrusɔ bu ka Yinni Gusunɔn dam ka win yiiko duka suuri. 22Ǹ n mɛn na, i ku bɛɛn naanɛ doke tɔnu sɔɔ. U sãawa nge woo. U ǹ sãa gãanu.

will be added

X\