Esai 19

1Gari yiniwa ba gerua Egibitin sɔ̃. Ba nɛɛ, wee Yinni Gusunɔ u sisi fuuku Egibitiɔ, u guru wiru sɔni nge duma. Ma Egibitigibun bũnu nu diirumɔ win wuswaaɔ, ma ben wɔrugɔru ta kpa. 2U koo de bu tabu ko ben tii tiinɛ. Mɔɔ ka wɔnɔ ba koo tabu wɔrina. Bɔrɔ ka bɔrɔ ba koo tabu wɔrina. Wusu su koo tabu wɔrina. Sinambu ba koo tabu wɔrina. 3U koo de Egibitigibu bu mwia kpana, kpa u ben nɔɔ tia kam koosia. Kpa bu bikiaru da bũnun mi ka dobo dobogibun mi ka gɔri sokobun mi, ka sɔrobun mi. 4U koo bu yinni gɔbo nɔmu sɔndia, kpa sunɔ nuku kɔ̃surugii u n bu dam dɔremɔ. Gusunɔ, wɔllu ka tem Yinniwa u yeni gerua. 5U koo ben daa baka ten nim kpeerasia kpa tu gbera. 6Ten yɛrusun nim mu koo numia, kpa ten kɛrin winun nim mu gbera, kpa naa yari ka gbĩi yi yi wãa ten goorɔ yi gbera. 7Gãanu kun ko n maa wãa daa ten goorɔ ka ten sure yerɔ. Bà n gãanu duura mi, nu koo gberawa nu gbi. 8Be ba susure mɔ̀ mi kpuro ka kɔkɔnu ǹ kun mɛ ka yãakoronu, ba koo nuki sankirawa kpa bu swĩ. 9Be ba beku wɛ̃ɛ damgii tarimɔ ka be ba beku kpikinu wesimɔ ba koo sekuru wa. 10Be ba sãa tem mɛn dam ba koo kɔsikira. Kpa ben sɔm kowobu bu nuki sankira. 11Soanin wirugibu ba sãawa gari bakasu. Egibitin sunɔn bwisi kɛ̃ɔbu bà n mɛnna, gari baka gariya ba ra gere. Bwisi kɛ̃ɔbu bɛɛ, amɔna i ko i kãku i gere i nɛɛ, i sãawa bwisigibu ka sina bibu. 12Wunɛ maa Egibitin sunɔ, mana wunɛn bwisi kɛ̃ɔ be, ba wãa. Kpa bu gere su nɔ yèn himba Gusunɔ wɔllu ka tem Yinni u wunɛn temgibu kua. 13Soanin wirugiba kua wiirobu, ma Nɔfun wirugiba kun maa yɛ̃ ye ba mɔ̀. Wirugii be, ba dera Egibitigiba kɔ̃ɔramɔ. 14Yinni Gusunɔ u ben bwisi burisina kpa bu de Egibitigibu bu kɔ̃ɔra, ba n mɔ̀ nge tam nɔro wi u bindimɔ win sianu sɔɔ. 15Wirugii ka bwɛ̃ɛbwɛ̃ɛ, gobigii ka sãaro, ben goo kun maa kpɛ̃ u gãanu ko Egibitiɔ. 16Sanam mɛ Egibitigiba koo wa ma Yinni Gusunɔ u bu win nɔmu dɛmiɛ u ka bu sɛɛyasia ba koo bɛrum soora nge tɔn kurɔbu. 17Saa ye sɔɔ, baa bà n nua ba Yudan gari mɔ̀, ba koo nanda Yinni Gusunɔn himban sɔ̃ ye u yi ben sɔ̃. 18Saa ye sɔɔ, wusu nɔɔbuwa su ko n wãa Egibitin temɔ sì sɔɔ ba ko n da Yudaban barum gere. Kpa ba n da bɔ̃re ma ba sãa Gusunɔ, wɔllu ka tem Yinnin tɔmbu. Ba koo wuu sin teu sokuwa Sɔ̃ɔn wuu. 19Ba koo Yinni Gusunɔ yãku yeru kua Egibitin tem suunu sɔɔ, kpa bu kperu garu gira mɛn nɔɔ bura yerɔ bu ka nùn bɛɛrɛ wɛ̃. 20Yera ya koo sɔ̃ɔsi ma Yinni Gusunɔ u wãa Egibitin temɔ. Bà n nùn nɔɔgiru sue be ba bu dam dɔremɔn sɔ̃, u koo bu faaba kowo wɛ̃ wi u koo bu wɔra ben nɔman di. 21Saa ye sɔɔ, u koo bu tii sɔ̃ɔsi kpa bu nùn gia. Ba koo nùn yãkunu kua kpa bu ka nùn kɛ̃nu naawa. Bà n nùn nɔɔ mwɛɛnu kua, kpa bu nu yibia. 22U bu mɛɛra kua, adama u koo bu bɛkia. Ba koo gɔsira win mi, kpa u ben kanaru nɔ u bu faaba ko. 23Saa ye sɔɔ, swaa ya koo yari Egibitin di yu da Asiriɔ, kpa Egibitigibu bu da Asiriɔ. Asirigibu ba koo ma da Egibitiɔ, kpa be kpuro bu mɛnna bu Yinni Gusunɔ sã. 24Saa ye sɔɔ, Isireliba ba koo ka Egibitigibu ka Asirigibu nɔɔ tia ko, kpa handuniagibu kpuro bu domaru wa. 25Gusunɔ, wɔllu ka tem Yinni, u koo bu domaru kua u nɛɛ, domarugiba bɛɛ, nɛn tɔmbu Egibitigibu. Domarugiba bɛɛ, Asirigibu, bɛɛ be na mɔma. Domarugiba bɛɛ Isireliba, bɛɛ be na gɔsa na tii yiiya.

will be added

X\