Esai 18

1Tem mu wãa Etiopin daarun bera giɔ, mi tabun wurenu nɔɔramɔ. 2Mɛn tɔmbu ba gunu ma ben wasi ballimɔ. Ba bu nasie baama kpuro, yèn sɔ̃ ba ra kpuro kɔsuku. Ma daanu ben tem buranɛ. Beya ba sɔmɔbu gɔra ka goo nimkuu si ba kua ka gbĩi. Goo nimkuu si, su duka mɔ. Tɛ̃, sɔmɔbu bɛɛ, i wuro bɛɛgibun mi. 3Bɛɛ handuniagibu kpuro, i gidi bɔra mɛɛrio ye ba koo gira guuru wɔllɔ. I kɔban swĩi swaa dakio ye ba koo so. 4Domi amɛniwa Yinni Gusunɔ u man sɔ̃ɔwa. U nɛɛ, u yɔ̃ sɛ̃ɛ u yam mɛɛra ka laakari win wãa yerun di sɔ̃ɔ sãrerun saa ka wuburun saa. 5Resɛm yà n wɛ̃su kua, ma ya bɛm doke ya ye, bu sere ye sɔri, yibɛrɛ u koo na u yen kãasi bɔɔri ka woburu, 6kpa u ye gunɔsu ka gbeeku yɛɛ deria yi di. Gunɔsu su ko n wãa mi, yam susurun saa, kpa gbeeku yɛɛ yi n wãa mi puran saa. Nge mɛya ba koo Asirigibun tabu kowobun gonu kua. 7Saa ye sɔɔ, tɔn be ba gunu mi, ma ben wasi ballimɔ ba bu nasie baama kpuro yèn sɔ̃ ba ra kpuro kɔsuku, ma daanu ben tem buranɛ, tɔn be, ba koo ka Gusunɔ wɔllu ka tem Yinni kɛ̃nu naawa Siɔnin guurɔ mi ba ra nùn sã.

will be added

X\