Esai 17

1Yinni Gusunɔ u nɛɛ, wee Damasi ya ǹ ko n maa wãa, ya koo kowa bansu. 2Ba koo Aroɛɛn wusu yaa sabenu deria. Miya nu ko n da kpunɛ. Goo maa sari wi u koo nu nandasia. 3Isireliba ba ǹ ko n gbãraru mɔ. Mɛya Damasi ya ǹ ko n maa sina boko mɔ. Sirigii be ba tie, ba ǹ Isireliba bɛɛrɛ keramɔ. Gusunɔ, wɔllu ka tem Yinniwa u yeni gerua. 4Saa ye sɔɔ, Isireliban bɛɛrɛ ya koo kaara, kpa ben dukia yu doona bu ko sãarobu. 5Ben tem mu ko n sãa nge gbee tèn dĩanu ba gã ba gura. Nu ko n sãawa para para nge sanam mɛ ba dĩanu gura Refan wɔwan di. 6Isireliban fiikowa ya koo tiara nge dãa bii ni nu tiara sanam mɛ ba dãru sira. À n mɛɛra kaa wa yiru ǹ kun mɛ ita tɔna ya tie ten wii kpiirɔ, ma nnɛ ǹ kun mɛ nɔɔbu ya tie ten kãasi sɔɔ. Gusunɔ Isireliban Yinniwa u yeni gerua. 7Tɔ̃ɔ te sɔɔ, tɔmba koo ben laakari wesia ben taka kowon mi gia, kpa ben nɔni yi Gusunɔ Isireliban Yinni Dɛɛro wa. 8Ba ǹ maa ben laakari wesiamɔ bũu turanun bera gia, ni ben tii ba kua. Ba ǹ maa Asitaaten bwãaroku sãamɔ, ka bwãaroku ni ba kua sɔ̃ɔn sɔ̃. Domi nu sãawa ben tiin nɔman koora. 9Saa ye sɔɔ, Isireliba ba koo ben wuu damgisu deri, kpa su ko bansu nge mɛ Amɔreba ba ben wusu deri be Isireliban sɔ̃. 10Wee bɛɛ Isireliba, i Gusunɔ bɛɛn Yinni duari wi u bɛɛ faaba kua. I ǹ nùn yaaye wi u sãa bɛɛn kuku yee naanɛgiru. Domi wee i dãa binu duura bũnun sɔ̃. 11Sanam mɛ i nu duura, i nu kara koosi, ma nu seewa nu kpɛ̃a fuuku, nu wɛ̃su kua. Adama sanam mɛ i ko i nuku dobu ko i nin marum sɔri, i deema gãanu sari. Ma n kua nɔni swãa bakaru te ta ǹ kpeemɔ. 12Anna a kukiribu nɔ. Bwese dabinu nu burisinɛ ma nu kukirimɔ nge nim wɔ̃kun nim. Nu wɔki nge daa tèn tora ya bɔɔbu. 13Ba kukirimɔ nge daa bakarun nim. Adama Yinni Gusunɔ u bu gerusi, ma ba duki yarina n toma, nge yaka si woo ga sua ga ka doona, ǹ kun mɛ, nge tua ye woo guna ya seeya. 14Ye n kua yoka ma ba bu kpeerasia subaru sɔɔ. Yam mu sere sãra ba ǹ maa wãa. Nge mɛya be ba sun wɔrimɔ bu ka sun gura ben kɔkɔrɔ ya ko n sãa.

will be added

X\