Esai 16

1I Yudaban sina boko yãa kpɛmminu mɔrisio Selan di, kpa bu ka nu da Siɔnin guurɔ ka swaa ye ya kpa mi gãanu ku ra kpi. 2Domi Mɔabun tɔn kurɔbu ba koo Aanɔɔn daaru tɔbura, kpa ba n sɛnde nge gunɔ si ba gira sokurun di su duki mɔ̀. 3Ba koo Yudaba sɔ̃ bu nɛɛ, i sun bwisi kɛ̃ɔ i sun sɔ̃ɔwɔ ye sa ko ko. I de bɛɛn saaru ta n sun wukiri sɔ̃ɔ sɔɔ nge yam wɔ̃kuru. I sun beruo bɛsɛ be ba naa gire. I ku sun yibɛrɛba nɔmu bɛria. 4I sun mɔɔ bɛsɛ be sa kpikiru suuma Mɔabun di. Kpa i n sãa bɛsɛn kuku yeru be ba sun kpeerasiamɔn sɔ̃. Domi dam dɔrebu bu koo kpe. Be ba maa sun kpeerasiamɔ ba koo doona. 5Saa ye sɔɔ, goo u koo yari Dafidin bweseru sɔɔ Gusunɔn durom saabu kpa u bandu di te ta ko n sirere kpa tu dakaa da. U koo tɔmbu kpara gem sɔɔ, kpa u n kpeere u ka bu siria dee dee. 6Yudaba ba nɛɛ, sa Mɔabuban yɛ̃kɔ ka ben tii suabun labaari nɔɔmɔ, ka ben woo bɔbunu ka ben gari kam gerubu. 7Tɛ̃ ba weeweenu mɔ̀ ben tiin sɔ̃, ba sumɔ Kiri Haresɛtin sɔ̃ ye ya bansu kua. 8Wee ba Hɛsibonin gberu kpaanɛba sanka. Bwese tukunun sinambu ba Sibiman resɛmban konu bɔɔra. Resɛm gbaa ni, nu tɛrie sere Yasɛɛɔ sɔ̃ɔ yɛ̃san nɔm geu gia n ka da mi gãanu ku ra kpin sɔ̃ɔ yari yerɔ, ka sere nim wɔ̃kun guruɔ sɔ̃ɔ duu yerɔ. 9Tɛ̃ wee, na sumɔ Sibiman resɛm gbaanu ka Yasɛɛn sɔ̃. Na Hɛsiboni ka Eleale nɔni yĩresu wisimɔ, domi tabu kowoba ben gbea wɔri ba yen dĩanu gura. 10Nuku dobu kun maa wãa resɛm gbaanɔ. Ba ǹ maa womusu mɔ̀ mi. Mɛya ba ǹ maa resɛmba gamamɔ. Nuku dobun kuuki yi kpa. 11Nɛn wasi yi diirumɔ Mɔabun sɔ̃ nge mɔrɔku sɛrum. Mɛya nɛn gɔ̃ru ga maa diirumɔ Kiri Harɛsin sɔ̃. 12Mɔabuba ba daamɔ gungunu wɔllɔ kam sɔɔ. Ba dumɔ ben bũu sãa yerɔ bu ka domaru ko. Adama ba ǹ somiru wasi. 13Gari yiniwa Yinni Gusunɔ u gerua yellun di Mɔabuban sɔ̃. 14Adama tɛ̃, u nɛɛ, wɔ̃ɔ ita yà n doona kese, ba koo wi u bɛɛrɛ bo Mɔabuɔ gɛm, ka sere maa yen tɔmbu kpuro. Be ba koo tia, ba ǹ ko n dabi, ba ǹ maa bu mɛɛrimɔ gãanu.

will be added

X\