Esai 15

1Gari yiniwa ba gerua Mɔabuban sɔ̃. Mɔabun tem kpuro mu koo kam ko, kpa bu Ari Mɔabu ka Kiri Mɔabu kɔsuku wɔ̃ku teeru. 2Dibonigibu ba da bũu sãa yerɔ ka guunu wɔllɔ bu ka swĩ. Mɔabuba ba weeweenu mɔ̀ wuu si ba mɔ̀ Nɛbo ka Mɛdeban sɔ̃. Ma ba ben winu ka ben tobunu kɔna nuku sankiranun sɔ̃. 3Ma ba saakiba sebua ba wãa swɛɛ sɔɔ ka dii tɛɛriɔ ka dii yaariɔ nuku sankiranun sɔ̃. Ma ba weeweenu mɔ̀ ba sumɔ ka nɔni yĩresu. 4Hɛsibonigibu ka Elealegibu ba faaba kanamɔ ma ba ben nɔɔ nɔɔmɔ sere Yahasiɔ. Baa Mɔabun tabu kowobun tii ba wuri mɔ̀wa bɛrum sɔ̃. 5Na faaba kanamɔ Mɔabuban sɔ̃ be ba kpikiru suɔ ba dɔɔ Soariɔ ka Egalati Selisiyaɔ. Domi ba sumɔ ba ka Lusitin guunu yɔɔmɔ, ba wuri mɔ̀ Koronaimun swaaɔ nuku sankiranun sɔ̃. 6Daa te ba mɔ̀ Nimurimu ten nim mu gbera. Yaka si su wãa ten gãarɔ su gbera. Gãanu kun maa kpia mi. 7Yen sɔ̃na ba ben arumani gura ye ya bu tie ba ka tɔburamɔ nim toran guru giɔ mi dãnu wãa. 8Mɔabuban tem nɔɔ bura yenu kpuro sɔɔ, wuri nɔɔramɔ. Ben weeweenu nu nɔɔramɔ sere Egalaimuɔ, ka maa Elimun dɔkɔwɔ. 9Daa te ta wãa Dimɔniɔ ten nim mu yɛm yiba tɔn be ba gon sɔ̃. Adama Yinni Gusunɔ u koo kpam Dimɔni ye nɔni swãaru kpɛ̃ɛ. U koo de yibɛrɛba bu Mɔabun kpikobu, ka be ba tie tem mɛ sɔɔ wɔri nge gbee sinansu.

will be added

X\