Esai 14

1Yinni Gusunɔ u koo Isireliba wɔnwɔndu kua. U koo maa bu gɔsi bu ko wigibu, kpa u bu swĩi ben temɔ. Saa yera sɔba koo du ben suunu sɔɔ, kpa bu mɛnna ba n wãa ka be sannu. 2Bwese dabinu nu koo ka Isireliba wurama ben temɔ, kpa bu bwese ni ko yobu tem mɛ Yinni Gusunɔ u bu wɛ̃ sɔɔ. Be ba raa Isireliba yoru mwɛɛra ba koo maa ben tii yoru mwɛɛri. Mɛya be ba raa bu dam dɔre, ba koo maa ben tii dam dɔre. 3Bɛɛ Isireliba, Yinni Gusunɔ u koo de i yoru yari, kpa i wɛ̃ra bɛɛn wasiraru ka nɔni swãarun sɔ̃. 4Ù n kua mɛ, womu geniwa i ko i ka Babilonin sina boko yɛ̃ɛ i nɛɛ, wi u raa sun dam dɔremɔ, u ǹ maa wãa. Dam dɔrebu kpa. 5Yinni Gusunɔ u nuku kɔ̃surugii be ba sun dam dɔremɔn dam bua, mɛ mu sãa nge bokuru. 6Wi u ra n daa tɔmbu soomɔ ka mɔru wɔnwɔndu sari, kpa u n tɔmbu dam dɔremɔ, ba nùn nɔni sɔ̃ɔwa sere ka nɔrɔ. 7Wee tɛ̃ tɔmba wɛ̃re handunia kpuro sɔɔ, ma ba nuku dobun kuuki mɔ̀. 8Baa ka dãa ni ba mɔ̀ sipɛrɛba ka sɛduruba ni nu wãa Libaniɔ nu nuku dobu mɔ̀, nu mɔ̀, saa dɔma tèn di a wɔruma, goo ku ra maa nɛ u sun bɔɔri. 9Be ba wãa gɔribun wãa yerɔ ba seewa bu ka nun dam koosia, be ka ben wirugibu kpuro. Mɛya sinam be ba gu ba seewa ben sina gɔnin di. 10Ma be kpuro ba nùn nɔɔgiru sue ba nɛɛ, wee wunɛn tii a kua dam sarirugii nge bɛsɛ. Sa kua tia. 11Wunɛn bɛɛrɛ ye ba ra raa nun wɛ̃, ba n mɔrɔkunu soomɔ, wee ye kpuro ya wɔri gɔribun wãa yerɔ. Kɔkɔnu nu kua wunɛn kpin yeru ka wunɛn bekuru. 12Wunɛ wi a sãa nge buruku kpera ye ya ballimɔ, wee a wɔruma wɔllun di. Wunɛ wi a bwesenu kpuro tabu di, wunɛ wee ba sura temɔ, a kpĩ. 13Wunɛ wi a ra n gerumɔ wunɛn gɔ̃ruɔ a n mɔ̀, kaa yɔ wɔllɔ, a wunɛn sina gɔna tɛria kperin wɔllɔ, kpa a sina guuru wɔllɔ sɔ̃ɔ yɛ̃san nɔm geu gia, bũnun suunu sɔɔ. 14Kaa yɔ guru winu wɔllɔ, kpa a ka Wɔrukoo weena. 15Adama wunɛ wee, ba sure gɔribun wãa yerɔ sere wɔrun sɔɔ sɔɔwɔ. 16Be ba nun wa kpa ba n nun mɛɛra tii ka laakari ba n mɔ̀, n ǹ durɔ wiya mi, wi u ra raa de tɔmbu bu burisina? Kpa u bandu suriri? 17U yina u pirisɔmba kara. U wusu kɔsuka. Ma handunia ya gɔsia bansu. 18Bwesenu kpuron sina boko baawure u wãa u wɛ̃re ka bɛɛrɛ win sikirɔ. 19Adama wunɛ, ba nun kasa kua a ka wunɛn sikiru tonda nge dãa kãasa ye ba ǹ kĩ, ǹ kun mɛ nge wi ba takobi sɔkura ba go ba sure wɔru sɔɔ ge ga kpenu mɔ, ǹ kun mɛ nge goo te ba taaka. 20Ba ǹ nun sika nge sinam be, domi a wunɛn tem go, ma a wunɛn tɔmbu kpeerasia. Ba ǹ maa wunɛn bwese kɔ̃surun gari mɔ̀. 21I sɔɔru koowo i win bibu go kɔ̃sa ye ben sikadoba ba kuan sɔ̃, kpa bu ku raa se bu maa handunia tabu di, kpa bu maa wusu seeya bu yibu si sɔɔ. 22Nɛ Gusunɔ, wɔllu ka tem Yinni, na nɛɛ, kon Babilonigibu seesi n ben bweseru ka ben wuun yĩsiru go. Ba ǹ maa ben yira wasi. 23Kon de wuu ge, gu ko nge daru bwãara mi gunɔ sarenu nu ra n wãa, kpa n gu kura ka yii te ta ǹ bu gãanu ganu deriammɛ. Nɛ Gusunɔ, wɔllu ka tem Yinniwa na yeni gerua. 24Nɛ, Yinni Gusunɔ Dam kpurogii na bɔ̃rua na nɛɛ, ye na yi, ya koo maa na. Ye na maa gɔ̃ru doke ya koo koora. 25Kon Asirigibu kɔsuku nɛn tɔmbu Isireliban temɔ. Kon bu taaku nɛn guunu wɔllɔ, kpa n nɛn tɔmbu yara ben yorun di, ba kun ben sugu ka ben sɔmunu sɔɔwa. 26Yeniwa nɛn himba tɔmbu kpuron sɔ̃. Wee na nɔmu dɛmiɛ n ka bwesenu kpuro sɛɛyasia. 27Nɛ Gusunɔ, wɔllu ka tem Yinni, nà n gãanu yi wara koo ye yina. Nà n nɔma dɛmiɛ wara u koo ye kure. 28Wɔ̃ɔ gè sɔɔ sina boko Akasi u gu, wɔ̃ɔ ge sɔɔra Yinni Gusunɔ u Filisitiba gari yini sɔ̃ɔwa saa Esain nɔɔn di u nɛɛ, 29bɛɛ Filisitiba kpuro i ku nuku dobu ko yèn sɔ̃ boku te ta raa bɛɛ soomɔ ta bɔɔra. I n yɛ̃ ma ì n waa gɔsɔbu sarari, i ko i surɔkɔru girari. 30Saa gaa sisi yè sɔɔ be ba sãaru bo ba koo wa bu di, kpa wɔnwɔndobu ba n wãa bɔri yɛndu sɔɔ. Adama bɛɛ Filisitiba kon de bɛɛn nuuru tu gbi gɔ̃ɔrun sɔ̃. Be ba koo maa tiara, ba koo bu gowa. 31Bɛɛ be i wãa wuun gbãra kɔnnɔwɔ i weeweenu koowo bɛrum sɔ̃. Bɛɛ Filisitiba kpuro gesi i diirio, domi yibɛrɛba ba tua seeye nge dɔ̃ɔ wiiru. Ba wee sɔ̃ɔ yɛ̃san nɔm geu gian di, ma ben tabu sĩi yi baasinɛ. 32Esai u nɛɛ, mba sa ko Filisitiban gɔrobu wisi. Sa ko nɛɛ, Yinni Gusunɔwa u Siɔni swĩi. Miya win tɔn be ba sãa wɔnwɔndobu ba koo kuke ka bɔri yɛndu.

will be added

X\