Esai 13

1Wee, ye Yinni Gusunɔ u Esai, Amɔtin bii sɔ̃ɔsi kãsiru sɔɔ Babilonin sɔ̃. 2U nɛɛ, i gidi bɔra yɔ̃rasio guuru wɔllɔ mi gãanu sari. I tabu kowobu nɔɔgiru sueyo, kpa i bu yĩreru kua ka nɔma, kpa bu duki na bu du Babilonin kɔnnɔsun di. 3Wee, na nɛn tabu kowo be na gɔsa wooda wɛ̃. Na tabu durɔ wɔrugɔ be soka bu ka nɛn mɔru suresia, be, be ba ra n nuku dobu mɔ nɛn kpãarun sɔ̃. 4Ma Esai u mɛɛra u nɛɛ, i tɔn dabinun wurenu swaa dakio i nɔ guunun bera gia. Bwese dabinu ka sinambu dabina nu mɛnnɛ mi, Gusunɔ, wɔllu ka tem Yinnin tabu kowoba be ba tabun sɔɔru kpa. Ma u bu mɛɛra mɛɛra u ka da. 5Be wee ba wee sannu saa mi n toman di bu ka tem mɛ kam koosia, win mɔrun saabu. 6I gɔɔ swĩiyɔ domi Yinni Gusunɔn tɔ̃ɔ te, ta turuku kua. Ta sãawa kam koo bi bu wee wi, Dam kpurogiin min di. 7Yen sɔ̃na tɔmbu kpuron gɔma koo dwiiya kpa ben wɔrugɔru tu kpe. 8Babilonigiba koo bɛrum soora, kpa ben wasi yi dwiiya wuriribun sɔ̃. Ba koo tii tɛma nge tɔn kurɔ wi u yiire u kĩ u ma. Ba ko n mɛɛrinɛ ben wuswaa ya n burisinɛ. 9Wee Yinni Gusunɔn tɔ̃ru ta sisi. Tɔ̃ɔ te, ta sãawa nɔni swãarugiru tè sɔɔ u koo win mɔru baka sɔ̃ɔsi. U koo durumgibu kpeerasia, kpa tem mɛ, mu ko bansu. 10Wɔllun kperi kun maa yam dɛɛrasiamɔ. Sɔ̃ɔ ù n yariɔ, min diya u ko n yam tĩramɔ. Mɛya suru kun maa yam bururasiamɔ. 11Yinni Gusunɔ u nɛɛ, kon handuniagibu sɛɛyasia ben kɔ̃sa ye ba mɔ̀n sɔ̃, ka maa nuku kɔ̃surugibu ben nuku kɔ̃surun sɔ̃. Kon de be ba tii sue bu kam ko, kpa n be ba tɔmbu dam dɔremɔ kpeerasia. 12Kon de bu tɔmbu kasu nge mɛ ba ra wura gea kaso de tontondeɔ. 13Nɛ Gusunɔ, wɔllu ka tem Yinnin mɔrun tɔ̃ru sɔɔ, kon wɔllu yĩiri, kpa tem mu diiri sere mɛn sɔɔwɔ. 14Kpa be ba raa yoru dimɔ Babiloniɔ bu duki wura ben temɔ nge nɛmu ge ba gire. Ba koo duki yarina bu da ben tɔmbun mi nge yaa sabe ni nu kun kparo mɔ. 15Ben wi ba nɔma tura kpuro wuu ge sɔɔ, ba koo nùn tweewa bu go. Wi ba maa naa gira ba mwa, ba koo nùn gowa ka takobi. 16Ba koo arumani gura ben yɛnusɔ bu ben bibu munku ben wuswaaɔ. Kpa bu ka ben kurɔbu kpuna ka dam. 17Kon de Mɛdiba bu bu wɔri be, be ba ǹ sii geesu ka wuran binɛ mɔ. 18Ba koo aluwaasiba tweewa bu go. Mɛya ba ǹ bii wɛ̃ɛnu buremɔ. Ba ǹ maa bibun wɔnwɔndu mɔ̀. 19Babiloniwa sinambu kpuro ba mɛɛra wuu burɔ, ma yen tɔmbu ba tii sue. Adama nɛ, Yinni Gusunɔ, kon ye kpeerasia nge mɛ na Sodomu ka Gomɔra kua. 20Tɔmbu ba ǹ maa sinamɔ ye sɔɔ. Ya ko n sãawa bansu sere ka baadommaɔ. Goo kun maa win kuu bekurugiru giramɔ mi. Baa be ba yaa sabenu kparamɔ, ba ǹ yɔ̃ramɔ mi. 21Miya gbeeku yɛɛ yi koo wãa yeru ko. Boorosu su koo yibu yen ban si sɔɔ, kpa taataanu nu maa nin wãa yeru ko mi, kpa boo kinɛnu nu n yɔ̃ɔkumɔ mi. 22Purukanu ka gbeeku bɔ̃nu koo kuuki ko yen sina kpaa buranu sɔɔ. Wee yen saa ya turuku kua, ba ǹ maa yen tɔ̃ru sosimɔ.

will be added

X\